500% ટેક્સ? ટ્રમ્પનું મગજ છટક્યું! આ દેશોની હવે ખેર નથી, જાણો અમેરિકાના પ્રમુખનો પ્લાન
Donald Trump Russia trade: પુતિનને રોકવામાં નિષ્ફળ ગયેલા ટ્રમ્પે હવે આર્થિક યુદ્ધ છેડ્યું, રશિયન તેલ ખરીદનારા દેશો પર 500% ટેરિફની તૈયારી.
Donald Trump Russia trade: અમેરિકાના રાષ્ટ્રપતિ ડોનાલ્ડ ટ્રમ્પે રશિયા-યુક્રેન યુદ્ધને લઈને હવે અત્યંત આક્રમક વલણ અપનાવ્યું છે. અત્યાર સુધી યુદ્ધ રોકવાના તેમના રાજકીય પ્રયાસો નિષ્ફળ જતા, ટ્રમ્પે હવે આર્થિક હથિયાર ઉગામ્યું છે. તેમણે વિશ્વભરના દેશોને સીધી ચેતવણી આપી છે કે જો કોઈ પણ દેશ રશિયા સાથે વેપાર ચાલુ રાખશે, તો તેમણે અમેરિકાના "ખૂબ જ કડક પ્રતિબંધો" નો સામનો કરવો પડશે. આ ઝપટમાં ભારત પણ આવી ગયું છે, જેના પર ટ્રમ્પ પ્રશાસને 50% જેટલો તોતિંગ ટેરિફ લાદી દીધો છે. આ ઉપરાંત, નવા કાયદા હેઠળ રશિયન તેલના વેપાર પર 500% સુધીના ટેક્સની જોગવાઈ વિચારણા હેઠળ છે.
ટ્રમ્પનો હુંકાર: રશિયા સાથેના સંબંધો પર પૂર્ણવિરામ?
ન્યૂ યોર્ક અને વોશિંગ્ટનથી પ્રાપ્ત અહેવાલો અનુસાર, ડોનાલ્ડ ટ્રમ્પે સ્પષ્ટ શબ્દોમાં કહ્યું છે કે રશિયા સાથે વેપાર કરનારા કોઈપણ દેશને બક્ષવામાં આવશે નહીં. ટ્રમ્પે જણાવ્યું હતું કે, "રશિયા સાથે વેપાર કરનાર કોઈપણ દેશે ગંભીર આર્થિક પ્રતિબંધો માટે તૈયાર રહેવું પડશે." તેમણે સંકેત આપ્યો છે કે આ યાદીમાં ઈરાનનો પણ સમાવેશ કરવામાં આવી શકે છે. ટ્રમ્પનું આ વલણ દર્શાવે છે કે તેઓ વ્લાદિમીર પુતિનને આર્થિક રીતે તોડી પાડવા માટે રિપબ્લિકન કાયદા ઘડનારાઓ સાથે મળીને મોસ્કો વિરુદ્ધ કડક કાયદાઓ લાવવા આગળ વધી રહ્યા છે.
ભારત પર સૌથી મોટો આર્થિક પ્રહાર (50% ટેરિફ)
ટ્રમ્પની આ નીતિની સૌથી ગંભીર અસર ભારત પર જોવા મળી રહી છે. ટ્રમ્પ વહીવટીતંત્રે ભારત પર 50% આયાત ટેરિફ લાદવાનો નિર્ણય કર્યો છે, જે હાલના સમયે વિશ્વમાં સૌથી વધુ માનવામાં આવે છે. આ ટેરિફ માળખામાં રશિયા પાસેથી ખરીદવામાં આવતા તેલ પર વધારાની 25% ડ્યૂટીનો પણ સમાવેશ થાય છે. આ પગલું ભારત અને અમેરિકાના વેપાર સંબંધો પર મોટી અસર કરી શકે છે.
‘રશિયા સેંકશન્સ એક્ટ 2025’: 500% ટેક્સની તૈયારી
કોંગ્રેસમાં રશિયા વિરુદ્ધની કાર્યવાહી વધુ તેજ બની છે. કોંગ્રેસમેન લિન્ડસે ગ્રેહામ અને રિચાર્ડ બ્લુમેન્થલે સંયુક્ત રીતે "Russia Sanctions Act 2025" (રશિયા પ્રતિબંધ કાયદો 2025) રજૂ કર્યો છે. આ કાયદાનો મુખ્ય ઉદ્દેશ્ય યુક્રેનમાં પુતિન દ્વારા ચલાવવામાં આવતા યુદ્ધને મળતું આર્થિક ભંડોળ અટકાવવાનો છે.
આ બિલમાં રશિયન તેલની ખરીદી અને વેચાણ પર 500% જેટલો અસહ્ય ટેરિફ લાદવાનો પ્રસ્તાવ છે.
હાઉસ ફોરેન રિલેશન્સ કમિટીમાં આ દરખાસ્તને લગભગ સર્વસંમતિથી સમર્થન મળ્યું છે.
જ્યારે ટ્રમ્પને પૂછવામાં આવ્યું કે શું કોંગ્રેસ દ્વારા રશિયા પર દબાણ લાવવા માટે લેવાતા આ પગલાંનો સમય આવી ગયો છે? ત્યારે તેમણે સમર્થન આપતા કહ્યું હતું કે, "મેં સાંભળ્યું છે કે તેઓ (કોંગ્રેસ) આ કરી રહ્યા છે, અને તે બિલકુલ યોગ્ય છે." આમ, ટ્રમ્પ હવે રાજદ્વારી વાતચીતને બદલે આર્થિક પ્રતિબંધોના માર્ગે રશિયાને ઘૂંટણીયે પાડવા માંગે છે.
ટોપ સ્ટોરી
ટ્રેન્ડિંગ સમાચાર
