Operation Sindoor: ભારતે છોડી 6 બેલિસ્ટિક મિસાઇલ, PAKના ત્રણ એરબેઝ પાસે થયા વિસ્ફોટ, પાકિસ્તાની સેનાનો દાવો
Operation Sindoor: પાકિસ્તાને શુક્રવાર સાંજથી ભારતના 26 શહેરોમાં ડ્રોન હુમલા કર્યા, જેને ભારતીય સંરક્ષણ પ્રણાલીએ નિષ્ફળ બનાવ્યા. પાકિસ્તાને ભારત પર છ બેલિસ્ટિક મિસાઇલો છોડવાનો આરોપ લગાવ્યો છે.
Operation Sindoor: ઓપરેશન સિંદૂર પછી ભારત અને પાકિસ્તાન વચ્ચે સરહદ પર તણાવ છે. ગુરુવાર પછી, શુક્રવાર મોડી સાંજથી, પાકિસ્તાને ભારતના 26 શહેરોમાં વસ્તીવાળા વિસ્તારોને નિશાન બનાવીને સતત ડ્રોન હુમલા કર્યા, જેને ભારતીય સંરક્ષણ પ્રણાલી દ્વારા સંપૂર્ણપણે નિષ્ફળ બનાવવામાં આવ્યા. આ દરમિયાન, આજતકના એક અહેવાલમાં કહેવામાં આવ્યું છે કે, પાકિસ્તાન સેનાએ દાવો કર્યો છે કે ભારતે છ બેલિસ્ટિક મિસાઇલો છોડી છે. પાકિસ્તાને આને ભારતનું બેજવાબદાર કૃત્ય ગણાવ્યું છે. જે બાદ પાકિસ્તાને એરબેઝ બંધ કરી દીધું અને NOTAM જારી કર્યું. જોકે, ભારત સરકાર દ્વારા હજુ સુધી આ હુમલા અંગે કોઈ પુષ્ટિ કરવામાં આવી નથી.
પાકિસ્તાની સેનાએ શું કહ્યું?
મીડિયા સાથે વાત કરતી વખતે, પાકિસ્તાની સેનાના જનસંપર્ક વિભાગ, ISPR ના ડાયરેક્ટર જનરલ લેફ્ટનન્ટ જનરલ અહેમદ શરીફ ચૌધરીએ જણાવ્યું હતું કે ભારત તરફથી છ બેલિસ્ટિક મિસાઇલો છોડવામાં આવી છે. આ મિસાઇલો ભારત દ્વારા જાલંધરના આદમપુર એરબેઝ પરથી છોડવામાં આવી હતી. જનરલ અહેમદે ભારતના આ પગલાનો વિરોધ કર્યો છે અને તેને બેજવાબદાર અને અત્યંત ખતરનાક ગણાવ્યું છે. જો ભારતનું આ આક્રમક વલણ ચાલુ રહેશે તો પરિસ્થિતિ વધુ તંગ બનશે.
પાકિસ્તાને પોતાનું એરસ્પેસ સંપૂર્ણપણે બંધ કરવાનો નિર્ણય લીધો
ભારત સાથે વધતા તણાવ વચ્ચે, પાકિસ્તાને પોતાનું એરસ્પેસ સંપૂર્ણપણે બંધ કરવાનો નિર્ણય લીધો છે. બપોરે 12 વાગ્યા સુધી બધી ફ્લાઇટ્સ પર પ્રતિબંધ મૂકવામાં આવ્યો છે. રાવલપિંડી અને રફીકી એરબેઝ પર થયેલા વિસ્ફોટો બાદ આ નિર્ણય લેવામાં આવ્યો છે.
પાકિસ્તાની એરબેઝ પર વિસ્ફોટ
પાકિસ્તાને આરોપ લગાવ્યો છે કે ભારતે ત્રણ એરબેઝ પર હુમલો કર્યો છે. રાવલપિંડી, ઇસ્લામાબાદ અને લાહોરમાં અનેક મોટા વિસ્ફોટોના અહેવાલો આવ્યા હતા, જેના પડઘા દૂર દૂર સુધી અનુભવાયા હતા, જેના કારણે લોકોમાં ગભરાટ ફેલાયો હતો અને તેઓ પોતાના ઘરની બહાર નીકળી આવ્યા હતા. પાકિસ્તાનના રાવલપિંડીમાં નૂર ખાન એરબેઝ પાસે વિસ્ફોટ થયો છે. પંજાબ પ્રાંતના શોરકોટના ઝંગમાં રફીકી એરબેઝ પાસે વિસ્ફોટ થયો છે. ચકવાલમાં મુરીદ બેઝ પાસે વિસ્ફોટ થયાના પણ સમાચાર છે.
પાકિસ્તાને 26 સ્થળો પર કર્યો ડ્રોન હુમલો
પાકિસ્તાને ફરી એકવાર શુક્રવારે (9 મે, 2025) સિવિલ એરલાઇનના આડમાં ભારતના ઘણા વિસ્તારોમાં ડ્રોન હુમલો કરવાનો નિષ્ફળ પ્રયાસ કર્યો હતો. પાકિસ્તાને જમ્મુ-કાશ્મીરના બારામુલ્લાથી ભુજ સુધીના 26 સ્થળોએ ડ્રોનથી હુમલો કરવાનો નિષ્ફળ પ્રયાસ કર્યો હતો. આમાં શંકાસ્પદ સશસ્ત્ર ડ્રોનનો સમાવેશ થાય છે જે નાગરિક અને લશ્કરી લક્ષ્યો માટે સંભવિત ખતરો હતા. ભારતીય એર ડિફેન્સ સિસ્ટમે ફરી એકવાર પાકિસ્તાનના ઇરાદાઓને નિષ્ફળ બનાવ્યા હતા.
ટોપ સ્ટોરી
ટ્રેન્ડિંગ સમાચાર
