Russia-Ukraine War: રશિયા સાથે યુદ્ધ વચ્ચે રાષ્ટ્રપતિ ઝેલેંસ્કીનું મોટું નિવેદન- નાટોમાં સામેલ નહી થાય યૂક્રેન

રશિયા સાથે ચાલી રહેલા  યુદ્ધ વચ્ચે યુક્રેનના રાષ્ટ્રપતિ ઝેલેન્સકી દ્વારા મોટું નિવેદન આપવામાં આવ્યું છે. ઝેલેન્સકીએ કહ્યું છે કે યુક્રેન નાટોમાં જોડાશે નહીં.

રશિયા સાથે ચાલી રહેલા  યુદ્ધ વચ્ચે યુક્રેનના રાષ્ટ્રપતિ ઝેલેન્સકી દ્વારા મોટું નિવેદન આપવામાં આવ્યું છે. ઝેલેન્સકીએ કહ્યું છે કે યુક્રેન નાટોમાં જોડાશે નહીં. રશિયાની ન્યૂઝ એજન્સી અનુસાર, ઝેલેન્સકીનું કહેવું છે કે યૂક્રેનને એ હકીકત સ્વીકારવી જોઈએ કે તે નાટોમાં સામેલ નહીં થાય.

બીજી તરફ યૂક્રેન અને રશિયાની વાતચીતનો બીજો રાઉન્ડ યોજવાની યોજનાએ રાજદ્વારી વાટાઘાટોનો માર્ગ ખોલ્યો છે. તે જ સમયે, રશિયન સેના યુક્રેનના ઘણા શહેરો પર હુમલો કરવાનું ચાલુ રાખે છે, જેના કારણે માનવીય સંકટ વધુ ઘેરાયું છે. મંગળવારે સૂર્યોદય થવાના થોડા સમય પહેલા, કિવ મોટા વિસ્ફોટોથી હચમચી ગયું હતું અને રશિયાએ ઘણા મોરચે તેની આગેવાની લીધી હતી. બીજી તરફ, રશિયન સૈન્ય દ્વારા ઘેરાયેલા મારિયુપોલ શહેરમાંથી 160 નાગરિક કારનો કાફલો નિયુક્ત કરવામાં આવેલા કોરિડોરમાંથી રવાના થયો.

બંને દેશો વચ્ચે નવી વાતચીત વીડિયો કોન્ફરન્સ દ્વારા થઈ છે અને ઉચ્ચ સ્તરીય અધિકારીઓ વચ્ચેની વાતચીતનો આ ચોથો રાઉન્ડ છે. તાજેતરમાં, યુક્રેનના રાષ્ટ્રપતિએ રશિયન નેતાઓને કહ્યું છે કે યુક્રેન પર તેમના દેશનો હુમલો ઉલટો પડશે અને આર્થિક પ્રતિબંધોને કારણે તેમના લોકો તેમને નફરત કરશે.  ઝેલેન્સકીએ એક વિડિયોમાં કહ્યું હતું, "યુદ્ધ અપરાધમાં તમારી સંડોવણી બદલ આપ પર (રશિયનો) પર ચોક્કસપણે કાર્યવાહી કરવામાં આવશે."

યુક્રેનના નેતાએ કહ્યું કે હુમલાને કારણે પશ્ચિમે રશિયા પર સખત આર્થિક પ્રતિબંધો લાદ્યા છે, જેના પરિણામો તમામ રશિયન લોકો ભોગવશે. તેમણે કહ્યું કે રશિયાના નાગરિકો રશિયાના નેતાઓને નફરત કરશે, જેમને તેઓ ઘણા વર્ષોથી રોજેરોજ ઠગી  રહ્યા છે. 

યુક્રેન અને રશિયા વચ્ચે ચાલી રહેલા યુદ્ધે છેલ્લા 20 દિવસમાં યુક્રેનને તબાહ કરી નાખ્યું છે. મોટા ભાગના મોટા શહેરો નાશ પામ્યા છે, લોકો તેમના પરિવાર સાથે દેશ છોડી રહ્યા છે. રશિયા કે યુક્રેન બંને પીછેહઠ કરવા તૈયાર નથી. અનેક વખત મંત્રણા  થયા બાદ પણ કોઈ ઉકેલ મળી રહ્યો નથી. સોમવારે બંને દેશો વચ્ચે ચાલી રહેલી ચોથા રાઉન્ડની વાતચીત અચાનક બંધ થઈ ગઈ હતી. આજે પણ ચોથા રાઉન્ડની વાતચીત ચાલુ રહેશે. વાટાઘાટો વચ્ચે પણ તબાહી ચાલુ છે. આ દરમિયાન યુક્રેનના કિવમાં ત્રણ શક્તિશાળી ધડાકા થયા છે.