વિશ્વના આ દેશો પર છે સૌથી વધુ દેવું: ગરીબ નહીં પણ અમીર દેશ માથે છે $36 ટ્રિલિયનનું કરજ
world most indebted country: વિશ્વની મહાસત્તા ગણાતા અમેરિકાની આર્થિક સ્થિતિ દેવાની બાબતમાં ચિંતાજનક સ્તરે છે.
world most indebted country: સામાન્ય રીતે જ્યારે પણ 'દેવાદાર દેશ' (Debtor Country) ની વાત આવે છે, ત્યારે આપણી નજર પાકિસ્તાન કે સુદાન જેવા ગરીબ દેશો તરફ જાય છે. પરંતુ વાસ્તવિકતા જાણીને તમને આંચકો લાગશે. ગ્લોબલ ડેટ ડેટા 2025 ના રિપોર્ટ અનુસાર, વિશ્વનું સૌથી મોટું અને શક્તિશાળી અર્થતંત્ર ધરાવતું અમેરિકા (USA) જ દુનિયાનો સૌથી વધુ દેવાદાર દેશ છે. અમેરિકા પર એટલું જંગી દેવું છે કે જેનો આંકડો કલ્પના બહાર છે.
સુપરપાવર અમેરિકા માથે $36 ટ્રિલિયનનું દેવું
વિશ્વની મહાસત્તા ગણાતા અમેરિકાની આર્થિક સ્થિતિ દેવાની બાબતમાં ચિંતાજનક સ્તરે છે. વર્ષ 2025 સુધીમાં અમેરિકાનું કુલ રાષ્ટ્રીય દેવું (National Debt) $36 ટ્રિલિયન (Trillion) ને પાર કરી ગયું છે. આ આંકડા સાથે તે વૈશ્વિક સ્તરે સૌથી વધુ દેવું ધરાવતો દેશ બની ગયો છે. જોકે, આટલું મોટું દેવું હોવા છતાં અમેરિકા હજુ પણ વિશ્વનું સૌથી મોટું અર્થતંત્ર (Economy) છે. ત્યાંનો 'ડેબ્ટ-ટુ-જીડીપી રેશિયો' (Debt-to-GDP Ratio) આશરે 123% થી 125% ની વચ્ચે છે. જોકે, ડોલરની તાકાત અને મજબૂત સંસ્થાઓને કારણે અમેરિકા આ દેવું મેનેજ કરી રહ્યું છે.
જાપાનની સ્થિતિ અમેરિકા કરતા અલગ
જો કુલ રકમની વાત કરીએ તો અમેરિકા નંબર 1 પર છે, પરંતુ જો જીડીપી (GDP) ની સરખામણીએ દેવાનો રેશિયો જોઈએ તો જાપાન (Japan) સૌથી આગળ છે. જાપાનનો દેવા-થી-જીડીપી રેશિયો 230% થી પણ વધુ છે. જોકે, જાપાન માટે રાહતની વાત એ છે કે તેનું મોટાભાગનું દેવું તેના પોતાના નાગરિકો અને સ્થાનિક બેંકો પાસે જ છે, વિદેશી સંસ્થાઓ પાસે નહીં.
સિંગાપોર અને સુદાન: અમીર અને ગરીબ વચ્ચેનો તફાવત
વધુ દેવું હોવું એ હંમેશા ગરીબીની નિશાની નથી હોતી. ઉદાહરણ તરીકે, સિંગાપોર (Singapore) જેવા સમૃદ્ધ દેશનો દેવા-થી-જીડીપી રેશિયો લગભગ 175% છે, છતાં તે આર્થિક રીતે સધ્ધર છે. બીજી તરફ, સુદાન (Sudan) જેવા ગરીબ દેશનો રેશિયો 250% થી વધુ છે, પરંતુ ત્યાં મજબૂત આવક વ્યવસ્થા અને રોકાણકારોના વિશ્વાસનો અભાવ હોવાથી તે ગંભીર આર્થિક સંકટ (Economic Crisis) નો સામનો કરી રહ્યો છે.
અમીર દેશો પર કેમ હોય છે વધુ દેવું?
તમને પ્રશ્ન થશે કે અમીર દેશો આટલું બધું ઉધાર કેમ લે છે? તેનું મુખ્ય કારણ 'રોકાણકારોનો વિશ્વાસ' (Investor Confidence) છે. અમેરિકા અને જાપાન જેવા દેશોનું ક્રેડિટ રેટિંગ મજબૂત હોય છે અને ત્યાંની સરકારો સ્થિર હોય છે. વૈશ્વિક રોકાણકારોને ખાતરી હોય છે કે આ દેશો તેમના પૈસા પાછા ચૂકવી શકશે. તેથી, આ દેશો બજારમાંથી સરળતાથી નાણાં એકત્ર કરી શકે છે, જે સુવિધા ગરીબ દેશોને મળતી નથી.
ટોપ સ્ટોરી
ટ્રેન્ડિંગ સમાચાર
