Video: પાકિસ્તાની યુવકે ચાલુ ફ્લાઈટે બારીનો કાચ તોડવાનો પ્રયત્ન કર્યો, યાત્રીઓના શ્વાસ થંભી ગયા

હાલમાં જ એક કિસ્સો સામે આવ્યો છે જ્યાં પાકિસ્તાનના પેશાવર થી દુબઈ જતી એક ફ્લાઈટમાં યુવકે એવી હરકત કરી કે બાકીના બધા યાત્રીઓના જીવ તાળવે ચોંટી ગયા હતા.

વીડિયોમાંથી લીધેલ દ્રશ્ય

Pakistani man kicks Fligh window Glass: વિમાન આકાશમાં હોય ત્યારે ઘણા પ્રકારની કુદરતી મુશ્કેલીઓ સર્જાતી હોય છે. પરંતુ હાલમાં જ એક કિસ્સો સામે આવ્યો છે જ્યાં પાકિસ્તાનના પેશાવર થી દુબઈ જતી એક ફ્લાઈટમાં યુવકે એવી હરકત કરી કે બાકીના બધા યાત્રીઓના જીવ તાળવે ચોંટી ગયા હતા. આ પાકિસ્તાની યુવકે ઉડી રહેલી ફ્લાઈટની બારીનો કાચ તોડવાનો પ્રયત્ન કર્યો હતો. આ સમગ્ર ઘટનાનો વીડિયો પણ સામે આવ્યો છે.

યુવકની હવાઈ મુસાફરી પર પ્રતિબંધઃ

પેશાવરથી દુબઈ જઈ રહેલા આ પાકિસ્તાની યુવકે કરેલા આ કાંડની તેને સજા પણ ભોગવવી પડી છે અને તેને બીજા દિવસે પાકિસ્તાન પરત મોકલી દેવામાં આવ્યો છે. આ સાથે આ યુવકની હવાઈ મુસાફરી પર પણ પ્રતિબંધ લગાવી દેવામાં આવ્યો છે. કહેવામાં આવી રહ્યું છે કે, પ્લેનની બારીનો કાચ તોડવાનો પ્રયત્ન કરનાર આ પાકિસ્તાની યુવકની માનસિક સ્થિતિ બિલકુલ સારી નહોતી.

યુવકે એક મુસાફર ઉપર હુમલો પણ કર્યોઃ

પ્લેનમાં હંગામો મચાવનાર વ્યક્તિ વિશે એવું કહેવામાં આવી રહ્યું છે કે ફ્લાઈટ ટેકઓફ થતાં જ આ યુવકે પોતાના રંગ બતાવાનું શરૂ કરી દીધું હતું. જ્યારે પ્લેનના સ્ટાફ મેમ્બર્સે રોકવાનો પ્રયાસ કર્યો તો તે ગુસ્સે થઈ ગયો અને પ્લેનમાં તોડફોડ શરૂ કરી હતી. આ યુવક આટલેથી રોકાયો નહોતો અને તેણે પ્લેનની બારી પર પણ હુમલો કરીને તેને તોડવાનો પ્રયત્ન કર્યો હતો. આ સાથે તેણે પ્લેનમાં સવાર બીજા એક મુસાફર ઉપર હુમલો પણ કર્યો હતો. મળતી માહિતી મુજબ આ બનાવ પેશાવરથી દુબઈ જતી PK-283 ફ્લાઈટમાં બન્યો હતો.

On #camera: Pakistan man kicks window, argues with officials on Peshawar-Dubai flight; blacklisted by airlines#Pakistan #PIA #Dubai #PakFlight #Uproar pic.twitter.com/TFdKCTdpPX

— Harish Deshmukh (@DeshmukhHarish9) September 19, 2022

જ્યારે પ્લેનના સમગ્ર ક્રૂ અને મુસાફરો આ વ્યક્તિથી નારાજ થઈ ગયા, ત્યારે તેઓએ બળજબરીથી તેના હાથમાં હાથકડી પહેરાવીને તેને એક ખૂણામાં બેસાડી દીધો હતો. ત્યારબાદ દુબઈ પહોંચતાની સાથે જ એરપોર્ટ પર તેની ધરપકડ કરવામાં આવી હતી, ત્યારબાદ તેના તમામ દસ્તાવેજો રદ કરીને બીજા દિવસે તેને પાકિસ્તાન પરત મોકલી દેવામાં આવ્યો હતો.