ફિટમેન્ટ ફેક્ટરનો જાદુ: 8માં પગાર પંચથી કર્મચારીઓના પગારમાં થશે બમ્પર વધારો!

8th pay commission: કેન્દ્ર સરકારે ટૂંક સમયમાં જ 8મું પગાર પંચ લાગુ કરવાની જાહેરાત કરી છે, જેનાથી દેશના લાખો સરકારી કર્મચારીઓ અને પેન્શનરોને મોટો ફાયદો થશે.

અંદાજે 50 લાખ કેન્દ્રીય કર્મચારીઓ અને 65 લાખ પેન્શનરોના પગાર અને પેન્શનમાં વધારો થવાની સંભાવના છે. આ પગાર પંચ 1 જાન્યુઆરી, 2026થી અમલમાં આવે તેવી શક્યતા છે.

સરકારે 17 જાન્યુઆરી, 2025ના રોજ 8મા પગાર પંચની રચનાની જાહેરાત કરી હતી, અને એપ્રિલ 2025 સુધીમાં તેની રચના પ્રક્રિયા પૂર્ણ થવાની ધારણા છે. જો કે, કેટલાક અહેવાલો અમલીકરણમાં થોડો વિલંબ થવાની પણ શક્યતા દર્શાવે છે. પરંતુ મોટાભાગે, 1 જાન્યુઆરી 2026 થી આ પંચ અમલમાં આવી જશે, જે 7મા પગાર પંચની મુદત પૂર્ણ થયા બાદ લાગુ થશે.

સૌથી મહત્વની બાબત ફિટમેન્ટ ફેક્ટર છે, જે પગારમાં કેટલો વધારો થશે તે નક્કી કરે છે. 7મા પગાર પંચમાં ફિટમેન્ટ ફેક્ટર 2.57 હતું, જેના કારણે કર્મચારીઓના પગારમાં સરેરાશ 23.55 ટકાનો વધારો થયો હતો.

મીડિયા રિપોર્ટ્સ અનુસાર, 8મા પગાર પંચમાં ફિટમેન્ટ ફેક્ટર 2.28 થી 2.86 ની વચ્ચે રહી શકે છે. જો ફિટમેન્ટ ફેક્ટર 2.86 નક્કી થાય છે, તો કર્મચારીઓના પગારમાં 40 થી 50 ટકા સુધીનો જંગી વધારો થઈ શકે છે.

ફિટમેન્ટ ફેક્ટર 2.86ના આધારે ગણતરી કરીએ તો, કર્મચારીઓનો લઘુત્તમ મૂળભૂત પગાર આશરે 51,480 રૂપિયા સુધી પહોંચી શકે છે. આ પગાર વધારાથી કર્મચારીઓની આર્થિક સ્થિતિમાં નોંધપાત્ર સુધારો થશે. માત્ર પગાર જ નહીં, પેન્શનરોને પણ પેન્શનમાં વધારાનો લાભ મળશે, જે વૃદ્ધાવસ્થામાં તેમને આર્થિક સુરક્ષા પ્રદાન કરશે.

હાલમાં, 8મા પગાર પંચની રચના પ્રક્રિયા ચાલી રહી છે. કમિશનની સ્થાપના માટેનો ડ્રાફ્ટ પ્રસ્તાવ સંરક્ષણ મંત્રાલય, ગૃહ મંત્રાલય અને કર્મચારી અને તાલીમ વિભાગ જેવા વિવિધ મંત્રાલયોને મોકલવામાં આવ્યો છે. આ મંત્રાલયો તરફથી મળેલા પ્રતિસાદ બાદ કમિશનના કાર્યક્ષેત્રને અંતિમ સ્વરૂપ આપવામાં આવશે, અને ત્યારબાદ તેને કેબિનેટની મંજૂરી માટે રજૂ કરવામાં આવશે.