8th Pay Commission: 8મા પગાર પંચમાં કર્મચારીઓને લાગી શકે છે મોટ ઝટકો! ફિટમેન્ટ ફેક્ટર ૨.૮૬ નહીં પણ ઘટીને....

8th Pay Commission: નાણા સચિવ સુભાષ ચંદ્ર ગર્ગનો મત: સરકાર ૧.૯૨ ફિટમેન્ટ ફેક્ટર પર સમાધાન કરી શકે છે; NC JCM ની ૨.૫૭ થી વધુ ફિટમેન્ટ ફેક્ટરની માંગણી.

8th Pay Commission: લઘુત્તમ પગાર વધારાની અપેક્ષા સામે ૭મા અને ૬ઠા પગાર પંચના અનુભવો, આ વખતે મોંઘવારીનો બોજ હળવો થવાની આશા.

8th Pay Commission latest update 2025: કેન્દ્ર સરકારના લાખો કર્મચારીઓ અને પેન્શનરો માટે આશાનું કિરણ લઈને આવી રહેલા ૮મા પગાર પંચ અંગેની ચર્ચાઓ હાલ તેજ બની છે. આ સમયે સૌથી વધુ ચર્ચામાં રહેલો મુદ્દો છે 'ફિટમેન્ટ ફેક્ટર', જેના પર કર્મચારીઓના નવા મૂળ પગારનો આધાર છે. કર્મચારીઓ ૨.૮૬ ના ફિટમેન્ટ ફેક્ટરની આશા રાખી રહ્યા છે, પરંતુ શું તેમની આ માંગણીઓ ખરેખર પૂર્ણ થશે કે પછી તેમની આશાઓ ઠગારી નીવડશે?

'ફિટમેન્ટ ફેક્ટર' એ એક ગુણક છે જેના દ્વારા સરકારી કર્મચારીઓનો નવો મૂળ પગાર નક્કી કરવામાં આવે છે. ૭મા પગાર પંચમાં આ ફેક્ટર ૨.૫૭ હતું, જેના કારણે લઘુત્તમ મૂળ પગાર ૭,૦૦૦ રૂપિયાથી વધીને ૧૮,૦૦૦ રૂપિયા થયો હતો. હવે ૮મા પગાર પંચમાં ફિટમેન્ટ ફેક્ટર વધારીને ૨.૮૬ કરી શકાય તેવી અટકળો ચાલી રહી છે, જે કર્મચારીઓમાં ઉત્સાહ જગાવી રહી છે.

કર્મચારીઓની માંગણીઓ શું છે? નેશનલ કાઉન્સિલ જોઈન્ટ કન્સલ્ટેટિવ મશીનરી (NC JCM), જે કેન્દ્ર સરકારના કર્મચારીઓ વતી સરકાર સાથે વાટાઘાટો કરે છે, તેના કર્મચારી પક્ષે આ વખતે ૨.૫૭ થી વધુ ફિટમેન્ટ ફેક્ટરની માંગણી કરી છે. NC JCM એ આ વર્ષે ફેબ્રુઆરીમાં ૧૫ જેટલી માંગણીઓ રજૂ કરી હતી. આ માંગણીઓમાં પગાર, ભથ્થાં, પેન્શન અને નિવૃત્તિ લાભોની તપાસ અને તેમાં ફેરફારનો સમાવેશ થાય છે, જેમાં ઔદ્યોગિક અને બિન-ઔદ્યોગિક કર્મચારીઓ, અખિલ ભારતીય સેવાઓ, સંરક્ષણ અને અર્ધલશ્કરી દળો, ગ્રામીણ ડાક સેવકો અને અન્ય શ્રેણીઓના કર્મચારીઓનો સમાવેશ થાય છે.

શું માંગણીઓ સંતોષાશે? નિષ્ણાતોનો શું મત છે? જોકે, પગાર પંચ દ્વારા આ બધી માંગણીઓ પૂરી કરવામાં આવે તેવી શક્યતા ખૂબ જ ઓછી દેખાઈ રહી છે. અહેવાલો અનુસાર, ભૂતપૂર્વ નાણા સચિવ સુભાષ ચંદ્ર ગર્ગ પણ માને છે કે સરકાર કર્મચારીઓના પગારમાં ફેરફાર માટે ૧.૯૨ ના ફિટમેન્ટ ફેક્ટર સાથે સમાધાન કરી શકે છે. આનો સીધો અર્થ એ થાય છે કે ૮મા પગાર પંચમાં ફિટમેન્ટ ફેક્ટર વધીને ૨.૮૬ થવાની આશા ઓછી છે.

પહેલાના પગાર પંચોમાં શું થયું હતું? ભૂતકાળના પગાર પંચોના અનુભવો પણ આ આશાવાદને ઓછો કરે છે. ૭મું પગાર પંચ (૨૦૧૫): કર્મચારી પક્ષે લઘુત્તમ પગાર ૨૬,૦૦૦ રૂપિયા કરવાની પ્રબળ માંગ કરી હતી (જે તે સમયે ૭,૦૦૦ રૂપિયાના મૂળ પગાર કરતાં લગભગ ૩.૭ ગણું વધારે હતું). જોકે, કમિશને આ માંગણી સંપૂર્ણપણે સ્વીકારી નહોતી. એક્રોઇડ ફોર્મ્યુલાના આધારે લઘુત્તમ મૂળ પગાર ૧૮,૦૦૦ રૂપિયા અને ફિટમેન્ટ ફેક્ટર ૨.૫૭ નક્કી કરવામાં આવ્યો હતો.

૬ઠ્ઠું પગાર પંચ: કર્મચારી પક્ષે લઘુત્તમ મૂળ પગાર ૧૦,૦૦૦ રૂપિયા કરવાની માંગ કરી હતી. કમિશને આ માંગણીને પણ ફગાવી દીધી અને લઘુત્તમ મૂળ પગાર ૫,૪૭૯ રૂપિયા નક્કી કર્યો, જોકે બાદમાં તેમાં થોડો વધારો કરીને ૬,૬૦૦ રૂપિયા અને પછી ૭,૦૦૦ રૂપિયા કરવામાં આવ્યા.

આ વખતે શું અપેક્ષા રાખી શકાય? હાલમાં દેશમાં મોંઘવારીનો બોજ ખૂબ વધારે છે, જેની સીધી અસર કર્મચારીઓના ખિસ્સા પર પડી રહી છે. કર્મચારી પક્ષની માંગ છે કે ઓછામાં ઓછું આ વખતે, સરકારે દેશની વર્તમાન આર્થિક વાસ્તવિકતાને ધ્યાનમાં રાખીને પગાર અને પેન્શનમાં યોગ્ય વધારો કરવો જોઈએ. જોકે, છેલ્લા બે પગાર પંચોએ કર્મચારીઓની અપેક્ષાઓ કરતાં ઓછી ભલામણો કરી હતી, તેમ છતાં આ વખતે કેન્દ્ર સરકારના વર્તમાન અને નિવૃત્ત કર્મચારીઓને આશા છે કે તેમને થોડી રાહત મળશે.