ઉજ્જવલા યોજનામાં મળતું LPG સિલિન્ડર આટલું મોઘું થયું, જાણો કઈ મહિલાઓને લાગશે ફટકો

LPG gas price hike: સરકારે LPG સિલિન્ડરના ભાવમાં ₹૫૦નો વધારો કર્યો, ઉજ્જવલા લાભાર્થીઓને હવે ₹૫૫૦માં મળશે સિલિન્ડર, સામાન્ય ગ્રાહકો માટે કિંમત ₹૮૫૩.

LPG cylinder new price: મોંઘવારીએ ફરી એકવાર સામાન્ય માણસની કમર તોડી નાખી છે. સરકારે આજે એલપીજી ગેસ સિલિન્ડરના ભાવમાં મોટો વધારો કર્યો છે. સિલિન્ડરની કિંમતમાં સીધો ₹૫૦નો વધારો કરવામાં આવ્યો છે, જેની અસર પ્રધાનમંત્રી ઉજ્જવલા યોજના હેઠળ મળતા સિલિન્ડર પર પણ પડશે. કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીએ આ અંગે માહિતી આપી હતી.

સરકાર દ્વારા જાહેર કરવામાં આવેલા નોટિફિકેશન મુજબ, આ નવી કિંમતો આવતીકાલ એટલે કે ૮મી એપ્રિલથી લાગુ થશે. આ વધેલી કિંમતો સામાન્ય અને સબસિડી એમ બંને શ્રેણીના ગ્રાહકો માટે લાગુ પડશે. આ પહેલા સરકારે પેટ્રોલ અને ડીઝલ પરની એક્સાઈઝ ડ્યુટીમાં પણ વધારો કર્યો હતો અને હવે ગેસના ભાવ વધવાથી સામાન્ય જનતા પર વધુ બોજ પડશે.

વધેલી કિંમતો અંગે કેન્દ્રીય પેટ્રોલિયમ અને પ્રાકૃતિક ગેસ મંત્રી હરદીપ સિંહ પુરીએ જણાવ્યું હતું કે એલપીજી સિલિન્ડરની કિંમતમાં ₹૫૦નો વધારો કરવામાં આવ્યો છે.