ટ્રમ્પના કડક ઇમિગ્રેશન નિર્ણયોથી અમેરિકામાં ભડકો: લોસ એન્જલસમાં હિંસક વિરોધ, પોલીસે છોડ્યા ટીયર ગેસના શેલ!

ગવર્નર ગેવિન ન્યુસોમે સેનાની હાજરીને ઉશ્કેરણીજનક ગણાવી, જ્યારે ટ્રમ્પે ડેમોક્રેટ નેતાઓની નિષ્ફળતાને જવાબદાર ઠેરવી.

Los Angeles protest news: અમેરિકન રાષ્ટ્રપતિ ડોનાલ્ડ ટ્રમ્પ દ્વારા ઇમિગ્રેશન કાયદાઓ પર લેવાયેલા કડક નિર્ણયો સામે લોસ એન્જલસ શહેર આક્રોશની આગમાં સળગી રહ્યું છે. શુક્રવારે ફેડરલ અધિકારીઓ દ્વારા ૪૪ ઇમિગ્રન્ટ્સની અટકાયત કરવામાં આવતા સમગ્ર લોસ એન્જલસમાં વ્યાપક વિરોધ પ્રદર્શનો શરૂ થયા છે, જેણે હિંસક સ્વરૂપ ધારણ કર્યું છે.

ટ્રમ્પ વહીવટીતંત્રે આ પરિસ્થિતિને કાબુમાં લેવા માટે નેશનલ ગાર્ડ તૈનાત કર્યા હતા, જેને કેલિફોર્નિયાના ગવર્નર ગેવિન ન્યુસોમે રાજ્યની સાર્વભૌમત્વનું ઉલ્લંઘન ગણાવ્યું હતું. નેશનલ ગાર્ડની તૈનાતી પછી, હોબાળો વધુ વધ્યો અને હજારો વિરોધીઓ રસ્તાઓ પર ઉતરી આવ્યા.

નેશનલ હાઇવે ૧૦૧ બ્લોક કરવામાં આવ્યો હતો. ડઝનબંધ વાહનો આગમાં લપેટાઈ ગયા હતા. વાયરલ થયેલા વીડિયોમાં, વિરોધીઓ અમેરિકન ધ્વજ સળગાવતા અને કેટલાક લોકો એક જ ધ્વજ પર થૂંકીને પોતાનો ગુસ્સો વ્યક્ત કરતા જોવા મળ્યા હતા. આ દરમિયાન સોવિયેત યુનિયન અને મેક્સિકોના ધ્વજ પણ પ્રદર્શનોમાં જોવા મળ્યા હતા.