કોરોનાના કારણે આ દેશનું ક્રિકેટ બોર્ડ થયું કંગાળ, ખર્ચો ઓછો કરવા હવે કાપશે બધાના પગાર, જાણો વિગતે

ઇસીબીએ 18 ફર્સ્ટ ક્લાસ કાઉન્ટી અને કાઉન્ટી બોર્ડની સાથે બુધવારે બેઠક કરી, આ બેઠકમાં ઇસીબીએ જણાવ્યુ કે તેને હાલના નાણાંકીય વર્ષમાં ઓછામાં ઓછુ 10 કરોડ 60 લાખ પાઉન્ડના નુકશાનની આશંકા છે

નવી દિલ્હીઃ કોરોના વાયરસના કારણે છેલ્લા પાંચ મહિનાઓથી ક્રિકેટ બંધ છે, મહામારીના કારણે ક્રિકેટના જનક ઇંગ્લેન્ડને મોટુ નુકશાન પહોંચ્યુ છે. ઇંગ્લેન્ડ ક્રિકેટ બોર્ડ હાલ મંદીમાં ફસાઇ ગયુ છે, બોર્ડ કંગાળ પરિસ્થિતિમાંથી પસાર થઇ રહ્યું છે. ઇંગ્લેન્ડ એન્ડ વેલ્સ ક્રિકેટ બોર્ડે કૉવિડ-19ના કારણે 18 કરોડ 20 લાખ પાઉન્ડનુ નુકશાન પહોંચ્યુ છે. આ નુકશાનને ઓછુ કરવા હવે ઇસીબી ખર્ચામાં કાપ સહિતના કેટલાક મોટા મોટા પગલા ભરવાની તૈયારી કરી રહ્યું છે. ઇસીબીએ 18 ફર્સ્ટ ક્લાસ કાઉન્ટી અને કાઉન્ટી બોર્ડની સાથે બુધવારે બેઠક કરી, આ બેઠકમાં ઇસીબીએ જણાવ્યુ કે તેને હાલના નાણાંકીય વર્ષમાં ઓછામાં ઓછુ 10 કરોડ 60 લાખ પાઉન્ડના નુકશાનની આશંકા છે. ધ ગાર્ડિયનના રિપોર્ટ પ્રમાણે, આ આંકડાં અનુસાર, માનવામાં આવી રહ્યુ છે કે ઇન્ટરનેશનલ ક્રિકેટના બાકી સત્રના બાયૉ સિક્યૉર માહોલમાં આયોજન થશે. જેમાં પાકિસ્તાન પ્રવાસ અને સપ્ટેમ્બરમાં ઓસ્ટ્રેલિયા ટીમનો છ મેચો માટે લિમીટેડ ઓવરોનો ક્રિકેટનો પ્રવાસ સામેલ છે.

રિપોર્ટમાં દાવો કરવામાં આવ્યો છે કે જો આ નક્કી થયેલા પ્રવાસોમાં કોઇ મેચ રદ્દ થાય છે કે પછી ઇસીબી આગામી વર્ષે ભારત, પાકિસ્તાન અને શ્રીલંકા પ્રવાસ દરમિયાન ટિકીટ વેચવામાં નિષ્ફળ રહે છે, તો નુકશાન 7 કરોડ 60 લાખ પાઉન્ડ સુધી વધી શકે છે. સમાચાર પત્રએ સુત્રના હવાલથી કહ્યું કે, ઇસીબી પોતાના સ્ટાફમાં 25 ટકા સુધીની કમી કરી શકે છે. કોરોના વાયરસ મહામારી ફેલાયા પહેલા ઇસીબીમાં 379 કર્મચારી હતા. ઉલ્લેખનીય છે કે કોરોના વાયરસની વચ્ચે ઇંગ્લેન્ડે જુલાઇમાં ઇન્ટરનેશનલ ક્રિકેટમાં વાપસી કરી લીધી છે.