Hardik Pandya Record: હાર્દિક પંડ્યાએ રચ્યો ઈતિહાસ! T20માં 100 વિકેટ લઈને બનાવ્યો વર્લ્ડ રેકોર્ડ
Hardik Pandya T20I record: દક્ષિણ આફ્રિકા સામે 'વિકેટની સદી' પૂરી કરી: બુમરાહ અને અર્શદીપની ક્લબમાં એન્ટ્રી, શાકિબ અને નબી જેવા સ્પિનર્સની બરાબરી કરી.
ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યાએ દક્ષિણ આફ્રિકા સામેની મેચમાં એક જબરદસ્ત વિશ્વ રેકોર્ડ પોતાના નામે કર્યો છે. પોતાની ઘાતક બોલિંગ અને આક્રમક બેટિંગ માટે જાણીતા પંડ્યાએ આંતરરાષ્ટ્રીય T20 ક્રિકેટમાં એક અનોખી સિદ્ધિ મેળવી છે. તે વિશ્વનો એકમાત્ર એવો 'ફાસ્ટ બોલિંગ ઓલરાઉન્ડર' બની ગયો છે, જેના નામે T20 ઇન્ટરનેશનલમાં 1000 થી વધુ રન અને 100 વિકેટ નોંધાયેલી હોય. આ પરાક્રમ સાથે તેણે ક્રિકેટ જગતના દિગ્ગજોને પણ પાછળ છોડી દીધા છે.
Hardik Pandya T20I record: આ ઐતિહાસિક ક્ષણ ત્યારે આવી જ્યારે હાર્દિક પંડ્યાએ દક્ષિણ આફ્રિકા સામેની બીજી T20 મેચમાં બેટ્સમેન ટ્રિસ્ટન સ્ટબ્સને આઉટ કર્યો. આ મેચ પહેલા હાર્દિકના નામે 99 વિકેટ હતી. સ્ટબ્સની વિકેટ લેતાની સાથે જ તેણે T20 ફોર્મેટમાં વિકેટની સદી પૂરી કરી લીધી હતી. આ સાથે જ તે ભારત માટે આ ફોર્મેટમાં 100 વિકેટ ઝડપનારો ત્રીજો બોલર બની ગયો છે. તેની પહેલા માત્ર અર્શદીપ સિંહ અને જસપ્રીત બુમરાહ જ આ જાદુઈ આંકડા સુધી પહોંચી શક્યા હતા.
હાર્દિક પંડ્યાની આ સિદ્ધિ એટલા માટે ખાસ છે કારણ કે અત્યાર સુધી ક્રિકેટ ઈતિહાસમાં કોઈ પણ ફાસ્ટ બોલિંગ ઓલરાઉન્ડર આંતરરાષ્ટ્રીય T20માં 1000 રન અને 100 વિકેટનું ડબલ કરી શક્યો ન હતો. આ પહેલા જે ખેલાડીઓએ આ સિદ્ધિ મેળવી છે તે તમામ સ્પિનર્સ છે. બાંગ્લાદેશના શાકિબ અલ હસન, અફઘાનિસ્તાનના મોહમ્મદ નબી અને ઝિમ્બાબ્વેના સિકંદર રઝા આ યાદીમાં સામેલ છે, પરંતુ પેસર (ફાસ્ટ બોલર) તરીકે હાર્દિકે પહેલીવાર આ કીર્તિમાન સ્થાપિત કર્યો છે.
હાર્દિક પંડ્યાના આંકડાઓ પર નજર કરીએ તો, તે માત્ર બોલિંગમાં જ નહીં પરંતુ બેટિંગમાં પણ ટીમ ઈન્ડિયાની કરોડરજ્જુ સમાન છે. તેણે અત્યાર સુધીની T20 કારકિર્દીમાં 1939 રન બનાવ્યા છે અને હવે તેના નામે 100 વિકેટ પણ બોલે છે. આ ઓલરાઉન્ડ પ્રદર્શન તેને વિશ્વના સર્વશ્રેષ્ઠ ખેલાડીઓની હરોળમાં મૂકે છે. ટીમ ઈન્ડિયાના સંતુલન માટે હાર્દિકનું આ ફોર્મમાં હોવું અત્યંત મહત્વનું સાબિત થઈ રહ્યું છે.
ભારત તરફથી T20 ઇન્ટરનેશનલમાં સૌથી વધુ વિકેટ લેવાની રેસમાં પણ હાર્દિક પંડ્યા હવે ટોચના સ્થાને પહોંચી ગયો છે. હાલમાં ભારતીય બોલરોમાં અર્શદીપ સિંહ 108 વિકેટ સાથે સૌથી આગળ છે, જ્યારે અનુભવી ફાસ્ટ બોલર જસપ્રીત બુમરાહના નામે 101 વિકેટ છે. હાર્દિક પંડ્યા હવે આ એલિટ લિસ્ટમાં સામેલ થનારો ત્રીજો ભારતીય બની ગયો છે, જે ભારતીય ક્રિકેટના ઉજ્જવળ ભવિષ્યનો સંકેત આપે છે.
હાર્દિક પંડ્યાની આ સફર ઘણી ઉતાર-ચઢાવ વાળી રહી છે, પરંતુ ઈજામાંથી પરત ફર્યા બાદ તેણે જે રીતે પ્રદર્શન કર્યું છે તે કાબિલેદાદ છે. એક સમયે તેની ફિટનેસ પર સવાલો ઉઠતા હતા, પરંતુ તેણે બોલ અને બેટ બંનેથી ટીકાકારોને જડબાતોડ જવાબ આપ્યો છે. આગામી સમયમાં મોટી ટુર્નામેન્ટ્સ આવી રહી છે ત્યારે હાર્દિકનું આ ઓલરાઉન્ડ પ્રદર્શન ટીમ ઈન્ડિયા માટે 'ટ્રમ્પ કાર્ડ' સાબિત થઈ શકે છે. ક્રિકેટ ચાહકો હવે તેના બેટ અને બોલથી વધુ નવા રેકોર્ડ્સની અપેક્ષા રાખી રહ્યા છે.
ટોપ સ્ટોરી
ટ્રેન્ડિંગ સમાચાર
