ટેસ્ટની બંને ઈનિંગ્સમા સદી છતાં આ ઓસ્ટ્રેલિયનને હવે પછીની ટેસ્ટમાં ટીમમાં જગા નહીં મળે, શું કહ્યું આ ખેલાડીએ ?

પ્રથમ ઈનિંગમાં વિશાલ સ્કોર ખડકીને 121 રનની સરસાઈ મેળવ્યા બાદ બીજી ઈનિંગમાં બેટીંગ કરતાં ઓસ્ટ્રેલિયાના ટોપ ઓર્ડરનો ધબડકો થયો હતો

સીડનીઃ અઢી વર્ષ બાદ ઓસ્ટ્રેલિયન ટેસ્ટ ટીમમાં પાછા ફરેલા ઉસ્માન ખ્વાજાએ સીડની ટેસ્ટની બંને ઈનિંગ્સમાં સદી ફટકારીને ઈતિહાસ રચ્યો છે. ખ્વાજાએ પ્રથમ ઈનિંગમાં 137 રન ફટકાર્યા  બાદ બીજી ઈનિંગમાં પણ સદી ફટકારીને  અણનમ 101 રન નોંધાવીને નવો રેકોર્ડ સ્થાપિત કર્યો હતો. ખ્વાજાએ બીજી ઈનિંગમાં 138 બોલમાં 10 ચોગ્ગા અને 2 છગ્ગા સાથે 101 રન નોંધાવ્યા હતા.

જો કે ઉસ્માન ખ્વાજાએ સીડની ટેસ્ટની બંને ઈનિંગ્સમાં સદી ફટકાર્યા પછી કહ્યું હતું કે, સીડની ટેસ્ટની બંને ઈનિંગ્સમાં સદી ફટકારીને ટીમને સધ્ધર સ્થિતીમાં મૂકવા છતાં હું ટીમમાં રહીશ એ નક્કી નથી. ખ્વાજાએ કહ્યું કે, સીડની ટેસ્ટની બંને ઈનિંગ્સમાં સદી ફટકારવા છતાં મને પાંચમી ટેસ્ટમાં રમવા મળશે કે નહીં તેની મને જ ખબર નથી. ટ્રેવિસ હેડને ઈજા થતાં તેના સ્થાને ખ્વાજાને સીડની ટેસ્ટની ટીમમાં લેવાયો હતો. ખ્વાજાએ બંને ઈનિંગ્સમાં સદી ફટકારીને પોતાને લેવાના નિર્ણયને યોગ્ય સાબિત કર્યો છે પણ હવે ટ્રેવિસ હેડ સારો થઈને ટીમ સાથે જોડાઈ ગયો છે. આ સંજોગોમાં પાંચમી ટેસ્ટમાં ખ્વાજાને બહાર કાઢીન ટ્રેવિસ હેડને ટીમમાં લઈ શકાય છે. 

ખ્વાજાની  સદીની મદદથી ઓસ્ટ્રેલિયાએ ચોથી ટેસ્ટમાં ઈંગ્લેન્ડને જીતવા માટે 388 રનનો વિશાળ પડકાર આપ્યો હતો. ઈંગ્લેન્ડે ચોથા દિવસના અંતે સુધીમાં વિના વિકેટે 30 રન કરી લીધા હતા.

પ્રથમ ઈનિંગમાં વિશાલ સ્કોર ખડકીને 121 રનની સરસાઈ મેળવ્યા બાદ બીજી ઈનિંગમાં બેટીંગ કરતાં ઓસ્ટ્રેલિયાના ટોપ ઓર્ડરનો ધબડકો થયો હતો. વોર્નર 3, હેરિસ 27, લાબુશૅન 29 અને સ્મિથ 23 રને આઉટ થતાં ઓસ્ટ્રેલિયાનો સ્કોર 86 રનમાં ૪ વિકેટ થઈ ગયો હતો.

ઓસ્ટ્રેલિયાના પતનને અટકાવતા ખ્વાજા અને ગ્રીને 179 રનની ભાગીદારી કરીને અટકાવ્યું હતું અને  ઈંગ્લેન્ડને બેકફૂટ પર ધકેલ્યું હતુ. ખ્વાજાએ 138 બોલમાં 10 ચોગ્ગા અને 2 છગ્ગા સાથે 101 રન નોંધાવ્યા હતા. ગ્રીન 122 બોલમાં 7 ચોગ્ગા અને 1 છગ્ગા સાથે 74 રને આઉટ થયો હતો.