IND vs NZ: સંજુ સેમસનનું પત્તું કપાશે? ચોથી T20 મેચમાં 2 મોટા ફેરફાર સાથે ઉતરશે ટીમ ઈન્ડિયા; જાણો પ્લેઈંગ 11
IND vs NZ 4th T20I Playing 11: શ્રેણી જીત્યા બાદ સૂર્યાની ટીમમાં મોટા ફેરફાર થશે. ફ્લોપ ગયેલા સંજુ સેમસનને આરામ અને ઈજાગ્રસ્ત અક્ષર પટેલની વાપસી નક્કી છે. જાણો વિશાખાપટ્ટનમ મેચની સંભવિત પ્લેઈંગ 11.
IND vs NZ 4th T20I Playing 11: સૂર્યકુમાર યાદવની આગેવાની હેઠળની ભારતીય ક્રિકેટ ટીમે (Team India) ન્યુઝીલેન્ડ સામેની T20I શ્રેણીમાં 3-0 ની અજેય સરસાઈ મેળવીને દબદબો બનાવી લીધો છે. હવે શ્રેણીની ચોથી મેચ બુધવાર, 28 January ના રોજ વિશાખાપટ્ટનમ ખાતે રમાશે. શ્રેણી પર કબ્જો જમાવ્યા બાદ હવે ટીમ મેનેજમેન્ટ બેન્ચ સ્ટ્રેન્થ અજમાવવાના મૂડમાં છે, જેના કારણે આગામી મેચમાં પ્લેઈંગ ઈલેવન (Playing 11) માં બે મોટા અને મહત્વના ફેરફારો જોવા મળી શકે છે.
ટીમમાં સૌથી મોટો ફેરફાર વિકેટકીપર બેટ્સમેન સંજુ સેમસન (Sanju Samson) ને લઈને થઈ શકે છે. શ્રેણીની શરૂઆતી ત્રણેય મેચોમાં સંજુનું પ્રદર્શન અત્યંત નિરાશાજનક રહ્યું છે. આંકડા પર નજર કરીએ તો, નાગપુરમાં રમાયેલી પ્રથમ મેચમાં તે માત્ર 10 રન બનાવી શક્યો હતો, જ્યારે બીજી મેચમાં 6 રન અને ત્રીજી મેચમાં તો તે 'ગોલ્ડન ડક' (Golden Duck) એટલે કે શૂન્ય પર આઉટ થયો હતો.
આવી સતત નિષ્ફળતા બાદ હવે સંજુ સેમસનને પ્લેઈંગ ઈલેવનમાંથી પડતો મૂકવામાં આવે તે લગભગ નક્કી છે. તેના સ્થાને સ્ટાર બેટ્સમેન શ્રેયસ ઐયર (Shreyas Iyer) ને તક આપવામાં આવે તેવી પ્રબળ શક્યતા છે. ઐયર અત્યાર સુધી બેન્ચ પર બેસી રહ્યો હતો, પરંતુ હવે તેને ટીમમાં સ્થાન મળી શકે છે, જે મિડલ ઓર્ડરને મજબૂતી આપશે.
બીજો મહત્વનો ફેરફાર ઓલરાઉન્ડર વિભાગમાં જોવા મળશે. પ્રથમ T20I મેચમાં આંગળીમાં ઈજા થવાને કારણે ટીમમાંથી બહાર થયેલા અક્ષર પટેલ (Axar Patel) હવે સંપૂર્ણ ફિટ થઈ ગયો છે. અક્ષર પટેલની વાપસીથી ટીમના સ્પિન આક્રમણને અને લોઅર ઓર્ડર બેટિંગને ઊંડાણ મળશે. સૂત્રોના જણાવ્યા મુજબ, શિવમ દુબે (Shivam Dube) ના સ્થાને અક્ષર પટેલનો સમાવેશ કરવામાં આવી શકે છે.
ભારતે શ્રેણી જીતી લીધી હોવાથી હવે ટીમ પર હાર-જીતનું કોઈ દબાણ નથી. તેથી, કોચ અને કેપ્ટન બાકીના ખેલાડીઓને અજમાવી શકે છે. સંજુ સેમસનની ગેરહાજરીમાં વિકેટકીપિંગની જવાબદારી ઈશાન કિશન (Ishan Kishan) સંભાળશે તે લગભગ નક્કી છે. ટીમ હવે ક્લીન સ્વીપના ઈરાદા સાથે મેદાનમાં ઉતરશે.
ચોથી T20I માટે ભારતની સંભવિત પ્લેઈંગ ઈલેવન: અભિષેક શર્મા, ઈશાન કિશન (વિકેટકીપર), સૂર્યકુમાર યાદવ (કેપ્ટન), શ્રેયસ ઐયર, રિંકુ સિંહ, હાર્દિક પંડ્યા, અક્ષર પટેલ, રવિ બિશ્નોઈ, કુલદીપ યાદવ, હર્ષિત રાણા અને જસપ્રીત બુમરાહ.
ટોપ સ્ટોરી
ટ્રેન્ડિંગ સમાચાર
