Pak Vs Eng: પાકિસ્તાનના ઘરઆંગણે પ્રથમવાર સૂપડા સાફ, ઇગ્લેન્ડે 3-0થી કર્યો વ્હાઇટવોશ
પાકિસ્તાનમાં રમાયેલી 3 મેચની ટેસ્ટ શ્રેણીમાં ઈંગ્લેન્ડે 3-0થી જીત મેળવીને પાકિસ્તાનનો સફાયો કર્યો હતો.
ઈંગ્લેન્ડે કરાચી ટેસ્ટ મેચમાં પાકિસ્તાનને હરાવીને ઈતિહાસ રચ્યો છે. પાકિસ્તાનમાં રમાયેલી 3 મેચની ટેસ્ટ શ્રેણીમાં ઈંગ્લેન્ડે 3-0થી જીત મેળવીને પાકિસ્તાનનો સફાયો કર્યો હતો. શ્રેણીની ત્રીજી અને છેલ્લી ટેસ્ટમાં ઈંગ્લેન્ડે 8 વિકેટે જીત મેળવી હતી.
England complete a 3-0 clean sweep with a dominant win in Karachi 👏#PAKvENG | #WTC23 | 📝 https://t.co/y5SkcqY16s pic.twitter.com/Ny7Q4EIrE1
— ICC (@ICC) December 20, 2022
ઈંગ્લેન્ડની બેઝબોલ પોલિસીની અસર અહીં પણ જોવા મળી કારણ કે ટીમ પાકિસ્તાન સામે સંપૂર્ણપણે આક્રમક રીતે રમી હતી. આ ટેસ્ટ મેચમાં પાકિસ્તાને પ્રથમ દાવમાં 306 રન બનાવ્યા હતા જ્યારે ઈંગ્લેન્ડે પ્રથમ દાવમાં 354 રન બનાવ્યા હતા.
A 3-0 series whitewash!! 🦁🦁🦁
— England Cricket (@englandcricket) December 20, 2022
WHAT. A. TEAM.
🇵🇰 #PAKvENG 🏴 pic.twitter.com/wHbbq6SiyC
બીજી ઈનિંગમાં પાકિસ્તાનની ટીમ 216 રન પર ઓલઆઉટ થઈ ગઈ હતી અને બાદમાં ઈંગ્લેન્ડે માત્ર 2 વિકેટ ગુમાવીને 170 રનનો ટાર્ગેટ હાંસલ કર્યો હતો અને શ્રેણીમાં ક્લીન સ્વીપ કરી લીધું હતું. 18 વર્ષીય રેહાન અહેમદ કરાચી ટેસ્ટમાં ઈંગ્લેન્ડ માટે હીરો સાબિત થયો. તેણે ટેસ્ટ ડેબ્યૂમાં જ પાંચ વિકેટ ઝડપી હતી.
રેહાન અહેમદ ટેસ્ટ ક્રિકેટમાં ડેબ્યૂમાં 5 વિકેટ લેનારો સૌથી યુવા ખેલાડી પણ બની ગયો છે, તેણે 18 વર્ષ 128 દિવસની ઉંમરમાં આ કારનામું કર્યું હતું. રેહાન અહેમદે પ્રથમ દાવમાં 2 અને બીજી ઈનિંગમાં 5 વિકેટ ઝડપી હતી.
ઈંગ્લેન્ડ-પાકિસ્તાન ટેસ્ટ સિરીઝ
- પ્રથમ ટેસ્ટ (રાવલપિંડી) – ઈંગ્લેન્ડ 74 રનથી જીત્યું
- બીજી ટેસ્ટ (મુલતાન) – ઈંગ્લેન્ડ 26 રનથી જીત્યું
- ત્રીજી ટેસ્ટ (કરાંચી) – ઈંગ્લેન્ડ 8 વિકેટે જીત્યું
આ હાર પાકિસ્તાન માટે ખૂબ જ ખરાબ છે કારણ કે ટેસ્ટ ક્રિકેટના ઈતિહાસમાં પહેલીવાર પાકિસ્તાનને ઘરઆંગણે ક્લીન સ્વીપનો સામનો કરવો પડ્યો છે. આ સાથે તેણે ઘરઆંગણે સતત બીજી શ્રેણી ગુમાવી છે. આ પહેલા ઓસ્ટ્રેલિયાએ પણ તેને ઘરઆંગણે 1-0થી હરાવ્યું હતું. પાકિસ્તાને 1954/55માં પ્રથમ વખત ઘરઆંગણે ટેસ્ટ શ્રેણી રમી હતી, જ્યારે ભારત ત્યાં ગયું હતું. પાંચ ટેસ્ટની તે શ્રેણી 0-0થી ડ્રો રહી હતી.
ઈંગ્લેન્ડે લગભગ 22 વર્ષ બાદ પાકિસ્તાનમાં ટેસ્ટ શ્રેણી જીતી છે. અગાઉ જ્યારે ઈંગ્લેન્ડે 2000/01માં પાકિસ્તાનનો પ્રવાસ કર્યો હતો ત્યારે તેણે શ્રેણી 1-0થી જીતી હતી. પાકિસ્તાનની ધરતી પર ઈંગ્લેન્ડની આ એકંદરે ત્રીજી ટેસ્ટ શ્રેણી જીત છે.
ટ્રેન્ડિંગ સમાચાર
ટોપ સ્ટોરી
