T20 વર્લ્ડ કપ 2026

ટી20 ક્રિકેટનો સૌથી મોટો તહેવાર એટલે ટી20 વર્લ્ડ કપ 2026, જે 7 ફેબ્રુઆરીથી શરૂ થઈ 8 માર્ચ સુધી ભારત અને શ્રીલંકાના મેદાનોમાં રમાશે. ટીમ ઈન્ડિયા હાલની ચેમ્પિયન હોવાના કારણે આ વખતે સુર્યકુમાર યાદવની આગેવાની હેઠળ ફરી ખિતાબ બચાવવા મેદાનમાં ઉતરશે. આ વર્લ્ડ કપમાં કુલ 20 ટીમો ભાગ લઈ રહી છે, જેને ચાર ગ્રુપમાં વહેંચવામાં આવી છે. ઈતિહાસ મુજબ હજુ સુધી કોઈ ટીમ સતત બે વખત ટી20 વર્લ્ડ કપ જીતી શકી નથી. તેથી ભારત સામે આ રેકોર્ડ તોડવાની ખાસ તક અને પડકાર બંને છે. ટૂર્નામેન્ટના મુકાબલા ભારતના પાંચ અને શ્રીલંકાના ત્રણ મેદાનોમાં યોજાશે. જો પાકિસ્તાન ફાઇનલમાં પ્રવેશ નહીં કરે તો ફાઇનલ મુકાબલો અમદાવાદના નરેન્દ્ર મોદી સ્ટેડિયમમાં રમાશે. આ વખતે મોટા સ્ટેડિયમ અને સ્પિન અનુકૂળ પિચોના કારણે બેટ્સમેન માટે રન બનાવવું સરળ નહીં હોય. ફક્ત મોટા શોટ નહીં, પણ સ્ટ્રાઈક રોટેશન પણ મહત્વપૂર્ણ રહેશે. ભારતીય ટીમ પહેલીવાર વિરાટ કોહલી અને રોહિત શર્મા વગર આઈસીસી ટૂર્નામેન્ટમાં ઉતરશે. ટીમની કમાન સુર્યકુમાર યાદવ પાસે છે, જ્યારે તોફાની બેટિંગ માટે જાણીતા અભિષેક શર્મા પર ખાસ નજર રહેશે. બેટિંગ, બોલિંગ અને ફિલ્ડિંગ—ત્રણેય વિભાગમાં ટીમ ઈન્ડિયાનો દેખાવ મજબૂત રહ્યો છે, જેના કારણે આ વખતે પણ ભારત ખિતાબ જીતવાનો દાવેદાર માનવામાં આવે છે.