ચોંકાવનારો ખુલાસો: ગર્લફ્રેન્ડ સાથે રૂમમાં ગયો શિખર ધવન, રોહિત શર્મા પણ ત્યા હાજર હતો..., સિલેક્ટર્સને ખબર પડી તો....
ઓસ્ટ્રેલિયા પ્રવાસ 2006 નો કિસ્સો: પ્રેમ પ્રકરણને કારણે ધવનનું પ્રદર્શન બગડ્યું, સિનિયર ટીમમાં સ્થાન મેળવવામાં વિલંબ થયો હોવાનો સ્વીકાર.
Shikhar Dhawan Autobiography: ભારતીય ક્રિકેટ ટીમના ભૂતપૂર્વ ઓપનર શિખર ધવન ભલે આંતરરાષ્ટ્રીય ક્રિકેટમાંથી નિવૃત્ત થઈ ચૂક્યા હોય, પરંતુ તેમની નવી આત્મકથા 'ધ વન: ક્રિકેટ, માય લાઈફ એન્ડ મોર' એ ક્રિકેટ જગતમાં ભારે ચર્ચા જગાવી છે. આ પુસ્તકમાં ધવને પોતાની કારકિર્દીના ઉતાર-ચઢાવ ઉપરાંત એક ચોંકાવનારો ઘટસ્ફોટ કર્યો છે, જે અત્યાર સુધી ડ્રેસિંગ રૂમની ગુપ્ત વાત હતી. તેમણે વર્ષ 2006 ના ઓસ્ટ્રેલિયા પ્રવાસ દરમિયાન એક વિદેશી છોકરી સાથેના પોતાના અફેર અને તેના પર રોહિત શર્મા ની નારાજગી વિશે વિસ્તૃતપણે લખ્યું છે.
ઓસ્ટ્રેલિયામાં 'પ્રેમ' અને રોહિતની નારાજગી
ધવનના જણાવ્યા અનુસાર, 2006 માં ભારતીય 'એ' ટીમ ઓસ્ટ્રેલિયાના ડાર્વિન પ્રવાસે હતી. એરપોર્ટ પર ઉતરતાની સાથે જ ધવનની નજર ઈમિગ્રેશન લાઈનમાં એક વિદેશી છોકરી પર પડી. સામાન લેતી વખતે તેમની વચ્ચે વાતચીત શરૂ થઈ, અને તેમણે નંબર તથા ઈમેલની આપ-લે કરી. હોટલ પહોંચ્યા બાદ શિખરે તરત જ તેણીને મેઈલ કર્યો, અને ઝડપી પ્રતિભાવ મળતા તેમની મિત્રતા ગાઢ બની. વાત એટલી આગળ વધી કે ધવને તેણીને પોતાના હોટલના રૂમમાં બોલાવવાનું શરૂ કર્યું, જ્યાં તેઓ રોહિત શર્મા સાથે રૂમ શેર કરી રહ્યા હતા.
શિખરે હસતાં હસતાં તે ઘટનાને યાદ કરતા લખ્યું કે, રોહિતને તે છોકરીનું રૂમમાં આવવું બિલકુલ પસંદ નહોતું. રોહિત આ સમગ્ર બાબતથી ખૂબ જ ચિડાઈ જતો હતો. જ્યારે પણ શિખર પોતાની ગર્લફ્રેન્ડને રૂમમાં લાવતો, ત્યારે રોહિત તેને અટકાવતો અને કહેતો, "શું તમે મને સૂવા દેશો?" ધવન કબૂલે છે કે તે સમયે તેને લાગતું હતું કે તે છોકરી તેના માટે યોગ્ય છે અને તે તેની સાથે લગ્ન કરવા માંગતો હતો.
પસંદગીકારોએ પકડી પાડ્યા અને કારકિર્દી પર અસર
એક દિવસ, ધવન અને તેમની ગર્લફ્રેન્ડ હોટલની લોબીમાં હાથ પકડીને ફરી રહ્યા હતા, ત્યારે એક વરિષ્ઠ પસંદગીકારે તેમને જોયા. ધવને લખ્યું, "મેં તે છોકરીનો હાથ છોડ્યો નહીં, કારણ કે મને લાગ્યું કે આપણે હાથ પકડીને કંઈ ખોટું નથી કરી રહ્યા." જોકે, આ વાત અહીં અટકી નહીં. ટૂંક સમયમાં જ આખી ટીમમાં સમાચાર ફેલાઈ ગયા કે શિખરનું ઓસ્ટ્રેલિયામાં અફેર ચાલી રહ્યું છે અને તેની એક ગર્લફ્રેન્ડ છે.
ધવને પોતાના પુસ્તકમાં સ્વીકાર્યું કે આ સંબંધે તેમની ક્રિકેટ કારકિર્દી પર પણ નકારાત્મક અસર કરી. તેમણે કબૂલ્યું કે તે પ્રવાસ પર તેઓ પોતાની રમત પર ધ્યાન કેન્દ્રિત કરી શક્યા નહીં અને તેમનું પ્રદર્શન કથળતું ગયું. તેમણે લખ્યું કે, "જો મેં તે પ્રવાસ પર સારું પ્રદર્શન કર્યું હોત, તો કદાચ મને જલ્દી જ સિનિયર ટીમમાં સ્થાન મળ્યું હોત." આ ખુલાસા દર્શાવે છે કે કેવી રીતે વ્યક્તિગત જીવનના પાસાઓ એક ક્રિકેટરના પ્રદર્શન અને કારકિર્દી પર અસર કરી શકે છે.
ટોપ સ્ટોરી
ટ્રેન્ડિંગ સમાચાર
