IND vs SA 3rd ODI: યશસ્વી જયસ્વાલે રચ્યો ઇતિહાસ; વિરાટ, રોહિત અને ગિલ પછી આ સિદ્ધિ મેળવનાર છઠ્ઠો ભારતીય બન્યો
Yashasvi Jaiswal century all formats: ત્રણેય ફોર્મેટમાં સદી ફટકારનાર 6ઠ્ઠો ભારતીય બન્યો જયસ્વાલ, વિશાખાપટ્ટનમમાં 111 બોલમાં ખેલી યાદગાર ઇનિંગ.
Yashasvi Jaiswal century all formats: ભારતીય ક્રિકેટના ઉગતા સિતારા યશસ્વી જયસ્વાલે દક્ષિણ આફ્રિકા સામેની ત્રીજી વનડે મેચમાં શાનદાર પ્રદર્શન કરતા પોતાની ODI કારકિર્દીની પ્રથમ સદી ફટકારી છે. વિશાખાપટ્ટનમમાં રમાયેલી આ મેચમાં યશસ્વીએ 111 બોલમાં સદી પૂરી કરીને એક મોટી સિદ્ધિ હાંસલ કરી છે. આ સદી સાથે તે આંતરરાષ્ટ્રીય ક્રિકેટના ત્રણેય ફોર્મેટ (ટેસ્ટ, વનડે અને T20) માં સદી ફટકારનાર ભારતનો 6ઠ્ઠો બેટ્સમેન બની ગયો છે. આ પહેલા માત્ર સુરેશ રૈના, રોહિત શર્મા, વિરાટ કોહલી, કેએલ રાહુલ અને શુભમન ગિલ જ આ પરાક્રમ કરી શક્યા હતા.
ધીરજ અને આક્રમકતાનું મિશ્રણ: 111 બોલમાં સદી
શ્રેણીની અગાઉની બે મેચોમાં યશસ્વી જયસ્વાલ સારી શરૂઆત મળવા છતાં વિકેટ ગુમાવી બેસતો હતો, પરંતુ ત્રીજી મેચમાં તેણે પરિપક્વતા દાખવી હતી. તેણે ઇનિંગની શરૂઆતમાં સાવચેતીપૂર્વક બેટિંગ કરી અને 75 બોલમાં પોતાની અડધી સદી પૂરી કરી હતી. એકવાર સેટ થયા બાદ, તેણે ગિયર બદલ્યો અને પછીના 50 રન માત્ર 35 બોલમાં જ બનાવી દીધા હતા. અંતે તેણે 111 બોલમાં પોતાની મેડન વનડે સદી પૂર્ણ કરી હતી. આ શાનદાર ઇનિંગ દરમિયાન તેના બેટમાંથી 10 ચોગ્ગા અને 1 સિક્સર જોવા મળી હતી.
રેકોર્ડ બુકમાં નામ નોંધાવ્યું: 'સિક્સર' ક્લબમાં એન્ટ્રી
યશસ્વી જયસ્વાલ માટે આ તેની કારકિર્દીની માત્ર 4થી વનડે મેચ હતી અને તેમાં જ તેણે સદી ફટકારીને સાબિત કરી દીધું છે કે તે લાંબી રેસનો ઘોડો છે. ઉલ્લેખનીય છે કે, જયસ્વાલ અગાઉ ટેસ્ટ અને T20 ઇન્ટરનેશનલમાં સદી ફટકારી ચૂક્યો છે. હવે વનડેમાં પણ સદી નોંધાવીને તે ક્રિકેટના ત્રણેય ફોર્મેટમાં સદી ફટકારનારા વિશિષ્ટ ભારતીય ખેલાડીઓના લિસ્ટમાં સામેલ થઈ ગયો છે. આ એલિટ લિસ્ટમાં સુરેશ રૈના (પ્રથમ ખેલાડી), રોહિત શર્મા, કેએલ રાહુલ, વિરાટ કોહલી અને શુભમન ગિલનો સમાવેશ થાય છે. જયસ્વાલ આ સિદ્ધિ મેળવનાર 6ઠ્ઠો ભારતીય છે.
રોહિત શર્મા સાથે 155 રનની ભાગીદારી
મેચની વાત કરીએ તો, ભારતીય ટીમના રન ચેઝમાં ઓપનિંગ જોડીએ મજબૂત પાયો નાખ્યો હતો. કેપ્ટન રોહિત શર્મા અને યશસ્વી જયસ્વાલે દક્ષિણ આફ્રિકાના બોલરો પર પ્રભુત્વ જમાવતા પ્રથમ વિકેટ માટે 155 રનની ભાગીદારી નોંધાવી હતી. રોહિત શર્માએ પણ આક્રમક અંદાજમાં બેટિંગ કરતા 73 બોલમાં 75 રન બનાવ્યા હતા. 'હિટમેન'ની ઇનિંગમાં 7 ચોગ્ગા અને 3 છગ્ગા સામેલ હતા. જોકે, રોહિત સારી લયમાં હોવા છતાં પોતાની સદી ચૂકી ગયો હતો, પરંતુ તેણે જયસ્વાલને સદી સુધી પહોંચવામાં સારો સાથ આપ્યો હતો.
ટોપ સ્ટોરી
ટ્રેન્ડિંગ સમાચાર
