KL રાહુલ અને અક્ષર પટેલ 'ઝીરો' પર આઉટ, છતાં દિલ્હીનો ડંકો! જુઓ કેવી રીતે પાછળથી બાજી પલટાઈ

IPL 2026 ની 5મી મેચમાં દિલ્હી કેપિટલ્સે હારેલી બાજી પલટી, સમીર રિઝવીની 70 રનની તોફાની ઇનિંગથી લખનૌ સુપર જાયન્ટ્સને 6 વિકેટથી આપી માત.

IPL 2026, DC beat LSG by 6 Wickets Highlights; Sameer Rizvi Smashes 70

Source : Social Media

Show Quick Read

Key points generated by AI, verified by newsroom

• દિલ્હીએ લખનૌને 141 રનમાં ઓલઆઉટ કર્યું.
• દિલ્હીની શરૂઆત ખરાબ, 26 રનમાં 4 વિકેટ.
• રિઝવી અને સ્ટબ્સે 119 રન અણનમ ભાગીદારી કરી.
• દિલ્હીએ 6 વિકેટે અશક્ય લાગતી મેચ જીતી.

આઈપીએલ (IPL 2026) ની 5મી મેચમાં દર્શકોને એક જબરદસ્ત રોમાંચક મુકાબલો જોવા મળ્યો. લખનૌ સુપર જાયન્ટ્સ (LSG) સામેની આ મેચમાં દિલ્હી કેપિટલ્સે (DC) 6 વિકેટથી શાનદાર જીત મેળવી છે. એક સમયે દિલ્હીની ટીમે માત્ર 26 રનના સ્કોર પર જ પોતાની 4 મહત્વની વિકેટ ગુમાવી દીધી હતી અને એવું લાગી રહ્યું હતું કે દિલ્હી આ મેચ આસાનીથી હારી જશે. પરંતુ, ત્યારપછી યુવા ખેલાડી સમીર રિઝવી અને ટ્રિસ્ટન સ્ટબ્સની જોડીએ મેદાન પર એવો ચમત્કાર કર્યો કે આખી મેચનો પાસો જ પલટાઈ ગયો. આ બંનેએ 119 રનની અણનમ ભાગીદારી કરીને દિલ્હીને અશક્ય લાગતી જીત અપાવી દીધી.

લખનૌની ટીમ 141 રનમાં સમેટાઈ ગઈ

મેચની શરૂઆતમાં દિલ્હી કેપિટલ્સે ટોસ જીતીને પહેલા બોલિંગ કરવાનો નિર્ણય લીધો હતો, જે એકદમ સાચો સાબિત થયો. પ્રથમ બેટિંગ કરવા ઉતરેલી લખનૌ સુપર જાયન્ટ્સની ટીમ 18.4 ઓવરમાં માત્ર 141 રન બનાવીને ઓલઆઉટ થઈ ગઈ. લખનૌ તરફથી અબ્દુલ સમદે થોડી લડત આપતા 25 બોલમાં 36 રન બનાવ્યા હતા. દિલ્હીના બોલર્સની વાત કરીએ તો, લુંગી ન્ગિડી અને ટી. નટરાજને તરખાટ મચાવતા 3-3 વિકેટ પોતાના નામે કરી હતી.

દિલ્હીની શરૂઆત સાવ કંગાળ રહી

142 રનના ટાર્ગેટનો પીછો કરવા ઉતરેલી દિલ્હી કેપિટલ્સની શરૂઆત ખૂબ જ ખરાબ રહી હતી. રન ચેઝની શરૂઆતમાં જ દિલ્હીની બેટિંગ લાઈનઅપ વેરવિખેર થઈ ગઈ હતી. પાવરપ્લેમાં ટીમે માંડ 33 રન બનાવ્યા ત્યાં સુધીમાં તો 4 ટોપ ઓર્ડરના બેટ્સમેન પેવેલિયન ભેગા થઈ ગયા હતા. જેમાં કેએલ રાહુલ (0), નીતિશ રાણા (15), પથુમ નિસાન્કા (0) અને અક્ષર પટેલ (0) સસ્તામાં આઉટ થઈ ગયા હતા. 26 રનમાં 4 વિકેટ પડ્યા પછી દિલ્હીની જીત સાવ અશક્ય લાગી રહી હતી.

રિઝવી અને સ્ટબ્સે હારેલી બાજી જીતાડી

આ મુશ્કેલ પરિસ્થિતિમાં સમીર રિઝવી અને ટ્રિસ્ટન સ્ટબ્સે મોરચો સંભાળ્યો. બંનેએ પાંચમી વિકેટ માટે 76 બોલમાં 119 રનની અણનમ ભાગીદારી નોંધાવીને ઇનિંગને મજબૂતી આપી. શરૂઆતમાં સાવચેતીથી રમ્યા બાદ, મેચ જેમ જેમ આગળ વધી તેમ બંનેએ પોતાની બેટિંગની ઝડપ વધારી અને 17.1 ઓવરમાં જ ટીમને વિજય રેખા પાર કરાવી દીધી. સમીર રિઝવી આ જીતનો અસલી હીરો રહ્યો, જેણે માત્ર 47 બોલમાં 5 ચોગ્ગા અને 4 છગ્ગાની મદદથી શાનદાર 70 અણનમ રન ફટકાર્યા હતા.

લખનૌના બોલર્સનો સંઘર્ષ

લખનૌ સુપર જાયન્ટ્સ તરફથી બોલિંગમાં પ્રિન્સ યાદવે સૌથી વધુ 2 વિકેટ લીધી હતી, જેના માટે તેણે 3 ઓવરમાં 20 રન આપ્યા હતા. આ ઉપરાંત અનુભવી બોલર મોહમ્મદ શમીએ 4 ઓવરમાં 28 રન આપીને 1 વિકેટ અને મોહસીન ખાને 4 ઓવરમાં 19 રન આપીને 1 વિકેટ ઝડપી હતી. જોકે, શરૂઆતના ઝટકા આપ્યા બાદ તેઓ રિઝવી અને સ્ટબ્સની જોડીને તોડવામાં નિષ્ફળ રહ્યા હતા.

આ પણ વાંચો

LSG vs DC: રિષભ પંતનું ખરાબ નસીબ! કમનસીબ રીતે રન આઉટ થતાં મેદાન પર જ કાઢ્યો ગુસ્સો