માર્શની સદી, પૂરનનો પાવર અને બોલરોનો તરખાટ: LSGએ ગુજરાત ટાઇટન્સને 33 રને હરાવ્યું
IPL 2025ના રોમાંચક મુકાબલામાં લખનૌ સુપર જાયન્ટ્સના 235 રનના વિશાળ લક્ષ્યાંક સામે ગુજરાત ટાઇટન્સ 202 રનમાં સમેટાયું, અંતિમ ઓવરોમાં LSGના બોલરોએ બાજી પલટી.
GT vs LSG IPL 2025 highlights: ઇન્ડિયન પ્રીમિયર લીગ (IPL) ૨૦૨૫ની એક અત્યંત રોમાંચક મેચમાં, લખનૌ સુપર જાયન્ટ્સે (LSG) ગુજરાત ટાઇટન્સ (GT) ને ૩૩ રનથી પરાજય આપ્યો. મિશેલ માર્શની વિસ્ફોટક સદી અને નિકોલસ પૂરનની તોફાની અડધી સદી બાદ બોલરોના શિસ્તબદ્ધ પ્રદર્શને LSGને આ મહત્વપૂર્ણ જીત અપાવી.
મેચમાં પ્રથમ બેટિંગ કરતા લખનૌ સુપર જાયન્ટ્સે મિશેલ માર્શની શાનદાર સદી અને નિકોલસ પૂરનના આક્રમક ૫૬ રનની મદદથી ૨૦ ઓવરમાં ૨૩૫ રનનો જંગી સ્કોર ખડક્યો હતો. માર્શે મેદાનની ચારેબાજુ ફટકાબાજી કરી ગુજરાતના બોલરોને હંફાવ્યા હતા, જ્યારે પૂરને અંતિમ ઓવરોમાં ઝડપી રન બનાવી ટીમના સ્કોરને મજબૂત સ્થિતિમાં પહોંચાડ્યો હતો.
૨૩૬ રનના વિશાળ લક્ષ્યાંકનો પીછો કરવા ઉતરેલી ગુજરાત ટાઇટન્સને શુભમન ગિલ અને સાઈ સુદર્શને સારી શરૂઆત અપાવી હતી. બંને વચ્ચે પ્રથમ વિકેટ માટે ૪૬ રનની ભાગીદારી નોંધાઈ હતી. સાઈ સુદર્શન ૨૧ રન બનાવી પાંચમી ઓવરમાં આઉટ થયો. ત્યારબાદ, ફોર્મમાં ચાલી રહેલા શુભમન ગિલે (૨૦ બોલમાં ૩૫ રન) જોસ બટલર (૩૩ રન) સાથે મળીને સ્કોર આગળ ધપાવ્યો. જોકે, બટલર અને ગિલના આઉટ થવા બાદ ગુજરાતે ૯૬ રનના સ્કોર પર ૩ વિકેટ ગુમાવી દીધી હતી.
મુશ્કેલ પરિસ્થિતિમાં, શેરફાન રૂધરફોર્ડ (૩૮ રન) અને શાહરૂખ ખાને વળતી લડત આપતા ચોથી વિકેટ માટે ૮૬ રનની શાનદાર ભાગીદારી નોંધાવી ગુજરાતને મેચમાં પરત લાવવાનો પ્રયાસ કર્યો. એક સમયે ગુજરાત જીત તરફી આગેકૂચ કરતું દેખાઈ રહ્યું હતું, અને તેમને અંતિમ ૨૩ બોલમાં ૫૪ રનની જરૂર હતી. ટીમનો સ્કોર ૩ વિકેટે ૧૮૨ રન હતો.
પરંતુ, અહીંથી જ લખનૌના બોલરોએ મેચનું પાસું પલટી નાખ્યું. ખાસ કરીને ડેથ ઓવરોમાં LSGના બોલરોએ તરખાટ મચાવતા ગુજરાતની વિકેટોનું પતન શરૂ થયું. ગુજરાતે પોતાની છેલ્લી ૬ વિકેટ માત્ર ૨૦ રનના ગાળામાં ગુમાવી દીધી અને સમગ્ર ટીમ ૨૦૨ રનમાં ઓલઆઉટ થઈ ગઈ.
લખનૌ સુપર જાયન્ટ્સ તરફથી વિલિયમ ઓ'રોર્કે સૌથી વધુ ૩ વિકેટ ઝડપી હતી, જ્યારે આવેશ ખાન અને આયુષ બદોનીએ ૨-૨ વિકેટો મેળવી હતી. આકાશ સિંહ અને શાહબાઝ અહેમદને પણ એક-એક સફળતા મળી હતી. આ શાનદાર બોલિંગ પ્રદર્શનને કારણે મિશેલ માર્શની સદી અને પૂરનની મહેનત એળે ગઈ ન હતી અને લખનૌએ મહત્વના બે પોઈન્ટ્સ પોતાના નામે કર્યા.
ટોપ સ્ટોરી
ટ્રેન્ડિંગ સમાચાર
