IPL 2022: ગુજરાત ટાઈટન્સની આઠમી જીત, પ્લેઓફમાં સ્થાન કર્યુ નક્કી, RCBને 6 વિકેટથી આપી હાર
Gujarat Titans: મેચ જીતવા 171 રનના ટાર્ગેટને ગુજરાત ટાઈટન્સે 19.3 ઓવરમાં 4 વિકેટ ગુમાવીને હાંસલ કર્યો હતો. આ સાથે ગુજરાત ટાઈટન્સ પોઈન્ટ ટેબલમાં ટોચ પર છે અને પ્લેઓફમાં પહોંચવાનું નક્કી થઈ ગયું છે.
IPL 2022: ઈન્ડિયન પ્રીમિયર લીગનો 43મો મુકાબલો ગુજરાત ટાઈટન્સ અને રોયલ ચેલેન્જર્સ બેંગ્લોર વચ્ચે મુંબઈના બ્રેબોર્ન સ્ટેડિયમમાં રમાયો હતો. મેચમાં આરસીબીએ ટોસ જીતીને પ્રથમ બેટિંગનો ફેંસલો કર્યો છે. આરસીબીએ 20 ઓવરમાં 6 વિકેટના નુકસાન પર 170 રન બનાવ્યા હતા. મેચ જીતવા 171 રનના ટાર્ગેટને ગુજરાત ટાઈટન્સે 19.3 ઓવરમાં 4 વિકેટ ગુમાવીને હાંસલ કર્યો હતો. આ સાથે ગુજરાત ટાઈટન્સ પોઈન્ટ ટેબલમાં ટોચ પર છે અને પ્લેઓફમાં પહોંચવાનું નક્કી થઈ ગયું છે.
ગુજરાતની મજબૂત શરૂઆત
ગુજરાત ટાઈટન્સના ઓપનર સાહા (29 રન) અને ગિલ (31 રન)એ મજબૂત શરૂઆત અપાવી હતી. બંનેએ પ્રથમ વિકેટ ટમાં 51 રન ઉમેર્યા હતા. ડેવિડ મિલર 24 બોલમાં 39 અને રાહુલ તેવટીયા 25 બોલમાં 43 રન બનાવી નોટ આઉટ રહ્યો હતો. હાર્દિક પંડ્યા માત્ર 3 રન બનાવી શક્યો હતો. હસરંગા અને શાહબાઝે 2-2 વિકેટ લીધી હતી.
આરસીબીમાં કોહલીએ કર્યુ ઓપનિંગ
આરસીબી અને ટીમ ઈન્ડિયાનો પૂર્વ કેપ્ટન વિરાટ કોહલી આજે ઓપનિંગમાં આવ્યો હતો. તેણે 53 બોલમાં 58 રનની ઈનિંગ રમી હતી. શમીની ઓવરમાં તે બોલ્ડ આઉટ થયો હતો. કોહલીએ ફિફ્ટી ફટકારતાં મેદાન પર હાજર રહેલી અનુષ્કા ખુશ થઈ ગઈ હતી. કોહલી સિવાય રજત પાટીદારે 32 બોલમાં 52 રનની ઈનિંગ રમી હતી. મેક્સવેલે 18 બોલમાં 33 રન બનાવ્યા હતા. ગુજરાત ટાઈટન્સ તરફથી પ્રદીપ સાંગવાને 19 રનમાં બે તથા શમી, જોસેફ, રાશિદ ખાન, ફર્ગ્યુસનને 1-1 સફળતા મળી હતી.
કોહલીના દરેક શોટ પર ખુશ થઈ અનુષ્કા
આ મેચમાં આઈસીબીનો પૂર્વ કેપ્ટન વિરાટ કોહલી જુના રંગમાં જોવા મળ્યો હતો. વિરાટ કોહલીએ રન બનાવતા જ સ્ટેડિયમાં બેસેલી તેમની પત્ની અનુષ્કા શર્મા પણ બહુ ખુશ જોવા મળી હતી. હવે સોશિયલ મીડિયા પર અનુષ્કાએ આપેલા રિએક્શન વાયરલ થઈ રહ્યા છે. કોહલીના દરેક શોટ પર અનુષ્કા શર્મા ખુશ થતી જોવા મળી હતી. કોહલીએ જ્યારે સિક્સર ફટકારી ત્યારે અનુષ્કાની ખુશી જોયા જેવી હતી.
સતત ફલોપ થઈ રહ્યો હતો કોહલી
નોંધનીય છે કે, આ આઈપીએલ સિઝનમાં કોહલી સતત ફ્લોપ ચાલી રહ્યો હતો.આ ઉપરાંત તે સતત ઝીરો પર પણ આઉટ થતો હતો. આઈપીએલ 2022માં આ તેની પહેલી ફિફ્ટી છે. આ મેચ પહેલા તેના બેટથી કોઈ મોટો સ્કોર બન્યો ન હતો. જો કે આજે કોહલી પોતાના જુના રંગમાં જોવા મળ્યો હતો.
ટ્રેન્ડિંગ સમાચાર
ટોપ સ્ટોરી
