IPL 2025 schedule: 13 સ્થળો, 65 દિવસ, 74 મેચ.. 10 વર્ષ પછી IPLમાં પહેલીવાર આવું થશે
IPL 2025 match dates: 10 વર્ષ બાદ IPL ફાઈનલ કોલકાતામાં, ડિફેન્ડિંગ ચેમ્પિયન KKR અને RCB વચ્ચે ઉદ્ઘાટન મેચ
IPL 2025 schedule: ક્રિકેટ ચાહકો માટે સારા સમાચાર! ભારતીય ક્રિકેટ કંટ્રોલ બોર્ડ (BCCI) દ્વારા ઇન્ડિયન પ્રીમિયર લીગ (IPL) 2025નું સંપૂર્ણ શેડ્યૂલ જાહેર કરવામાં આવ્યું છે. IPLની 18મી સીઝન 22 માર્ચ 2025 થી શરૂ થશે અને 25 મેના રોજ ફાઈનલ મેચ રમાશે. ઉદ્ઘાટન મેચમાં ડિફેન્ડિંગ ચેમ્પિયન કોલકાતા નાઈટ રાઈડર્સ (KKR) અને રોયલ ચેલેન્જર્સ બેંગ્લોર (RCB) વચ્ચે કોલકાતાના પ્રખ્યાત ઇડન ગાર્ડન્સ સ્ટેડિયમમાં ટક્કર થશે.
આ રોમાંચક ટૂર્નામેન્ટ 65 દિવસ સુધી ચાલશે અને દેશના 13 અલગ-અલગ શહેરોમાં કુલ 74 મેચો રમાશે. આ વખતે 12 ડબલ હેડર (એક દિવસમાં બે મેચ) પણ જોવા મળશે. બપોરની મેચો ભારતીય સમય અનુસાર બપોરે 3:30 વાગ્યે શરૂ થશે, જ્યારે સાંજના મેચો સાંજે 7:30 વાગ્યે શરૂ થશે. પ્રથમ ડબલ હેડર 23 માર્ચે રમાશે, જેમાં પ્રથમ મેચ સનરાઇઝર્સ હૈદરાબાદ (SRH) અને રાજસ્થાન રોયલ્સ (RR) વચ્ચે હૈદરાબાદમાં બપોરે રમાશે. ત્યારબાદ સાંજે, ચેન્નાઈ સુપર કિંગ્સ (CSK) અને મુંબઈ ઈન્ડિયન્સ (MI) જેવી બે સૌથી સફળ ટીમો ચેન્નાઈના એમ.એ. ચિદમ્બરમ સ્ટેડિયમમાં આમને-સામને ટકરાશે.
ખાસ વાત એ છે કે આ વખતે ધર્મશાલામાં પણ IPL મેચનું આયોજન થશે. IPLની 10 ટીમોમાંથી ત્રણ ટીમો તેમના હોમ ગ્રાઉન્ડ તરીકે બે-બે સ્થળોનો ઉપયોગ કરશે. દિલ્હી કેપિટલ્સ ટીમ વિશાખાપટ્ટનમ અને નવી દિલ્હીના અરુણ જેટલી સ્ટેડિયમમાં પોતાની હોમ મેચ રમશે. રાજસ્થાન રોયલ્સ (RR) પોતાની બે હોમ મેચ ગુવાહાટીમાં KKR અને CSK સામે રમશે, જ્યારે બાકીની હોમ મેચો જયપુરના સવાઈ માનસિંહ સ્ટેડિયમમાં યોજાશે. પંજાબ કિંગ્સ ટીમ ચંદીગઢના ન્યૂ પીસીએ સ્ટેડિયમમાં ચાર હોમ મેચ રમશે, અને લખનૌ સુપર જાયન્ટ્સ, દિલ્હી કેપિટલ્સ અને મુંબઈ ઈન્ડિયન્સ સામેની ત્રણ હોમ મેચ હિમાચલ પ્રદેશ ક્રિકેટ એસોસિએશન સ્ટેડિયમ, ધર્મશાલામાં રમશે.
IPL 2025 સીઝનની પ્લેઓફ મેચો લીગ રાઉન્ડ પુરો થયા પછી હૈદરાબાદ અને કોલકાતામાં રમાશે. ક્વોલિફાયર 1 અને એલિમિનેટર મેચો 20 અને 21 મેના રોજ હૈદરાબાદમાં રમાશે. ક્વોલિફાયર 2 મેચ 23 મેના રોજ કોલકાતામાં રમાશે. અને સૌથી મહત્વપૂર્ણ, IPL 2025ની ફાઇનલ મેચ 25 મે 2025ના રોજ કોલકાતાના ઐતિહાસિક ઇડન ગાર્ડન્સ સ્ટેડિયમમાં રમાશે. ઉલ્લેખનીય છે કે, 10 વર્ષ બાદ કોલકાતા IPL ફાઈનલ મેચની યજમાની કરશે. છેલ્લી વખત વર્ષ 2015માં કોલકાતાએ ફાઇનલ મેચનું આયોજન કર્યું હતું, જેમાં મુંબઈ ઈન્ડિયન્સે ચેન્નાઈ સુપર કિંગ્સને હરાવીને ખિતાબ જીત્યો હતો.
IPL 2025 schedule
ટ્રેન્ડિંગ સમાચાર
ટોપ સ્ટોરી
