IPL 2026: ચેન્નઈની દિલ્હી સામે 8 વિકેટે શાનદાર જીત, સંજુ સેમસન ઐતિહાસિક સદી ચૂક્યો

અરુણ જેટલી સ્ટેડિયમમાં રમાયેલી મેચમાં ચેન્નઈએ દિલ્હીને હરાવી પ્લેઓફની આશા જીવંત રાખી, જ્યારે દિલ્હી માટે હવે રસ્તો મુશ્કેલ. સંજુ સેમસનની 87 રનની તોફાની ઇનિંગ.

ipl 2026 csk vs dc chennai defeats delhi by 8 wickets samson 87

Source : PTI

Show Quick Read

Key points generated by AI, verified by newsroom

• ચેન્નઈ સુપર કિંગ્સે દિલ્હી કેપિટલ્સને 8 વિકેટે હરાવ્યું.
• સંજુ સેમસને 87 રનની અણનમ ઇનિંગ રમી.
• દિલ્હીનો પ્લેઓફમાં પહોંચવાનો માર્ગ મુશ્કેલ બન્યો.
• ચેન્નઈની પ્લેઓફની આશાઓ વધુ મજબૂત બની.

CSK vs DC IPL 2026: IPL 2026 ની 48મી મેચમાં ચેન્નઈ સુપર કિંગ્સ (CSK) એ દિલ્હી કેપિટલ્સ (DC) ને અરુણ જેટલી સ્ટેડિયમમાં 8 વિકેટે હરાવીને શાનદાર વિજય મેળવ્યો છે. આ મેચની સૌથી મોટી હાઇલાઇટ સંજુ સેમસનની તોફાની બેટિંગ રહી હતી. દિલ્હીએ પહેલા બેટિંગ કરતા 20 ઓવરમાં 155 રન બનાવ્યા હતા, જેના જવાબમાં ચેન્નઈએ માત્ર 17.3 ઓવરમાં 2 વિકેટ ગુમાવીને આ લક્ષ્યાંક સરળતાથી પાર કરી લીધો હતો. આ જીત સાથે ચેન્નઈએ પ્લેઓફમાં જવાની પોતાની આશા મજબૂત કરી છે, જ્યારે દિલ્હી માટે હવે આગળનો રસ્તો ઘણો મુશ્કેલ બની ગયો છે.

સંજુ સેમસન ઐતિહાસિક રેકોર્ડ બનાવતા ચૂક્યો

લક્ષ્યનો પીછો કરવા ઉતરેલી ચેન્નઈની શરૂઆત થોડી નબળી રહી હતી. કેપ્ટન રુતુરાજ ગાયકવાડ માત્ર 6 રન બનાવીને અને ઉર્વિલ પટેલ 17 રને આઉટ થયા હતા. માત્ર 45 રનના સ્કોર પર 2 વિકેટ પડ્યા પછી સંજુ સેમસન અને કાર્તિક શર્માએ બાજી સંભાળી લીધી હતી. બંનેએ 66 બોલમાં 114* રનની અણનમ ભાગીદારી નોંધાવી હતી. સંજુએ 52 બોલમાં 7 ચોગ્ગા અને 6 છગ્ગા ફટકારીને અણનમ 87 રનની મેચ વિનિંગ ઇનિંગ રમી હતી. જોકે, સંજુ અહીં એક મોટો રેકોર્ડ બનાવતા રહી ગયો. જો તેણે આ મેચમાં સદી ફટકારી હોત, તો તે આ સીઝનમાં 3 સદી ફટકારનાર પ્રથમ ખેલાડી બની શક્યો હોત અને વિરાટ કોહલી તેમજ જોસ બટલર જેવા દિગ્ગજોની ક્લબમાં સામેલ થઈ ગયો હોત. નોંધનીય છે કે, બટલર અને કોહલીએ એક જ સિઝનમાં સૌથી વધુ 4 સદી ફટકારી છે.

દિલ્હી માટે પ્લેઓફનો રસ્તો મુશ્કેલ બન્યો

મેચની શરૂઆતની વાત કરીએ તો, દિલ્હીના કેપ્ટન અક્ષર પટેલે ટોસ જીતીને પહેલા બેટિંગ કરવાનો નિર્ણય લીધો હતો. દિલ્હીની ટીમે 20 ઓવરમાં 7 વિકેટે 155 રન બનાવ્યા હતા, જેમાં સમીર રિઝવીએ 40 રનનું મહત્ત્વનું યોગદાન આપ્યું હતું. ચેન્નઈ તરફથી બોલિંગમાં નૂર અહેમદે 2 વિકેટ ઝડપી હતી. આ હાર દિલ્હી માટે બહુ મોટો ફટકો છે. આ સિઝનમાં 10 મેચમાંથી દિલ્હીનો આ 6ઠ્ઠો પરાજય છે. તેમની પાસે માત્ર 4 જીત સાથે 8 પોઈન્ટ છે. હવે જો તેઓ બાકીની ચારેય મેચ જીતી લે તો પણ 16 પોઈન્ટ સુધી જ પહોંચી શકશે. આવા સંજોગોમાં પ્લેઓફમાં પહોંચવા માટે તેમને એક મજબૂત નેટ રન રેટની જરૂર પડશે, જે હાલમાં ઘણું મુશ્કેલ લાગી રહ્યું છે.

ચેન્નઈની પ્લેઓફની આશાઓ મજબૂત

બીજી તરફ, આ શાનદાર જીત સાથે રુતુરાજ ગાયકવાડની આગેવાની હેઠળની ચેન્નઈ સુપર કિંગ્સે પોતાની પ્લેઓફની યાત્રા વધુ સરળ બનાવી દીધી છે. 10માંથી 5 મેચ જીતીને ચેન્નઈના ખાતામાં હવે 10 પોઈન્ટ છે. હવે ચેન્નઈને વધુ 4 મેચ રમવાની છે અને જો ટીમ આ ચારેય મેચ જીતી લે છે, તો તે 18 પોઈન્ટ પર પહોંચી જશે. આટલા પોઈન્ટ સાથે કોઈપણ ટીમ પ્લેઓફમાં પોતાની જગ્યા એકદમ પાક્કી કરી શકે છે. જોકે, હવે જોવાનું એ રહેશે કે ચેન્નઈ તેની બાકીની 4 લીગ મેચોમાં કેવું પ્રદર્શન કરે છે.