Jio અને Airtel નું ટેન્શન વધશે! આ બે કંપનીઓએ હાથ મિલાવવાની કરી લીધી તૈયારી
BSNL Vi Talks: BSNL અને Vodafone Idea (Vi) એ સાથે જોડાવાની તૈયારી કરી છે. હાલમાં બંને કંપનીઓ વચ્ચે ટાવર અને સ્પેક્ટ્રમ શેરિંગ સહિત અન્ય બાબતો પર ચર્ચા ચાલી રહી છે.
BSNL Vi Talks: સરકારી ટેલિકોમ કંપની BSNL અને પ્રાઇવેટ કંપની વોડાફોન આઈડિયા (Vi) એ હાથ મિલાવવાની તૈયારી કરી લીધી છે. જો આ બંને કંપનીઓ સાથે આવશે તો તેનાથી યુઝર્સને ફાયદો થશે અને બીજી તરફ જિયો (Jio) તથા એરટેલ (Airtel) માટે નવી પડકારો ઊભા થશે. રિપોર્ટ્સ અનુસાર, BSNL અને Vi વચ્ચે સ્પેક્ટ્રમ, ટાવર અને ફાઈબર શેરિંગ વગેરેને લઈને વાતચીત ચાલી રહી છે. જો આ વાતચીત સફળ રહેશે તો બંને કંપનીઓના યુઝર્સ માટે તે ફાયદાકારક સાબિત થશે.
બંને કંપનીઓ કેમ સાથે આવવા માંગે છે?
મીડિયા રિપોર્ટ્સ અનુસાર, બંને કંપનીઓએ પોતાના ખર્ચ ઘટાડવા, યુઝર્સને બહેતર સુવિધા આપવા અને 5G કનેક્ટિવિટીને ઝડપથી રોલઆઉટ કરવા માટે વાતચીત શરૂ કરી છે. બંને કંપનીઓ ટાવરથી લઈને સ્પેક્ટ્રમ સુધીની દરેક વસ્તુ શેર કરવા પર ચર્ચા કરી રહી છે. સરકાર તરફથી પણ આ વાતચીતની પુષ્ટિ કરવામાં આવી છે. સંચાર અને માહિતી ટેકનોલોજી સાથે જોડાયેલી સંસદીય સમિતિએ ટેલિકોમ વિભાગને બંને કંપનીઓની વાતચીતમાં મદદ કરવા જણાવ્યું છે.
આનાથી શું ફાયદો થશે?
રિપોર્ટ્સ અનુસાર, સંસદીય સમિતિનું માનવું છે કે બંને કંપનીઓ વચ્ચે સમજૂતી થવાથી યુઝર્સને બહેતર સર્વિસ મળી શકશે અને કંપનીઓ પણ પોતાની 5G સર્વિસને ઝડપથી લોન્ચ કરી શકશે. જોકે, સરકારે આ વાતચીતમાં દખલ કરવાનો ઇનકાર કર્યો છે. કેન્દ્રીય મંત્રી જ્યોતિરાદિત્ય સિંધિયાનું કહેવું છે કે આ સંબંધમાં અંતિમ નિર્ણય બંને કંપનીઓએ પોતે જ લેવો પડશે.
BSNL અને Vi બંને સામે પડકારોનો પહાડ
Vi અને BSNL બંને કંપનીઓ હાલમાં અનેક પડકારોનો સામનો કરી રહી છે. બંને કંપનીઓના યુઝર્સની સંખ્યા ઝડપથી ઘટી રહી છે. નેટવર્ક કવરેજની સમસ્યા અને દેશભરમાં 5G કનેક્ટિવિટી ન આપી શકવાને કારણે બંને કંપનીઓના યુઝર્સ જિયો અને એરટેલ તરફ વળી રહ્યા છે. બીજી તરફ, જો Vi અને BSNL સાથે આવી જાય છે, તો તેનાથી એરટેલ અને જિયો માટે મુશ્કેલીઓ ઊભી થઈ શકે છે. નોંધનિય છે કે, હાલમાં ભારતીય માર્કેટમાં જીયો ટોપ પર છે ત્યાર બાદ એરટેલ આવે છે. આ બન્ને કંપનીનું પ્રભુત્વ માર્કટ પર વધારે છે. જો વોડાફોન આઈડીયા અને બીએસએનએલ સાથે આવે છે તો જીયો અને એરટેલને પડકાર આપી શકે છે.
ટોપ સ્ટોરી
ટ્રેન્ડિંગ સમાચાર
