Hun To Bolish | હું તો બોલીશ | માફિયાઓ સામે મહિલાઓ મેદાને

રાજ્યની જીવાદોરી સમાન નર્મદા નદીની ઉપનદી ઓરસંગ જે  છોટાઉદેપુર શહેર અને જિલ્લા માટે ખૂબ મહત્વની છે. કારણ કે આ નદી શહેર સહિત જિલ્લામાં પીવાના પાણી,સિંચાઈ અને કૃષિ માટે ઉપયોગી છે. પણ વર્ષોથી ખનન માફિયાઓએ કરેલા ખનના કારણે નદીના બેડમાંથી રેતી ગાયબ થઈ ગઈ છે. માત્ર કાંકરા અને પથ્થરો જ છે. જેના કારણે ભૂગર્ભજળ નીચે ઉતરી ગયા,ઉનાળામાં પાણીની તંગી વધી અને વોટર વર્ક્સ પર અસર થઈ હતી. ખનન વિરૂદ્ધ અનેક વાર અવાજ ઉઠ્યો હતો. છોટા ઉદેપુર નગરપાલિકાના ભાજપના જ સત્તાધીશોએ જિલ્લા કલેક્ટરને રેલી કાઢીને આવેદનપત્ર આપ્યું હતું. પ્રમુખ, ઉપપ્રમુખ અને કારોબારી અધ્યક્ષ સહિત તમામ સભ્યોએ વારીગૃહ, રંગપુર નાકા અને ફતેપુરા વોટર વર્ક્સ આસપાસ ચાલતા ગેરકાયદે રેતી ખનન અટકાવવા માંગ કરી હતી. કારોબારી અધ્યક્ષ સહિત મહિલા સભ્યોએ ચીમકી આપી હતી કે પ્રશાસને જો રેતી ખનન બંધ ન કરાવ્યું તો અમે મહિલા સભ્યો જાતે નદીમાં ઉતરીશું અને રેતી માફિયાઓ સામે સીધો મુકાબલો કરીશું! તેમને સજા આપવામાં અમે પાછા નહીં પડીએ.