i-Khedut: પ્રાકૃતિક કૃષિ કરતાં ખેડૂતો માટે દેશી ગાય નિભાવ ખર્ચ સહાય યોજના માટે ખૂલ્યું આઈ ખેડૂત પોર્ટલ, આ તારીખ પહેલા કરો અરજી

દેશી ગાય નિભાવ ખર્ચ સહાય યોજના અન્વયે ગાય આધારિત પ્રાકૃતિક ખેતી કરતાં ખેડૂત કુટુંબને એક ગાય માટે નિભાવ ખર્ચ પેટે રૂ.9૦૦/- પ્રતિ માસ મર્યાદામાં અને વાર્ષિક રૂપિયા 1૦,8૦૦ ની સહાય આપવામાં આવે છે.

ફાઈલ તસવીર

Gujarat Agriculture News: ખેડૂતો માટે અસરકારક કૃષિ વ્યવસ્થાપન, કૃષિ ઉત્પાદનની અનિશ્ચિતતા તથા કૃષિ ખર્ચમાં ઘટાડો થાય અને ખેડૂત પ્રાકૃતિક સામગ્રી દ્રારા જાતે જ પાક વૃદ્ધિ તરફ ઝોક દાખવે તે માટે રાજય સરકાર દ્રારા આત્મનિર્ભર પેકેજ જાહેર કરાયું છે. પ્રાકૃતિક ખેતીથી ભૂમિની ભેજ સંગ્રહ ક્ષમતા, ફળદ્રુપતા અને ઉત્પાદન ક્ષમતામાં વધારો, નહિવત ઉત્પાદન ખર્ચ, પાણીની બચત સાથે પર્યાવરણ માનવીય સ્વાસ્થ્યનું રક્ષણ અને સંવર્ધનની બાબતોને ધ્યાને લઈ સરકાર દ્વારા પ્રાકૃતિક કૃષિ કરતાં ખેડૂતો માટે દેશી ગાય નિભાવ ખર્ચ યોજના અમલમાં મૂકવામાં આવી છે. જેનો લાભ લેવા માટે આઈ ખેડૂત પોર્ટલ તા.13/૦5/200થી 27/૦5/2022 સુધી ખુલ્લું મુકવામાં આવેલ છે.

દેશી ગાય નિભાવ ખર્ચની કેટલી મળે છે સહાય

દેશી ગાય નિભાવ ખર્ચ સહાય યોજના અન્વયે ગાય આધારિત પ્રાકૃતિક ખેતી કરતાં ખેડૂત કુટુંબને એક ગાય માટે નિભાવ ખર્ચ પેટે રૂ.9૦૦/- પ્રતિ માસ મર્યાદામાં અને વાર્ષિક રૂપિયા 1૦,8૦૦ ની સહાય આપવામાં આવે છે.

આ યોજના હેઠળ કયા ખેડૂત લાભાર્થી કરી શકે છે અરજી

•  અરજદાર ખેડૂત અરજીના સમયે આઇડેન્ટિફિકેશન ટેગ (કડીનંબર) સહિતની એક દેશી ગાય ધરાવતો હોવો જોઈએ અને તેના છાણ-ગૌમુત્રથી ધારણ કરેલ જમીન પૈકી ઓછામાં ઓછા ૧ એકર વિસ્તારમાં પ્રાકૃતિક ખેતી કરતો  હોવો જોઈએ.
• આ યોજના હેઠળ એક ખાતા (નમુના નંબર 8-અ મુજબ) દીઠ એક લાભાર્થીને જ સહાય મળવાપાત્ર થશે. 
• અરજદાર ખેડૂતે પ્રાકૃતિક કૃષિના માસ્ટર ટ્રેનર્સ પાસેથી અથવા પ્રાકૃતિક કૃષિની તાલીમ લીધેલી હોવી જોઈશે.

કેવી રીતે કરશો અરજી

• અરજદાર ખેડૂતે પ્રોજેકટ ડાયરેક્ટર, આત્માને ઓનલાઈન આઈ-ખેડૂત પોર્ટલ પર અરજી કરવાની રહેશે.
• ગ્રામ્યકક્ષાએ ઇ-ગ્રામ સેન્ટર મારફતે અથવા જ્યાં કોમ્પ્યુટર–ઇન્ટરનેટની સુવિધા હોય ત્યાંથી અરજી કરી શકશે.
• ઓનલાઈન અરજી કર્યા બાદ અરજદારે અરજીની પ્રિન્ટઆઉટ મેળવી તેની ઉપર સહી, અંગુઠો કરીને અરજી સાથે 8-અ ની નકલ, આધારકાર્ડ, સયુક્ત ખાતેદાર હોય તો અન્ય ખાતેદારનું સંમતી પત્રક અને બેન્ક પાસબુકની નકલ અથવા રદ કરેલ ચેક ના જોડાણ સાથે અરજી કર્યાના દિન-7માં ગ્રામસેવક, બીટીમએમ, એટીએમ અથવા પ્રોજેકટ ડાયરેક્ટર–આત્માની કચેરીને રજૂ કરવાની રહેશે.

અરજી કરવાની કઈ છે છેલ્લી તારીખ

દેશી ગાય નિભાવ ખર્ચ સહાય યોજના અન્વયે ગાય આધારિત પ્રાકૃતિક ખેતી કરતાં ખેડૂતો આઇ ખેડૂત પોર્ટલ પર 27/05/2022 સુધી અરજી કરી શકે છે.