Delhi : દિલ્હીમાં વધુ એક કાળજુ કંપાવી દેતો હત્યાકાંડ, યુવકે પરિવારના 4 સભ્યોને ઉતાર્યા મોતને ઘાટ

આરોપી યુવક નશાની લતથી પીડિત છે અને તાજેતરમાં જ નશા મુક્તિ કેન્દ્રમાંથી બહાર આવ્યો હતો. પોલીસે આરોપી યુવકની ઓળખ પણ કરી લીધી છે. આરોપીનું નામ કેશવ છે.

પ્રતિકાત્મક ફોટો

Delhi Boy Killed Family Members: શ્રદ્ધા વાલ્કર હત્યા કેસને લઈને વિવાદ હજી સમ્યો નથી ત્યાં રાજધાની દિલ્હીમાં જ વધુ એક રૂંવાડા ઉભા કરી નાખે તેવી ઘટનાએ સનસનાટી મચાવી દીધી છે. દિલ્હીના સાઉથ વેસ્ટ જીલ્લાના પાલમ વિસ્તારમાં એક ઘરમાંથી 4 લોકોની હત્યા નિપજાવવામાં આવી હોવાની જઘન્ય ઘટના સામે આવી છે. આશ્ચર્યજનક વાત એ છે કે, પરિવારના જ યુવકે ચારેય પરિજનોની હત્યા નિપજાવી હોવાની પોલીસને આશંકા છે. 

પોલીસના જણાવ્યા પ્રમાણે એક યુવકે જ પોતાના માતા-પિતા, એક બહેન અને તેની દાદીની હત્યા કરી હતી. ચારે ચાર લોકોની ચાકુ મારીને હત્યા નિપજાવવામાં આવી હોવાનું સામે આવ્યું છે. પોલીસના જણાવ્યા પ્રમાણે તેમને આ ઘટનાની જાણકારી મંગળવાર રાત્રે 10:31 વાગ્યે મળી હતી. 

આરોપી યુવક નશાની લતથી પીડિત છે અને તાજેતરમાં જ નશા મુક્તિ કેન્દ્રમાંથી બહાર આવ્યો હતો. પોલીસે આરોપી યુવકની ઓળખ પણ કરી લીધી છે. આરોપીનું નામ કેશવ છે, જેની ઉંમર 25 વર્ષ છે અને તેની પણ ધરપકડ કરવામાં આવી છે. ઉલ્લેખનીય છે કે પોલીસે આ મામલે વધુ કોઈ માહિતી આપી નથી.

મૃત્યુ પામેલા લોકોના નામ

આરોપીના પિતા 42 વર્ષીય દિનેશ કુમાર
દિવાનો દેવી, આરોપીની દાદી
આરોપીની માતા દર્શન સૈની (40)
ઉર્વશી, આરોપીની બહેન (22)
દિલ્હીમાં ગુનાખોરીનો ગ્રાફ વધી રહ્યો છે

જાહેર છે કે, દિલ્હીનો શ્રદ્ધા મર્ડર કેસ પણ હાલમાં ચર્ચામાં છે. શ્રદ્ધાની તેના લિવ-ઇન પાર્ટનર આફતાબ પૂનાવાલા દ્વારા નિર્દયતાથી હત્યા કરવામાં આવી હતી અને તેના શરીરના 35 ટુકડા કરવામાં આવ્યા હતા. શ્રદ્ધાના હત્યારા આફતાબે પણ પોતાનો ગુનો કબૂલી લીધો છે અને દિલ્હી પોલીસ આ મામલે ગંભીરતાથી તપાસ કરી રહી છે. પોલીસ શ્રદ્ધાના મૃતદેહના ટુકડા શોધવાનો પ્રયાસ કરી રહી છે. મંગળવારે કોર્ટે આફતાબના પોલીસ રિમાન્ડમાં 4 દિવસનો વધારો કર્યો હતો.

આફતાબનો પોલીગ્રાફ ટેસ્ટ કરવામાં આવ્યો

હત્યાના આરોપી આફતાબ અમીન પૂનાવાલાનો પોલીગ્રાફ ટેસ્ટ મંગળવારે સાંજે કરવામાં આવ્યો હતો. શહેરની અદાલતે દિલ્હી પોલીસને પરવાનગી આપી હતી. પોલીસને શ્રદ્ધા અને પૂનાવાલા જે ફ્લેટમાં રહેતા હતા ત્યાં લોહીના ડાઘા મળ્યા છે. આ સાથે પોલીસને અન્ય પુરાવા પણ મળ્યા છે. બચાવ પક્ષના વકીલના જણાવ્યા અનુસાર, જજે પૂનાવાલાને પૂછ્યું હતું કે, તમે જાણો છો કે તમે શું કર્યું છે. જવાબ આપતા પૂનાવાલાએ કોર્ટને કહ્યું હતું કે તેણે "ઈરાદાપૂર્વક" આ કૃત્ય નથી આચર્યું પરંતુ "હિટ ઓફ ધ મૂવમેંટ" માં આવીને આ ગુનો આચર્યો હતો.