મહેસાણા નગરપાલિકા ચૂંટણીમાં ખૂની ખેલ: ભાજપના ઉમેદવારના ભાણાની હત્યા, કોંગ્રેસ ઉમેદવારના પતિ સહિત 4 સામે ફરિયાદ

Mehsana municipal election murder: મહેસાણાના તાવડીયા ચોકડી પાસે મોડી રાત્રે રાજકીય અદાવતમાં 22 વર્ષીય યુવકની ઘાતકી હત્યા; DySP ના મતે આ એક પૂર્વ આયોજિત કાવતરું, પોલીસે FSL ની મદદથી તપાસ શરૂ કરી.

Mehsana Ward 4 Murder: BJP Candidate Relative Killed by Congress Husband

Source : ai

Show Quick Read

Key points generated by AI, verified by newsroom

• મહેસાણામાં વોર્ડ 4 ચૂંટણીની અદાવતમાં ભાજપ ઉમેદવારના સગાની હત્યા.
• કોંગ્રેસ ઉમેદવારના પતિ અને ત્રણ અન્ય સામે હત્યાનો ગુનો.
• રાજકીય અદાવતમાં મિતેન પર છરી-ધોકા વડે જીવલેણ હુમલો.
• પોલીસે ગુનો નોંધી ફરાર આરોપીઓને પકડવા સર્ચ ઓપરેશન શરૂ કર્યું.

Mehsana municipal election murder: મહેસાણામાં મહાનગરપાલિકાની ચૂંટણીના માહોલ વચ્ચે રાજકીય હરીફાઈએ હવે લોહિયાળ વળાંક લીધો છે. શહેરમાં વોર્ડ નંબર 4 ની ચૂંટણીની અદાવતમાં ભાજપના ઉમેદવારના 22 વર્ષીય સગા ભાણાની જાહેરમાં ઘાતકી હત્યા કરી દેવામાં આવી છે. આ કેસમાં સૌથી ચોંકાવનારી વાત એ છે કે, હત્યાનો આરોપ સામે પક્ષે ઊભેલા કોંગ્રેસના ઉમેદવારના પતિ અને અન્ય 3 શખ્સો પર લાગ્યો છે. હાલમાં એ ડિવિઝન પોલીસે કોંગ્રેસના ઉમેદવારના પતિ સહિત કુલ 4 લોકો સામે હત્યાનો ગુનો દાખલ કરીને ફરાર આરોપીઓને પકડવા ચક્રો ગતિમાન કર્યા છે.

મળતી માહિતી મુજબ, 25 એપ્રિલ 2026 ના રોજ મોડી રાત્રે 12:40 વાગ્યાની આસપાસ મહેસાણાની તાવડીયા ચોકડી રોડ પર આ હચમચાવી મૂકે તેવી ઘટના બની હતી. રાત્રિના સમયે ફરિયાદી ધીમંત ચૌધરીના મોટા બાપાના દીકરા હર્ષ સાથે કેટલાક શખ્સો ગાળાગાળી કરીને ઝઘડો કરી રહ્યા હતા. આ દરમિયાન મામલો થાળે પાડવા અને હર્ષને છોડાવવા માટે ધીમંત અને તેનો 22 વર્ષીય ભાઈ મિતેન ચૌધરી વચ્ચે પડ્યા હતા. ત્યારે ઉશ્કેરાયેલા હુમલાખોરોએ મિતેન અને ધીમંત પર ધોકા અને છરી વડે જીવલેણ હુમલો કરી દીધો હતો. જેમાં ધવલ અને મયુરે ધોકા માર્યા હતા, જ્યારે યશ નામના શખ્સે મિતેનની પીઠના ભાગે છરીનો ઘાતક ઘા ઝીંકી દીધો હતો. આ ગંભીર હુમલામાં મિતેનનું સારવાર દરમિયાન કરુણ મોત નીપજ્યું હતું.

આ સમગ્ર હત્યાકાંડ પાછળ વોર્ડ નંબર 4 ની રાજકીય અદાવત હોવાનું સ્પષ્ટ થયું છે. મૃતક મિતેનના મામા મહેન્દ્રભાઈ ચૌધરી વોર્ડ 4 માંથી ભાજપના ઉમેદવાર છે, જ્યારે તેમની સામે કોંગ્રેસમાંથી લીલાબેન ભરતભાઈ ચૌધરી ચૂંટણી લડી રહ્યા છે. પોલીસ ફરિયાદ મુજબ, મિતેનની હત્યા કરનારા મુખ્ય આરોપીઓમાં લીલાબેનના પતિ ભરતભાઈ ચૌધરી, ધવલ ચૌધરી, મયુર ચૌધરી અને યશ ચૌધરીનો સમાવેશ થાય છે. આરોપીઓએ આતંક મચાવતા ગાડીના કાચ તોડીને અંદાજે 3000 રૂપિયાનું નુકસાન પણ કર્યું હતું અને જાનથી મારી નાખવાની ધમકીઓ આપી હતી.

ઘટનાની જાણ થતાં જ એ ડિવિઝન પોલીસનો કાફલો તાત્કાલિક દોડી ગયો હતો. પોલીસ ઇન્સ્પેક્ટર રાજેશકુમાર પારગીએ આ મામલે ગુનો નોંધીને વધુ તપાસ હાથ ધરી છે. મહેસાણાના DySP મિલાપ પટેલના જણાવ્યા અનુસાર, પ્રાથમિક તપાસમાં આ હત્યા એક પૂર્વ આયોજિત કાવતરું હોવાનું લાગી રહ્યું છે. આરોપીઓએ ભેગા મળીને, ઘાતક હથિયારો સાથે જીલ્લા મેજિસ્ટ્રેટના જાહેરનામાનો ભંગ કરીને આ ગુનાને અંજામ આપ્યો છે. હાલ પોલીસે અલગ-અલગ ટીમો બનાવી છે અને FSL (ફોરેન્સિક સાયન્સ લેબોરેટરી) ની મદદ સાથે ફરાર આરોપીઓને ઝડપી પાડવા માટે સઘન સર્ચ ઓપરેશન શરૂ કરી દીધું છે.

આ પણ વાંચો

વલસાડના ઉમરગામમાં 69 વર્ષીય વૃદ્ધને 'ડિજિટલ અરેસ્ટ' કરી સાયબર ગઠિયાઓએ 1.11 કરોડ પડાવ્યા