OMR શીટ નહીં, હવે કોમ્પ્યુટર પર યોજાઇ શકે છે NEET-UG પરીક્ષા, NTAએ આ પરીક્ષાઓમાં કર્યો ફેરફાર

પ્રવેશ પરીક્ષાની તૈયારી કરી રહેલા વિદ્યાર્થીઓ માટે સારા સમાચાર છે. આ પરીક્ષાઓ હવે કમ્પ્યુટર આધારિત ટેસ્ટ (CBT) મોડમાં લેવામાં આવશે

પ્રતિકાત્મક તસવીર

પ્રવેશ પરીક્ષાની તૈયારી કરી રહેલા વિદ્યાર્થીઓ માટે સારા સમાચાર છે. નેશનલ ટેસ્ટિંગ એજન્સી (NTA) એ તાજેતરમાં ઘણી મોકૂફ રાખવામાં આવેલી પરીક્ષાઓ માટે નવી તારીખો જાહેર કરી હતી. હવે આ પરીક્ષાઓમાં પણ મહત્વનો ફેરફાર કરવામાં આવ્યો છે. આ પરીક્ષાઓ હવે કમ્પ્યુટર આધારિત ટેસ્ટ (CBT) મોડમાં લેવામાં આવશે, જે અગાઉની પેપર અને પેન સિસ્ટમથી અલગ છે.

NEET વિવાદ પછી NTA એ પેપર લીક અથવા અનિયમિતતાના ડરને કારણે ઘણી પરીક્ષાઓ રદ અથવા સ્થગિત કરી દીધી હતી. આમાં NEET PG, UGC NET, Joint CSIR UGC NET અને NCET 2024 પરીક્ષાઓનો સમાવેશ થાય છે. તાજેતરમાં NTA એ આમાંથી કેટલીક પરીક્ષાઓની નવી તારીખો જાહેર કરી છે.

પરીક્ષાઓની નવી તારીખો નીચે મુજબ છે

NEET  વિવાદ બાદ સ્થગિત કરવામાં આવેલી Joint CSIR UGC NET હવે 25 થી 27 જૂલાઈ વચ્ચે લેવામાં આવશે. સ્થગિત કરવામાં આવેલી UGC NET પરીક્ષા હવે 21 ઓગસ્ટથી 8 સપ્ટેમ્બરની વચ્ચે લેવામાં આવશે. આ ઉપરાંત, NCET પરીક્ષા પણ 10મી જૂલાઈ 2024ના રોજ લેવામાં આવશે અને તે પણ NTA દ્વારા જ લેવામાં આવશે. જો કે, NEET PG 2024 ની પરીક્ષાની તારીખો હજુ જાહેર કરવાની બાકી છે. સૂત્રોના જણાવ્યા અનુસાર, નેશનલ બોર્ડ ઓફ એક્ઝામિનેશન (NBE) ટૂંક સમયમાં NEET PG પરીક્ષાની નવી તારીખ જાહેર કરી શકે છે. તેની જાહેરાત સોમવાર અથવા મંગળવાર સુધીમાં થવાની શક્યતા છે.

પરીક્ષાઓમાં મોટો ફેરફાર

આ પરીક્ષાઓ પહેલાની જેમ પેન અને પેપર મોડને બદલે કોમ્પ્યુટર આધારિત ટેસ્ટ મોડમાં લેવામાં આવશે. આ બંને (UGC NET અને CSIR UGC NET) પરીક્ષાઓ NTA દ્વારા લેવામાં આવે છે. સૂત્રોનું કહેવું છે કે કેન્દ્ર સરકાર NEET-UGને પેપર-પેનથી ઓનલાઈન મોડમાં લેવાની શક્યતા પર પણ વિચાર કરી રહી છે. એકંદરે આ ફેરફાર વિદ્યાર્થીઓ માટે સારો સાબિત થઈ શકે છે. કોમ્પ્યુટર આધારિત પરીક્ષાઓ વધુ સુરક્ષિત અને છેતરપિંડીની ઓછી સંભાવના માનવામાં આવે છે. ઉપરાંત, પરિણામ પણ ઝડપથી આવે છે.

અંડરગ્રેજ્યુએટ મેડિકલ એન્ટ્રન્સ ટેસ્ટ એટલે કે NEET-UG પરંપરાગત રીતે OMR શીટ (પેન-પેપર) આધારિત પરીક્ષા છે, જ્યારે UGC-NET જે 2018 થી કમ્પ્યુટર આધારિત છે, આ વખતે તે પેન-એન્ડ-પેપર ઓએમઆર મોડમાં લેવામાં આવી હતી.