Connect With Google: સાયન્સ સિટી ખાતે યોજાશે કનેક્ટ વિથ ગૂગલ, એપ ડેવલપર્સને અપાશે ખાસ ટિપ્સ

ગુજરાત સરકારના સહયોગથી ગુગલ દ્વારા 8 ઓગસ્ટના રોજ આ ખાસ કાર્યક્રમનું આયોજન કરવામાં આવ્યું છે.

ફાઈલ તસવીર

Connect With Google: ગુજરાત સરકારના વિજ્ઞાન અને ટેક્નોલોજી વિભાગ હેઠળ કાર્યરત ગુજરાત સાયન્સ સિટી ખાતે ‘કનેક્ટ વિથ ગુગલ’ નામના કાર્યક્રમનું આયોજન થવા જઈ રહ્યું છે. ગુજરાતના એપ ડેવલપર્સને પ્રોત્સાહિત કરવા માટે અને કૌશલ્ય નિર્માણના હેતુથી ગુજરાત સરકારના સહયોગથી ગુગલ દ્વારા 8 ઓગસ્ટના રોજ ખાસ કાર્યક્રમનું આયોજન કરવામાં આવ્યું છે. જે અંતર્ગત ગુજરાતના એપ ડેવલપર્સને બિઝનેસ સફળ બનાવવામાં મદદ મળી રહે તે હેતુથી ઈન્ટરેક્ટિવ સ્કિલ બિલ્ડિંગ કાર્યક્રમ યોજાશે. જેમાં 500 જેટલા એપ ડેવલપર્સ હાજર રહેશે.

એપ ડેવલપર્સને અપાશે ખાસ ટિપ્સ

આ કાર્યક્રમમાં એક સફળ એપ બિઝનેસનું કઈ રીતે નિર્માણ કરવું તે અંગેના મુખ્ય પાસાઓ અંગે એપ ડેવલપર્સને શિક્ષણ અને તાલીમ આપવામાં આવશે. એપ ડેવલપર્સને કઈ રીતે હાઈ ક્વોલિટીની એપ બનાવવી અને તેને ગુગલ પ્લે સ્ટોર પર લોન્ચ કરવી તદુપરાંત એપ્લિકેશનના યુઝર કઈ રીતે વધારવા તે અંગે તેમજ મોનેટાઈઝની નીતિઓ અંગે પણ માર્ગદર્શન આપવામાં આવશે.

માર્ચમાં પ્રથમ વખત સુરતમાં થયું હતું આયોજન

આ કાર્યક્રમમાં ગૂગલના નિષ્ણાતો, પ્રખ્યાત એપ્લિકેશનના નિર્માતાઓ તેમજ એપ -બિઝનેસ સાથે સંકળાયેલા નિષ્ણાતો સહભાગીઓને આ અંગે શિક્ષણ અને તાલીમ આપશે. ઉલ્લેખનીય છે કે ‘કનેક્ટ વિથ ગુગલ’ શ્રેણીનો આ બીજો કાર્યક્રમ છે. આ પહેલાં ગત માર્ચ મહિનામાં પ્રથમ કાર્યક્રમનું સુરતમાં આયોજન કરવામાં આવ્યું હતું.