Gujarat Assembly Election Result 2022 : CM ભૂપેંદ્ર પટેલે કાર્યકરોનો આભાર માન્યો, કહ્યું- આ ઉમેદવારની નહિ તમારી જીત
ઘાટલોડિયા બેઠક પરથી રાજ્યના મુખ્યમંત્રી ભૂપેન્દ્ર પટેલની શાનદાર જીત થઈ છે. આ જીત બાદ તેમણે લોકોનો અને કાર્યકરોનો આભાર માન્યો હતો.
Gujarat Election Results 2022: ઘાટલોડિયા બેઠક પરથી રાજ્યના મુખ્યમંત્રી ભૂપેન્દ્ર પટેલની શાનદાર જીત થઈ છે. આ જીત બાદ તેમણે લોકોનો અને કાર્યકરોનો આભાર માન્યો હતો. તેમણે કહ્યું, આ ઉમેદવારની નહિ તમારી જીત છે. અહીં તમે બધા ચૂંટણી લડ્યા હતા. આપણી જવાબદારી નરેન્દ્ર મોદીએ મુકેલા વિશ્વાસને પાર પાડવાની હતી. પ્રજાના નાનામાં નાના અને સારા કામ થાય એ માટે આપણે પ્રયાસ કરીશું. આપ તમામ કાર્યકર્તાઓને અભિનંદન. મુખ્યમંત્રી ભૂપેન્દ્ર પટેલે કહ્યું, તમે ઘાટલોડિયાની સીટ ઉપર ઐતિહાસિક જીત અપાવી છે. આપણે નંબર વન હતા અને નંબર વન રાખ્યા છે. આપણે સાથે છીએ એની આ જીત છે.
ઘાટલોડિયા બેઠક પર CM ભૂપેન્દ્ર પટેલનો 1 લાખ 91 હજાર મતથી વિજય
ગુજરાત વિધાનસભા ચૂંટણીમાં ભાજપની ભવ્ય જીત થઈ છે. ભાજપને અત્યાર સુધીના ઈતિહાસમાં સૌથી વધુ બેઠકો મળી રહી છે. પ્રથમ વખત રાજ્યના તમામ જિલ્લામાં ભગવો લહેરાયો છે. ભાજપની ભવ્ય જીતથી પ્રધાનમંત્રી નરેન્દ્ર મોદી અને અમિત શાહે ગુજરાતમાં ભવ્ય વિજય બદલ મુખ્યમંત્રી અને પ્રદેશ પ્રમુખ સીઆર પાટીલને ટેલીફોનના માધ્યમથી શુભેચ્છા પાઠવી છે.
ચૂંટણી પંચની વેબસાઇટ મુજબ 182 સીટના વલણ સામે આવ્યા છે. જેમાં ભાજપ 154, આમ આદમી પાર્ટી 6, કોંગ્રેસ 18 અને અન્ય 4 સીટ પર આગળ છે. વોટ શેરની વાત કરીએ તો ભાજપને 53.3 ટકા, કોંગ્રેસને 26.8 ટકા અને આમ આદમી પાર્ટીને 12.8 ટકા વોટ શેર મળ્યો છે.
માધવસિંહ સોલંકીના નામે કયો છે રેકોર્ડ
ખામ થીયરી માટે જાણીતા માધવસિંહ સોલંકીના નામે એક મોટો રેકોર્ડ નોંધાયો છે, જેને આજદિન સુધી કોઈ તોડી શક્યું નથી. ગુજરાતમાં સૌથી વધુ વિધાનસભા બેઠકો જીતી મુખ્યમંત્રી બનવાનો રેકોર્ડ તેમના નામે છે. માધવસિંહ સોલંકી ગુજરાતના 7મા મુખ્યમંત્રી હતા. તેમણે 182 બેઠકમાંથી 149 બેઠક જીતી હતી. માધવસિંહ સોલંકી 1976માં ગુજરાતના મુખ્યમંત્રી બન્યા હતા. ત્યારબાદ કૉંગ્રેસ પાર્ટીના નેતા તરીકે તેઓ 4 વખત મુખ્યમંત્રી બન્યા હતા. વર્ષ 1985ની વિધાનસભાની ચૂંટણીમાં સૌથી વધુ 149 બેઠકો જીતાડીને ગુજરાતમાં કૉંગ્રેસનો સુરજ સોળે કળાએ ખીલવવામાં તેમનું મોટું યોગદાન રહ્યુ હતું. માધવસિંહનો આ રેકોર્ડ આજ દિન સુધી કોઈ તોડી શક્યું નથી.
ગુજરાતમાં 27 વર્ષથી ભાજપની સરકાર છે
રાજ્યમાં છેલ્લા 27 વર્ષથી ભાજપની સરકાર છે. ગુજરાતમાં ભાજપનું અગાઉનું શ્રેષ્ઠ પ્રદર્શન 2002માં હતું, જ્યારે તેણે 182 સભ્યોની વિધાનસભામાં 127 બેઠકો જીતી હતી. ગુજરાતમાં પરંપરાગત રીતે ભાજપ અને કોંગ્રેસ વચ્ચે સ્પર્ધા રહી છે, પરંતુ આ વખતે AAP મેદાનમાં ઉતરતા ત્રિકોણીય બની છે. જો કે, એક્ઝિટ પોલના અનુમાનમાં કહેવામાં આવ્યું છે કે ભાજપને મોટી જીત મળશે.
ટોપ સ્ટોરી
ટ્રેન્ડિંગ સમાચાર
