આ કોરોના વોરીયર પોલીસ યુવતી પેટમાં 7 મહિનાના ગર્ભ સાથે રોજ આવે છે ફરજ પર, જાણો વિગત

ગુજરાતમાં કોરોનાના કેસોની સંખ્યા વધી રહી છે ત્યારે કોરોના વોરીયર્સ પોતાના જીવની પરવા કર્યા વિના કોરોના વાયરસનો ચેપ ફેલાતો રોકવા ઝઝૂમી રહ્યા છે

અમદાવાદઃ ગુજરાતમાં કોરોનાના કેસોની સંખ્યા વધી રહી છે ત્યારે કોરોના વોરીયર્સ પોતાના જીવની પરવા કર્યા વિના કોરોના વાયરસનો ચેપ ફેલાતો રોકવા ઝઝૂમી રહ્યા છે. આ કોરોના વોરીયર્સમાં  સોમનાથ કોસ્ટલ પોલીસ સ્ટેશનમાં કોન્સ્ટેબલ તરીકે ફરજ બજાવતાં અને સૂત્રાપાડામાં રહેતાં નયનાબેન વાઘનો પણ સમાવેશ થાય છે. નયનાબેન વાઘ હાલમાં સગર્ભા છે અને 7 મહિનાના ગર્ભ સાથે પોતાની ફરજ બજાવવા માટે રોજ હાજર થઈ જાય છે. નયનાબેન  રોજ સૂત્રાપાડાથી અચૂકપણે રોજ પોલીસ સ્ટેશન પોતાની ફરજ બજાવવા પહોંચી જાય છે. હાલમાં તમામ વાહનવ્યવહાર બંધ છે તેથી તેમના પતિ તેને રોજ સ્કૂટર પર તેમને પોલીસ સ્ટેશન મૂકી જાય છે. સાંજે તેમની ફરજ પતે પછી તેમના પતિ આવીને તેમને લઈ જાય છે. સોમનાથ કોસ્ટલ પોલીસ સ્ટેશનના પી.આઈ.એ નયનાબેનને તકલીફ ના પડે એટલા માટે પોલીસ સ્ટેશનમાં વાયરલેસ પર ફરજ પર મૂક્યાં છે. કટોકટીના આ સમયમાં વાયરલેસ પર સતત મેસેજ આવ્યા જ કરે છે તેથી નયનાબેન સતત વ્યસ્ત જ રહે છે.