Byju's Layoff: Byju's એ તેની ગ્રૂપ કંપનીઓમાં ખર્ચ ઘટાડવાના નામે કુલ 2500 લોકોને નોકરીમાંથી કાઢી મૂક્યા

600 કરાર આધારિત કર્મચારીઓને કાઢી મૂકવામાં આવ્યા હતા જેમનો કાર્યકાળ ઓક્ટોબરથી નવેમ્બરમાં સમાપ્ત થઈ રહ્યો હતો.

પ્રતિકાત્મક તસવીર

Byju's Layoff: દેશની એડટેક કંપનીઓ સતત તેમના કર્મચારીઓની છટણી કરી રહી છે. ઓનલાઈન લર્નિંગ સર્વિસ ફર્મ Byju’sએ તેની અલગ-અલગ ગ્રુપ કંપનીઓમાં લગભગ 2500 કર્મચારીઓને નોકરીમાંથી કાઢી મૂક્યા છે. આ કર્મચારીઓમાં પૂર્ણ-સમયથી કોન્ટ્રાક્ટ સુધી કામ કરતા કર્મચારીઓનો સમાવેશ થતો હતો. Byju’sએ 27 અને 28 જૂનના રોજ કુલ 1500 કર્મચારીઓને કાઢી મૂક્યા હતા, જેમાં ટોપપર લર્નિંગ પ્લેટફોર્મ અને સ્ટાર્ટઅપ કંપની વ્હાઇટહેટ જુનિયરનો સમાવેશ થાય છે, જે બાળકોને કોડિંગ શીખવે છે.

Byju’sએ માત્ર Topprમાંથી 1200 લોકોને કાઢી મૂક્યા છે જેમાં 300 થી 350 કર્મચારીઓ કાયમી છે. તે જ સમયે, 300 લોકોને રાજીનામું આપવાનું કહેવામાં આવ્યું હતું, તેની સાથે એ પણ કહેવામાં આવ્યું હતું કે તેમને એકથી દોઢ મહિના સુધી પગાર નહીં મળે. 600 કરાર આધારિત કર્મચારીઓને કાઢી મૂકવામાં આવ્યા હતા જેમનો કાર્યકાળ ઓક્ટોબરથી નવેમ્બરમાં સમાપ્ત થઈ રહ્યો હતો. માનવામાં આવી રહ્યુ છે કે ખર્ચમાં કાપને કારણે આ નિર્ણય લેવામાં આવ્યો છે.

Byju’sએ ગયા વર્ષે Topprને $150 મિલિયનમાં ખરીદ્યું હતું. કંપનીનું કહેવું છે કે તેણે Topprના એકીકરણની પ્રક્રિયા પૂર્ણ કરી છે અને તેના લગભગ 80 ટકા કર્મચારીઓને જાળવી રાખ્યા છે. એક્વિઝિશન પ્રક્રિયા પૂર્ણ થયા પછી, Topprના સેલ્સ અને માર્કેટિંગ વિભાગના કર્મચારીઓ કંપની સાથે રહે છે, બાકીનાને બરતરફ કરવામાં આવ્યા છે. કંપનીના પ્રવક્તાના જણાવ્યા અનુસાર, વ્હાઇટહેટ જુનિયરનું ધ્યાન વધુ સારા શિક્ષણ સાથે બિઝનેસને મજબૂત બનાવવા પર છે. કંપનીનું કહેવું છે કે બરતરફ કરાયેલા કર્મચારીઓને એક મહિનાનો પગાર આપવામાં આવ્યો છે.

અગાઉ વ્હાઇટહેટ જુનિયરે લગભગ 300 પૂર્ણ-સમયના કર્મચારીઓને કાઢી મૂક્યા હતા. Byju'sએ ઓગસ્ટ 2020માં વ્હાઇટહેટ જુનિયરને $300 મિલિયનમાં ખરીદ્યું હતું. દેશની Edtech કંપનીઓએ સતત ખર્ચ ઘટાડવા અને ખર્ચમાં કાપ મૂકવાના નામે આ વર્ષે લગભગ 5000 કર્મચારીઓની છટણી કરી છે. છેલ્લા કેટલાક મહિનામાં યુનાએકેડમી ગ્રુપ, લિડો લર્નિંગ, વેદાંતુ સહિતની ઘણી એડટેક કંપનીઓએ તેમના કર્મચારીઓની છટણી કરી છે. યુનિકોર્ન વેદાંતુએ 624 કર્મચારીઓને છૂટા કર્યા છે.