કેન્દ્ર સરકારના કર્મચારીઓ માટે ખુશખબર: યુનિફાઇડ પેન્શન સ્કીમ (UPS) માટે અરજીની તારીખ લંબાવાઈ, જાણો લેટેસ્ટ અપડેટ
1 એપ્રિલ 2025 પછી જોડાયેલા કર્મચારીઓને 30 દિવસમાં નિર્ણય લેવો પડશે; UPS માં ગેરંટીવાળું પેન્શન અને ગ્રેચ્યુઇટીનો લાભ મળશે, NPS માં પરત ફરવાનો વિકલ્પ નહીં.
Unified Pension Scheme: કેન્દ્ર સરકારના લાખો કર્મચારીઓ માટે રાહતના સમાચાર આવ્યા સામે આવ્યા છે. સરકાર દ્વારા યુનિફાઇડ પેન્શન સ્કીમ (UPS) માં જોડાવાની અંતિમ તારીખ હવે જૂન 30, 2025 થી લંબાવીને સપ્ટેમ્બર 30, 2025 કરવામાં આવી છે. નાણા મંત્રાલય દ્વારા જારી કરાયેલી પ્રેસ રિલીઝ મુજબ, ઘણા કર્મચારીઓ અને સંબંધિત પક્ષો દ્વારા સમયમર્યાદા વધારવા માટેની વિનંતીઓને ધ્યાનમાં રાખીને આ નિર્ણય લેવામાં આવ્યો છે. આનાથી જે કર્મચારીઓ અગાઉ નિર્ધારિત સમયમાં અરજી કરી શક્યા ન હતા, તેમને પણ હવે UPS પસંદ કરવાની તક મળશે.
કોને મળશે લાભ અને કેવી રીતે કરશો અરજી?
આ સમયગાળાના વિસ્તરણનો લાભ એવા કેન્દ્ર સરકારના કર્મચારીઓને મળશે જેઓ એપ્રિલ 1, 2025 ના રોજ નોકરીમાં હતા અને હાલમાં NPS (નેશનલ પેન્શન સિસ્ટમ) હેઠળ આવે છે. આ ઉપરાંત, એપ્રિલ 1, 2025 કે તે પછી કેન્દ્ર સરકારની નોકરીમાં જોડાનારા કર્મચારીઓ, તેમજ જે કર્મચારીઓ પહેલા NPS માં હતા અને માર્ચ 31, 2025 પહેલા નિવૃત્ત થયા છે અથવા સ્વૈચ્છિક નિવૃત્તિ લીધી છે (જો તેમણે ઓછામાં ઓછા 10 વર્ષ સુધી કામ કર્યું હોય), તેઓ પણ આ યોજનાનો લાભ લઈ શકશે. જો કોઈ લાયક કર્મચારી UPS પસંદ કરતા પહેલા મૃત્યુ પામે છે, તો તેના કાયદેસર પત્ની કે પતિ આ યોજનાનો લાભ લઈ શકે છે.
UPS માટે અરજી પ્રક્રિયા એપ્રિલ 1, 2025 થી શરૂ થઈ ગઈ છે. બધા પાત્ર કેન્દ્રીય કર્મચારીઓ પ્રોટીન CRA વેબસાઇટ https://npscra.nsdl.co.in પર જઈને ઓનલાઈન ફોર્મ ભરી શકે છે.
UPS કે NPS: તમારા માટે શું શ્રેષ્ઠ?
UPS એ એપ્રિલ 1, 2025 થી લાગુ કરવામાં આવેલી રાષ્ટ્રીય પેન્શન સિસ્ટમ (NPS) નો વિકલ્પ છે. મુખ્ય તફાવત એ છે કે UPS માં પેન્શનની ખાતરી આપવામાં આવે છે, જ્યારે NPS માં આવી કોઈ ખાતરી નથી કારણ કે તે બજાર સાથે જોડાયેલું છે. UPS પસંદ કરનારાઓને હવે ગ્રેચ્યુઇટીનો લાભ પણ મળશે, જે અગાઉ ફક્ત જૂની પેન્શન સિસ્ટમમાં જ ઉપલબ્ધ હતો.
UPS એવા કર્મચારીઓ માટે વધુ યોગ્ય છે જેઓ નિશ્ચિત આવકની ખાતરી કરવા માંગે છે. જ્યારે NPS માં પેન્શનની રકમની ગેરંટી નથી, પરંતુ બજાર-લિંક્ડ રિટર્ન દ્વારા મોટી રકમ મેળવવાની શક્યતા રહેલી છે.
મહત્વપૂર્ણ બાબતો:
- નવા જોડાયેલા કર્મચારીઓ માટે: જે કર્મચારીઓ એપ્રિલ 1, 2025 પછી નોકરીમાં જોડાયા છે, તેમણે જોડાવાના 30 દિવસની અંદર UPS પસંદ કરવાનો નિર્ણય લેવો પડશે.
- નિર્ધારિત સમયમાં નિર્ણય ન લેવાય તો: જો કોઈ કર્મચારી નિર્ધારિત સમય સુધીમાં UPS પસંદ કરવાનો વિકલ્પ નહીં આપે, તો એવું માનવામાં આવશે કે તેણે NPS અપનાવ્યું છે.
- એક વખતનો નિર્ણય: એકવાર UPS પસંદ થઈ ગયા પછી, NPS પર પાછા જવાનું શક્ય નથી. આ એક વખતનો, અંતિમ અને બદલી ન શકાય તેવો નિર્ણય હશે.
આ નવી સમયમર્યાદાએ લાખો સરકારી કર્મચારીઓને નિર્ણય લેવામાં થોડી વધુ રાહત આપી છે. જોકે, આ એક અત્યંત મહત્વપૂર્ણ અને એક વખતનો નિર્ણય હોવાથી, કર્મચારીઓને સંપૂર્ણ માહિતી મેળવીને અને તેના ફાયદા-ગેરફાયદા સમજીને સમજદારીપૂર્વક નિર્ણય લેવાની સલાહ આપવામાં આવે છે.
ટોપ સ્ટોરી
ટ્રેન્ડિંગ સમાચાર
