ટાટાની આ કંપનીમાં પગાર વધારાની જાહેરાત, સરેરાશ 5% વધ્યો, પણ કેટલાક કર્મચારીનો પગાર ઘટ્યો!

tcs salary hike 2026: પર્ફોર્મન્સના આધારે કંપનીએ 13% સુધીનો વધારો આપ્યો, પરંતુ વર્ક ફ્રોમ ઓફિસના કડક નિયમો અને નવી પોલિસીના કારણે કેટલાક કર્મચારીઓના CTCમાં ઘટાડો નોંધાયો.

tcs salary hike average 5 percent negative revisions after appraisal

Source : તસવીર સોશિયલ મીડિયા

Show Quick Read

Key points generated by AI, verified by newsroom

• TCS એ કર્મચારીઓને સરેરાશ 5% પગાર વધારો આપ્યો.
• ઉચ્ચ પ્રદર્શન કરનારાઓને 9% થી 13% સુધીનો વધારો મળ્યો.
• નીચલા બેન્ડના કર્મચારીઓના પગારમાં ઘટાડો, ચિંતા જોવા મળી.
• બોનસ અને વેરિએબલ પે ઓફિસ આવવા સાથે જોડાયેલા છે.

tcs salary hike 2026: જો તમે IT સેક્ટરમાં નોકરી કરો છો, તો આ સમાચાર તમારા માટે ખાસ છે. દેશની સૌથી મોટી આઈટી કંપની ટાટા કન્સલ્ટન્સી સર્વિસીસ (TCS) એ નવા એપ્રાઈઝલ સાયકલમાં તેના લાખો કર્મચારીઓ માટે પગાર વધારાની જાહેરાત કરી છે. કંપનીએ સરેરાશ 5% નું ઇન્ક્રીમેન્ટ આપ્યું છે, જેનાથી હજારો કર્મચારીઓને રાહત મળી છે. પરંતુ, આ જાહેરાતથી બધા જ ખુશ નથી. એક તરફ કેટલાક કર્મચારીઓને શાનદાર ઇન્ક્રીમેન્ટ મળ્યું છે, તો બીજી તરફ કેટલાક કર્મચારીઓના ફિક્સ અને વેરિએબલ પે (ચલ પગાર) માં ઘટાડો થતાં તેમને મોટો ઝટકો લાગ્યો છે. 5.84 લાખથી વધુ કર્મચારીઓ ધરાવતી આ કંપનીનો આ નિર્ણય હાલ આઇટી સેક્ટરમાં ચર્ચાનો મુખ્ય વિષય બની ગયો છે.

પર્ફોર્મન્સના આધારે મળ્યો પગાર વધારો

મળતા અહેવાલો મુજબ, TCS દ્વારા કર્મચારીઓને તેમના કામ (પર્ફોર્મન્સ બેન્ડ) ના આધારે પગાર વધારો આપવામાં આવ્યો છે. કંપનીએ પોતાના વાર્ષિક અહેવાલમાં જણાવ્યું છે કે જુનિયર અને મિડલ લેવલના કર્મચારીઓને સરેરાશ 4.5% થી 7% નો વધારો આપવામાં આવ્યો છે. જો આપણે બેન્ડ પ્રમાણે જોઈએ તો:

A+ બેન્ડ: ટોચનું પ્રદર્શન કરનારા (Top Performers) કર્મચારીઓને 9% થી 13% સુધીનો જંગી વધારો મળ્યો છે.

A-બેન્ડ: આ કેટેગરીના કર્મચારીઓને 5% થી 9% સુધીનું ઇન્ક્રીમેન્ટ મળ્યું છે.

B-બેન્ડ: આમને માત્ર 1% થી 3.5% સુધીનો જ પગાર વધારો મળ્યો છે.

જ્યારે C-બેન્ડ (સૌથી ઓછું પ્રદર્શન) વાળા કર્મચારીઓને ખૂબ જ નહિવત વધારો મળ્યો છે, અને કેટલાક કિસ્સાઓમાં તો પગાર ઘટ્યા હોવાની ફરિયાદો પણ નોંધાઈ છે.

આ પણ વાંચોઃ સરકારી કર્મચારીઓ માટે મોટા સમાચાર: 8મા પગાર પંચમાં નિવૃત્તિ પછી 50% પેન્શનની માંગણી

કેટલાકના પગારમાં કેમ થયો ઘટાડો?

નીચલા બેન્ડના ઘણા કર્મચારીઓએ એવી ફરિયાદ કરી છે કે એપ્રાઈઝલ લેટર મળ્યા પછી પણ તેમના કુલ CTC માં 1,000 થી 10,000 રૂપિયા સુધીનો ઘટાડો થયો છે. આ પાછળનું મુખ્ય કારણ પગારના માળખામાં થયેલો ફેરફાર છે. કેટલાકનું કહેવું છે કે કંપનીએ એલાઉન્સ અને વેરિએબલ પે (ચલ પગાર) ને રીસ્ટ્રક્ચર કર્યા છે, જેના પરિણામે તેમના હાથમાં આવતો પગાર (In-hand Salary) ઘટી ગયો છે. વેરિએબલ પે હવે ત્રિમાસિક કે વાર્ષિક ધોરણે નક્કી થઈ રહ્યો છે. આ ઉપરાંત, મેડિકલ ઇન્શ્યોરન્સના પ્રીમિયમમાં થયેલા વધારાને કારણે પણ ઘણાના પગારમાં કાપ આવ્યો છે.

બોનસ માટે 'વર્ક ફ્રોમ ઓફિસ' જરૂરી

સૌથી મોટો ફેરફાર એ છે કે હવે કંપનીએ બોનસ અને વેરિએબલ પે ને વર્ક-ફ્રોમ-ઓફિસ (WFO) ના નિયમોના પાલન સાથે જોડી દીધા છે. આનો સીધો અર્થ એ છે કે, જે કર્મચારીઓ ઓફિસ આવીને નિયમિત કામ કરે છે તેમને જ કંપનીના આ લાભો પૂરેપૂરા મળશે.

IT સેક્ટર પર હાલ કેમ છે દબાણ?

માર્કેટ નિષ્ણાતોના મતે, હાલમાં સમગ્ર ભારતીય IT ઉદ્યોગ થોડા મુશ્કેલ સમયમાંથી પસાર થઈ રહ્યો છે. વૈશ્વિક સ્તરે માંગમાં ઘટાડો, ગ્રાહકો દ્વારા ખર્ચમાં કાપ અને નફાના માર્જિન પર સતત દબાણને કારણે કંપનીઓ ખૂબ જ સાવધાનીપૂર્વક પગલાં લઈ રહી છે. આ જ કારણ છે કે પગાર વધારા અને બોનસની બાબતમાં IT કંપનીઓ કડક વલણ અપનાવી રહી છે. તેમ છતાં, પગારમાં કાપ અને નવી પોલિસીના કારણે નીચલા બેન્ડના કર્મચારીઓમાં સ્પષ્ટપણે અસંતોષ અને ચિંતા જોવા મળી રહી છે.

આ પણ વાંચોઃ રેલવે કર્મચારીઓને બખ્ખાં: DAમાં 2%નો વધારો, 4 મહિનાના એરિયર્સ સાથે મળશે આટલો પગાર, જાણો વિગત