GIFT City: ગિફ્ટ સિટીમાં દારૂ પીવાની છૂટછાટ વધારાઈ, હવે આ લોકોને પરમિટની જરૂર નહીં
ગાંધીનગરમાં સરકારનું મોટું નોટિફિકેશન: હવે માત્ર ID પ્રૂફ બતાવીને માણી શકાશે ડ્રિંક, કર્મચારીઓ એકસાથે 25 મહેમાનોને આપી શકશે પાર્ટી.
ગુજરાતને વૈશ્વિક બિઝનેસ હબ બનાવવા માટે સરકારે ગાંધીનગર સ્થિત GIFT City માં દારૂબંધીના નિયમોમાં મોટી છૂટછાટ જાહેર કરી છે. નવા નોટિફિકેશન મુજબ, હવે ગુજરાત બહારથી આવતા મુલાકાતીઓ (Visitors) અને વિદેશી નાગરિકોએ દારૂ પીવા માટે કોઈ પણ પ્રકારની હંગામી પરમિટ લેવાની જરૂર રહેશે નહીં. તેઓ માત્ર પોતાનું ઓળખપત્ર બતાવીને સુવિધાનો લાભ લઈ શકશે. સાથે જ અહીં કામ કરતા કર્મચારીઓ માટે મહેમાનોની મર્યાદામાં પણ વધારો કરવામાં આવ્યો છે.
ગુજરાત ભલે 'ડ્રાય સ્ટેટ' ગણાતું હોય, પરંતુ ઇન્ટરનેશનલ ફાઇનાન્સ ટેક-સિટી (GIFT City) ને ગ્લોબલ ઇકો-સિસ્ટમ પૂરી પાડવા માટે રાજ્ય સરકારે દારૂબંધીના નિયમોમાં મહત્વપૂર્ણ સુધારા કર્યા છે. ગત શનિવારે જાહેર કરાયેલા નવા નોટિફિકેશનથી અહીં આવતા બિઝનેસ ડેલિગેટ્સ અને પ્રવાસીઓને મોટી રાહત મળી છે.
પરમિટ પ્રક્રિયામાંથી મુક્તિ: હવે માત્ર ID કાર્ડ જ કાફી
અગાઉ અન્ય રાજ્યોમાંથી આવતા મુલાકાતીઓ કે વિદેશી નાગરિકોએ ગિફ્ટ સિટીમાં લિકર કન્ઝ્યુમ કરવા માટે પરમિટની પ્રક્રિયામાંથી પસાર થવું પડતું હતું. પરંતુ સુધારેલા નિયમો અનુસાર, હવે જે વ્યક્તિ ગુજરાતની રહેવાસી નથી (Non-Domicile of Gujarat), તેમને પરમિટ કઢાવવાની કોઈ જરૂર નથી.
નવો નિયમ: અન્ય રાજ્યના મુલાકાતીઓ કે વિદેશીઓ પોતાનું Valid Photo ID બતાવીને નિયત વાઈન એન્ડ ડાઈન વિસ્તારમાં દારૂ પી શકશે.
આ નિર્ણય 30 ડિસેમ્બર, 2023 ના રોજ અપાયેલી છૂટછાટને વધુ સરળ અને વિસ્તૃત બનાવે છે.
કર્મચારીઓ માટે ખુશખબર: ગેસ્ટ લિમિટ વધી
ગિફ્ટ સિટીમાં કામ કરતા અને લિકર પરમિટ ધરાવતા કાયમી કર્મચારીઓ માટે પણ નિયમો ઉદાર બનાવવામાં આવ્યા છે.
હવે પરમિટ હોલ્ડર કર્મચારી એકસાથે 25 મહેમાનો (Guests) ને આમંત્રિત કરી શકશે અને પાર્ટી આપી શકશે.
સાથે જ, સ્પષ્ટતા કરવામાં આવી છે કે જે લોકો પાસે પરમિટ નથી અથવા જેઓ દારૂ નથી પીતા, તેઓ પણ 'ફૂડ એન્ડ બેવરેજ' (F&B) વિસ્તારમાં ભોજન માટે નિઃસંકોચ પ્રવેશ કરી શકશે. એટલે કે ડાઈનિંગ માટે કોઈ રોકટોક રહેશે નહીં.
વૈશ્વિક હબ અને ઓલિમ્પિક્સની તૈયારી?
ઉદ્યોગ જગતના નિષ્ણાતો આ નિર્ણયને ગુજરાતના ભવિષ્ય સાથે જોડીને જોઈ રહ્યા છે. ગિફ્ટ સિટીને લંડન, સિંગાપોર અને દુબઈ જેવા Global Financial Hub ની હરોળમાં મૂકવા માટે અહીંની લાઈફસ્ટાઈલ અને નાઈટ લાઈફને અનુરૂપ થવું જરૂરી હતું. વધુમાં, ગુજરાત ભવિષ્યમાં Olympics અને કોમનવેલ્થ ગેમ્સ જેવી આંતરરાષ્ટ્રીય સ્પર્ધાઓની યજમાની કરવા ઈચ્છે છે, ત્યારે આંતરરાષ્ટ્રીય પ્રવાસીઓ માટે સાનુકૂળ વાતાવરણ ઉભું કરવું અનિવાર્ય છે.
ઉંમરનો નિયમ યથાવત
જોકે, સરકારે સ્પષ્ટ કર્યું છે કે છૂટછાટ માત્ર પ્રક્રિયામાં છે, કાયદામાં નહીં.
દારૂ પીવા માટેની કાનૂની ઉંમર 21 વર્ષ જ રહેશે.
તમામ પ્રવૃત્તિઓ Gujarat Prohibition Act ના દાયરામાં રહીને જ કરવાની રહેશે.
આ છૂટ માત્ર અને માત્ર ગિફ્ટ સિટી વિસ્તાર પૂરતી જ સીમિત છે.
ટોપ સ્ટોરી
ટ્રેન્ડિંગ સમાચાર
