Ambalal Patel: આ તારીખથી વરસાદ ફરી કરશે ધમાકેદાર બેટિંગ, અંબાલાલ પટેલની નવી આગાહી

Ambalal Patel Rain Forecast: જુલાઈના અંતમાં અને ઓગસ્ટમાં સારો વરસાદ પડવાની સંભાવના; ખેડૂતો માટે હવામાન નિષ્ણાત અંબાલાલ પટેલની ખાસ સલાહ.

ambalal patel gujarat rain forecast july august monsoon weather updates

Source : ai

Show Quick Read

Key points generated by AI, verified by newsroom

• અંબાલાલ પટેલની આગાહી: રાજ્યમાં ૧૩ જુલાઈથી ફરી વરસાદી માહોલ.
• ૧૭-૧૮ જુલાઈએ બંગાળની નવી સિસ્ટમ મધ્ય-ઉત્તર ગુજરાતને ઘમરોળશે.
• ૨૭-૩૦ જુલાઈએ સૌરાષ્ટ્રને રાહત, ઓગસ્ટમાં સારો વરસાદ શક્ય.

Ambalal Patel Rain Forecast: રાજ્યમાં હાલ પવનની ગતિ વધુ હોવાથી અને મોનસૂન ટ્રફ ઉત્તર-પૂર્વ ભારત તરફ સરકી જવાથી વરસાદની ગતિવિધિ એકદમ નબળી પડી ગઈ છે. અરબ સાગર કે બંગાળની ખાડીમાં પણ હાલ કોઈ સક્રિય સિસ્ટમ નથી. પરંતુ, વરસાદની ચાતક નજરે રાહ જોતા ગુજરાતીઓ અને ખેડૂતો માટે જાણીતા હવામાન નિષ્ણાત અંબાલાલ પટેલે એક મોટી ખુશખબર આપી છે. તેમની નવી આગાહી મુજબ, 13 જુલાઈથી રાજ્યમાં ફરી એકવાર વરસાદી માહોલ જામશે અને જુલાઈના અંતથી આખા ઓગસ્ટ મહિના દરમિયાન સારો વરસાદ વરસી શકે છે.

જાણો કઈ તારીખે ક્યાં પડશે વરસાદ અને કેવો રહેશે માહોલ:

13 થી 20 જુલાઈ: નવી સિસ્ટમથી વરસાદની આશા

અંબાલાલ પટેલના જણાવ્યા અનુસાર, 13 અને 14 જુલાઈએ બંગાળની ખાડીમાં એક નવી સિસ્ટમ સક્રિય થવાની શક્યતા છે. જેના પરિણામે 13 થી 16 જુલાઈ દરમિયાન લોકલ સિસ્ટમના આધારે ગુજરાતના છૂટાછવાયા ભાગોમાં, ખાસ કરીને કચ્છ વિસ્તારમાં વરસાદ પડી શકે છે.

ત્યારબાદ 17 અને 18 જુલાઈએ બંગાળની ખાડીમાં વધુ એક મજબૂત સિસ્ટમ બનશે. જો આ સિસ્ટમ મધ્યપ્રદેશ તરફ આગળ વધશે, તો તેની સીધી અસર ગુજરાત પર જોવા મળશે. પરિણામે 18 થી 20 જુલાઈ દરમિયાન મધ્ય ગુજરાત (અમદાવાદ, ગાંધીનગર, વડોદરા, પંચમહાલ) અને ઉત્તર ગુજરાત (સાબરકાંઠા, બનાસકાંઠા, અરવલ્લી) માં સારા વરસાદની સંભાવના છે. દક્ષિણ ગુજરાતમાં પણ 22 જુલાઈની આસપાસ વરસાદી માહોલ જોવા મળી શકે છે.

જુલાઈના અંતમાં સૌરાષ્ટ્રને મળશે મોટી રાહત

સૌરાષ્ટ્રના જે વિસ્તારોમાં હજુ સુધી વરસાદ ખેંચાયો છે અને જ્યાં વરસાદના કોઈ ઠેકાણા નથી, તેમના માટે 27 થી 30 જુલાઈનો સમયગાળો અત્યંત સારો સાબિત થઈ શકે છે. આ દિવસોમાં પશ્ચિમ સૌરાષ્ટ્રના દ્વારકા, પોરબંદર અને જામનગર સહિત ગુજરાતના અનેક વિસ્તારોમાં મેઘમહેર થવાની પૂરી શક્યતા છે. બીજી તરફ, 24 થી 26 જુલાઈ દરમિયાન મુંબઈ અને મહારાષ્ટ્રમાં પણ વરસાદની આગાહી છે.

આ પણ વાંચોઃ હવામાન વિભાગનું એલર્ટ: આગામી 3 કલાકમાં ગુજરાતના 5 જિલ્લામાં ઓરેન્જ અને 22માં યલો એલર્ટ

ઓગસ્ટ મહિનામાં કેવો રહેશે વરસાદ?

ઓગસ્ટ મહિનામાં વરસાદની સ્થિતિ ખૂબ જ સાનુકૂળ રહેશે. અંબાલાલ પટેલના મતે, ઇન્ડિયન ઓશન ડાયપોલ (IOD) અને હિંદ મહાસાગરના અન્ય સાનુકૂળ પરિબળોને કારણે અલ નીનો હોવા છતાં ઓગસ્ટમાં સારો વરસાદ પડશે. ઓગસ્ટની શરૂઆતમાં (અંદાજે 1 ઓગસ્ટ આસપાસ) દક્ષિણ ગુજરાતમાં અણધાર્યો અને ભારે વરસાદ પડી શકે છે, જેનાથી તાપી નદીના જળસ્તરમાં નોંધપાત્ર વધારો થવાની શક્યતા છે.

ખેડૂત મિત્રો માટે અંબાલાલ પટેલની ખાસ સલાહ

સિંચાઈનું ધ્યાન રાખો: હાલ જમીન સપાટી પર ફૂંકાતા સૂકા પવનોને કારણે જમીનનો ભેજ ઉડી રહ્યો છે, તેથી ખેડૂતોએ પાક બચાવવા પૂરતી સિંચાઈની વ્યવસ્થા કરવી.

નક્ષત્ર મુજબ વરસાદ: 20 જુલાઈથી બેસતા 'પુષ્ય' નક્ષત્રનો વરસાદ પાક માટે અમૃત સમાન ગણાય છે.

વાવેતરમાં સાવધાની: 3 થી 17 ઓગસ્ટ દરમિયાન 'આશ્લેષા' નક્ષત્ર ચાલશે. આ નક્ષત્રમાં વરસાદ ખૂબ જોરાવર હોય છે, પરંતુ તેનું પાણી કૃષિ પાક માટે હિતાવહ મનાતું નથી (તેનાથી પાક પીળો પડી શકે છે). તેથી, આ સમયગાળામાં લીલા ભેજમાં વાવેતર કરવાનું ટાળવું. જમીન થોડી સુકાય અને 'વરાપ' નીકળે ત્યારબાદ જ ખેતીના કામો કરવા વધુ હિતાવહ રહેશે.

આ પણ વાંચોઃ આગામી 2 દિવસ કેવું રહેશે હવામાન? હવામાન વિભાગ અને અંબાલાલ પટેલની ચોંકાવનારી આગાહી