કોરોનાના ડર વચ્ચે દેડિયાપાડામાં ઝડપાયો બોગસ ડોક્ટર, ડિગ્રી વિના કરી રહ્યો હતો લોકોની સારવાર

આરોગ્ય વિભાગે બોગસ ડોક્ટરના ક્લિનિકમાંથી મેડિકલ તપાસના સાધનો સહિતની સામગ્રી પણ જપ્ત કરી હતી.

નર્મદાઃ નર્મદા જિલ્લાના દેડિયાપાડામાં આરોગ્ય વિભાગની ટીમે બોગસ તબીબને ઝડપી પાડ્યો હતો. મળતી જાણકારી અનુસાર, આરોગ્ય વિભાગને જાણ થઇ હતી કે દેડિયાપાડામાં કેટલાક ડોક્ટરો ડિગ્રી વિના પ્રેક્ટિસ કરી રહ્યા છે.  ત્યારે કોરોના વાયરસના ખતરા વચ્ચે ગરીબ દર્દીઓના જીવ સાથે ચેડા કરતો એક બોગસ દર્દીને ઝડપી પાડવામાં આવ્યો હતો જ્યારે અન્ય બે બોગસ ડોક્ટર ફરાર થઇ ગયા હતા. આરોગ્ય વિભાગે બોગસ ડોક્ટર વિરુદ્ધ ગુજરાત મેડિકલ પ્રેક્ટિસનર એક્ટ 1964ની કલમ 30 મુજબ ડેડીયાપાડા પોલીસ સ્ટેશને ગુનો દાખલ કર્યો હતો. આરોગ્ય વિભાગે બોગસ ડોક્ટરના ક્લિનિકમાંથી મેડિકલ તપાસના સાધનો સહિતની સામગ્રી પણ જપ્ત કરી હતી. મળતી જાણકારી અનુસાર, બ્લોક હેલ્થ અધિકારી ડૉ. હેતલ નાયક, ડૉ. જીનલ મનુભાઈ પટેલ સહિતની ટીમે ફાર્માસિસ્ટને સાથે રાખીને ક્લિનિક પર દરોડા પાડ્યા હતા. જેમાં ડેડિયાપાડા નવીનગરીની હાટ બજાર ચોકડી નજીક અંજલિ ક્લિનિક ચલાવતો સિમ્પલ શશીકાંત વિશ્વાસ એક દર્દીને બોટલ ચડાવી ઈન્જેક્શ આપી સારવાર કરી રહ્યો હતો. ત્યારે આરોગ્ય વિભાગની ટીમે તેની પાસેના દસ્તાવેજોની ચકાસણી કરતા તબીબ બોગસ હોવાનું જાણવા મળ્યું હતું. શશીકાંત મૂળ પશ્વિમ બંગાળનો હોવાનું પણ જાણવા મળ્યું હતું. આરોગ્ય વિભાગના દરોડાના પગલે ડિગ્રી વિનાના અન્ય બે ડોક્ટર ભાગી ગયા હતા. આ મામલે બ્લોક હેલ્થ અધિકારી ડોક્ટર હેતલ નાયકે જણાવ્યું કે, હાલમાં કોરોનાનો ભય છે ત્યારે હોસ્પિટલની ઓપીડી પણ ઓછી કરી દેવાઇ છે. આ પ્રકારના બોગસ ડોક્ટરો કોઈપણ ડિગ્રી વિના લોકોના આરોગ્ય સાથે ચેડા કરી રહ્યો હતો.