અમદાવાદ પછી ગુજરાતના આ શહેરમાં પણ કરિયાણાની દુકાનો રહેશે બંધ, જાણો વિગત

મહીસાગર જિલ્લાના લુણાવાડામાં પણ આજથી કરિયાણાની દુકાનો બંધ રાખવાનો નિર્ણય લેવામાં આવ્યો છે.

લુણાવાડાઃ ગુજરાતમાં સતત વધી રહેલા કોરોનાના કેસોને કારણે અમદાવાદમાં દૂધ અને મેડિકલ સિવાયની તમામ દુકાનો 15મી મે સુધીમાં બંધ કરાવી દેવામાં આવી છે. સુરતમાં પણ 9મી મેથી શાકભાજી વેચનારા પર પ્રતિબંધ લગાવાઈ રહ્યો છે. ત્યારે મહીસાગર જિલ્લાના લુણાવાડામાં પણ આજથી કરિયાણાની દુકાનો બંધ રાખવાનો નિર્ણય લેવામાં આવ્યો છે. લુણાવાડા કરિયાણા એસોસિયેશન દ્વારા કોરોનાના વધી રહેલા કેસોને ધ્યાનમાં રાખીને આજથી રવિવાર સુધી કરિયાણાની દુકાનો બંધ રાખવાનો નિર્ણય લેવામાં આવ્યો છે. જિલ્લામાં દિન પ્રતિદિન કોરોનાના કેસ વધી રહ્યા છે, ત્યારે કરિયાણા એસોસિએશન દ્વારા આ મોટો નિર્ણય લેવામાં આવ્યો છે. આ અંગે કરિયાણા એસોસિએશનના પ્રમુખ રાજેશ દોષી દ્વારા જાણકારી આપવામાં આવી હતી. અમદાવાદમાં કોરોનાવાયરસના ચેપના કેસો કૂદકે ને ભૂસકે વધી રહ્યા છે ત્યારે તેને રોકવા માટે અમદાવાદ મ્યુનિસિપલ કોર્પોરેશને લોકડાઉનનો અત્યંત કડક રીતે અમલ કરાવવાનો નિર્ણય લીધો છે. તેના ભાગરૂપે અમદાવાદમાં 15 મે સુધી દૂધ અને દવા સિવાય તમામ દુકાનો બંધ રાખવાનો નિર્ણય લેવાયો છે. આ જાહેરાતનો અમલ ગઈ કાલે રાત્રે બાર વાગ્યાથી તેનો અમલ શરૂ થઈ ગયો છે. અમદાવાદ મ્યુનિસિપલ કોર્પોરેશનના નવા નિમાયેલા કમિશનર મુકેશ કુમારે આ નિર્ણય લીધો છે. આ નિર્ણય હેઠળ શાકભાજીની દુકાનો પણ બંધ કરી દેવાશે. અમદાવાદમાં શાકભાજીના ફેરિયા કોરોનાના સુપર સ્પ્રેડર હોવાથી તેમની લારીઓ તથા દુકાનો બંધ રાખવાનો નિર્ણય લેવાયો છે. ડો. રાજીવ ગુપ્તા અને નવા કમિશનર મુકેશ કુમારે આજે હાઈકમાન્ડની મીટિંગ બોલાવી હતી. બેઠક બાદ આ નિર્ણય લેવામાં આવ્યો હતો. અમદાવાદમાં આગામી 1 સપ્તાહ સુધી સંપૂર્ણ લોકડાઉન રહેશે. જેમાં દૂધ અને દવાની દુકાનો શરૂ રહેશે. પરંતુ શાકભાજી, ફ્રૂટ, કરિયાણાની દુકાનો બંધ રહેશે.ઉપરાંત શહેરનાં તમામ 48 વોર્ડ માટે કન્ટેનમેન્ટ સ્ટ્રેટેજી બનાવવા આદેશ આપ્યા હતા.