નવરચિત મહાનગરપાલિકાઓ પર સરકાર મહેરબાન: એક જ દિવસમાં સરકારે ₹૧૭૦૦ કરોડથી વધુના કામોને મંજૂરી આપી
શહેરી વિકાસ વર્ષ ૨૦૨૫ અંતર્ગત આંતરમાળખાકીય સુવિધાઓ, રસ્તાઓ, પાણી પુરવઠા અને મૂળભૂત માળખાકીય સુવિધાઓના કાર્યો હાથ ધરાશે.
Bhupendra Patel ₹1700 crore development approval: ગુજરાતના મુખ્યમંત્રી ભૂપેન્દ્ર પટેલે રાજ્યમાં શહેરી જન સુખાકારીને વધુ સુવિધાસભર બનાવવાના મહત્વપૂર્ણ અભિગમ સાથે, શહેરી વિકાસ વર્ષ ૨૦૨૫ અંતર્ગત એક જ દિવસમાં ₹૧૭૦૦.૫૭ કરોડથી વધુના વિવિધ વિકાસ કામોને સૈદ્ધાંતિક મંજૂરી આપી છે. આ નિર્ણયમાં નવરચિત છ મહાનગરપાલિકાઓ, પાંચ નગરપાલિકાઓ અને અમદાવાદ ગાંધીનગર મહાનગરપાલિકાઓનો સમાવેશ થાય છે, જે રાજ્યના શહેરી વિકાસને નવી ગતિ આપશે.
વડાપ્રધાનના વિઝનને સાકાર કરતું પગલું: વડાપ્રધાન નરેન્દ્રભાઈ મોદીએ ગુજરાતના તત્કાલીન મુખ્યમંત્રી તરીકે ૨૦૦૫ માં શહેરી વિકાસ વર્ષની ઉજવણીથી અસરકારક શહેરી વ્યવસ્થાપનની શરૂઆત કરી હતી. તેમની દૂરંદેશીને પગલે ગુજરાતના શહેરો 'વેલપ્લાન્ડ ડેવલપ સિટી' તરીકે પ્રસ્થાપિત થયા છે. વડાપ્રધાનની આ પ્રેરણાથી શરૂ થયેલી બે દાયકાની શહેરી વિકાસ યાત્રાને મુખ્યમંત્રી ભૂપેન્દ્ર પટેલ ૨૦૨૫ ના 'શહેરી વિકાસ વર્ષ' તરીકે ઉજવીને આગળ ધપાવી રહ્યા છે. વડાપ્રધાન નરેન્દ્રભાઈ મોદીએ ગત ૨૭મી મેના રોજ શહેરોને આર્થિક પ્રવૃત્તિઓના ગતિશીલ કેન્દ્રો બનાવવાના વિઝનને મુખ્યમંત્રી ભૂપેન્દ્ર પટેલે આ ₹૧૭૦૦.૫૭ કરોડના કામોને મંજૂરી આપીને સાકાર કર્યું છે.
વિવિધ શહેરોને મળનારી ફાળવણી: મુખ્યમંત્રી ભૂપેન્દ્ર પટેલે મંજૂર કરેલી આ રાશિમાંથી મુખ્ય મહાનગરપાલિકાઓને ફાળવણી નીચે મુજબ છે:
- અમદાવાદ મહાનગરપાલિકા: ₹૫૪૬ કરોડ
- ગાંધીનગર મહાનગરપાલિકા: ₹૩૨ કરોડ
નવરચિત મહાનગરપાલિકાઓને મળનારી ફાળવણી:
- આણંદ: ₹૧૪૮ કરોડ
- મોરબી: ₹૨૭૦.૦૮ કરોડ
- સુરેન્દ્રનગર: ₹૨૫૭.૬૦ કરોડ
- નડિયાદ: ₹૭૧.૯૧ કરોડ
- નવસારી: ₹૯૦.૩૫ કરોડ
- વાપી: ₹૨૫૧.૯૧ કરોડ
આ ઉપરાંત, પાંચ નગરપાલિકાઓને પણ વિકાસ કામો માટે ભંડોળ મળશે:
- વડનગર: ₹૧૬.૩૭ કરોડ
- હિંમતનગર: ₹૭.૩૩ કરોડ
- સિદ્ધપુર: ₹૩.૭૪ કરોડ
- હળવદ: ₹૪.૦૨ કરોડ
- ભરૂચ: ₹૦.૮૫૫૨ કરોડ (₹૮૫.૫૨ લાખ)
વિવિધ વિકાસ કાર્યો પર ભાર: મુખ્યમંત્રી એ મંજૂર કરેલા આ ભંડોળનો ઉપયોગ બહુવિધ વિકાસ કાર્યો માટે થશે, જેમાં સ્વર્ણિમ જયંતી મુખ્યમંત્રી શહેરી વિકાસ યોજના હેઠળ આંતરમાળખાકીય વિકાસ, આઇકોનિક રોડ, મુખ્યમંત્રી શહેરી સડક યોજના, પાણી પુરવઠા અને મૂળભૂત માળખાકીય સુવિધાઓના કામોનો સમાવેશ થાય છે.
- આંતરમાળખાકીય સુવિધાઓ (₹૬૭૬.૨૮ કરોડ): નવરચિત ૬ મહાનગરપાલિકાઓમાં સ્ટ્રીટલાઇટ, સોલાર સુવિધા, સિટી બ્યુટીફિકેશન, પબ્લિક ગાર્ડન ડેવલપમેન્ટ, ડ્રેનેજ, ટ્રાફિક સર્કલ, રેઇન વોટર હાર્વેસ્ટિંગ, સ્ટોર્મ વોટર ડ્રેનેજ લાઇન, સિટી સિવિક સેન્ટર, ફાયર ઉપકરણો વગેરે સહિતના ૨૪૭ કામો હાથ ધરાશે.
- મુખ્યમંત્રી શહેરી સડક યોજના (₹૬૫૨.૭૮ કરોડ): આણંદ, સુરેન્દ્રનગર, વાપી અને મોરબીની નવરચિત મહાનગરપાલિકાઓ તેમજ અમદાવાદ અને ગાંધીનગર મહાનગરપાલિકામાં રોડ નવીનીકરણ, રીસરફેસિંગ, વ્હાઇટ ટોપિંગ તથા ૬૦ ફૂટથી મોટા માર્ગોના રિપેરિંગના કામો થશે.
- મૂળભૂત માળખાકીય સુવિધાઓ (₹૧૯૧.૯૧ કરોડ): સુરેન્દ્રનગર, વાપી અને આણંદ મહાનગરપાલિકાઓમાં ફિલ્ટર પ્લાન્ટ રિપેરિંગ, રોડ રસ્તા, ગટર અને સ્ટોર્મ ડ્રેન તથા પાણીની સુવિધા જેવા કામો મંજૂર કરાયા છે.
- આઇકોનિક રોડ અને જનભાગીદારી યોજના (₹૩૧ કરોડ + ₹૦.૮૫૫૨ કરોડ): આણંદ અને સુરેન્દ્રનગર મહાનગરપાલિકાઓને આઇકોનિક રોડ નિર્માણ માટે ₹૩૧ કરોડ અને ભરૂચ નગરપાલિકા વિસ્તારમાં ખાનગી સોસાયટી જનભાગીદારી યોજના હેઠળ કોમન પ્લોટ પેવર બ્લોકના કામો માટે ₹૮૫.૫૨ લાખ મળશે.
- પાણી પુરવઠા અને આઉટગ્રોથ વિસ્તારોનો વિકાસ (₹૬૭.૩૫ કરોડ + ₹૬૪.૦૨ કરોડ): નવા સમાવાયેલા વિસ્તારોમાં પીવાના પાણીની સુવિધા માટે હિંમતનગર, સિદ્ધપુર નગરપાલિકાઓ અને મોરબી મહાનગરપાલિકાને ₹૬૭.૩૫ કરોડ. ઉપરાંત, મોરબી, વાપી મહાનગરપાલિકાઓ અને હળવદ નગરપાલિકાને આઉટગ્રોથ વિસ્તારોમાં પીવાના પાણીની લાઇન, ભૂગર્ભ ગટર, ડામર/સીસી રોડ, ફાયર સ્ટેશન નિર્માણ જેવા કામો માટે ₹૬૪.૦૨ કરોડ મંજૂર કરાયા છે.
ટોપ સ્ટોરી
ટ્રેન્ડિંગ સમાચાર
