ખેડૂતોના હિતમાં રાજ્ય સરકારનો મહત્ત્વપૂર્ણ નિર્ણય, રી સર્વેની મુદ્દતમાં એક વર્ષનો વધારો કર્યો

રાજ્યમાં ડિજિટલ ઈન્ડિયા લેન્ડ રેકોર્ડ્ઝ મોર્ડનાઇઝેશન પ્રોગ્રામ (DILRMP) હેઠળ 33 જિલ્લાઓમાં ખેતીની જમીનની માપણી અને પ્રમોલગેશનની કામગીરી ચાલી રહી છે.

ખેડૂતોના હિતમાં રાજ્ય સરકારનો મહત્ત્વપૂર્ણ નિર્ણય

Source : abp asmita

• જમીન રી સર્વે અને વાંધા અરજીની મુદ્દતમાં વધારો
• મુદ્દત વધારીને 31 ડિસેમ્બર 2025 કરાઈ
• પ્રમોલગેશનની પ્રક્રિયા અને વાંધા અરજી ડિસેમ્બર 2025 સુધી ચાલશે

Gujarat government's farmer-oriented decision: રાજ્ય સરકારે ખેડૂતોના હિતમાં એક મહત્વપૂર્ણ નિર્ણય લીધો છે. જમીન રી સર્વે અને વાંધા અરજી આપવાની મુદ્દતમાં એક વર્ષનો વધારો કરવામાં આવ્યો છે. અગાઉ આ મુદ્દત આવતીકાલે એટલે કે 31 ડિસેમ્બર 2024ના રોજ પૂરી થતી હતી, જેને હવે વધારીને 31 ડિસેમ્બર 2025 કરવામાં આવી છે.

રાજ્યમાં ડિજિટલ ઈન્ડિયા લેન્ડ રેકોર્ડ્ઝ મોર્ડનાઇઝેશન પ્રોગ્રામ (DILRMP) હેઠળ 33 જિલ્લાઓમાં ખેતીની જમીનની માપણી અને પ્રમોલગેશનની કામગીરી ચાલી રહી છે. પ્રમોલગેશન પછી, ખાતેદારો દ્વારા રેકોર્ડમાં ક્ષતિઓ સુધારવા માટે રજૂઆતો આવે છે. આ ક્ષતિઓ સુધારવા માટે, જમીન મહેસૂલ અધિનિયમની કલમ ૨૦૩ હેઠળ અપીલ કરવાની જોગવાઈ છે, જેમાં સમય અને ખર્ચનો વ્યય થતો હતો.

આ સમસ્યાને ધ્યાનમાં રાખીને, સરકારે સુપ્રિન્ટેન્ડન્ટ લેન્ડ રેકોર્ડ્ઝને સાદી અરજી દ્વારા ક્ષતિઓનો નિકાલ કરવાની સત્તા આપી છે. અગાઉ, આ અરજી કરવાની છેલ્લી તારીખ 31/12/2024 હતી, જેને હવે વધારીને 31/12/2025 કરવામાં આવી છે.

આ નિર્ણયનો મુખ્ય હેતુ ખેડૂતોને ક્ષતિઓ સુધારવામાં થતી હેરાનગતિ અને વકીલ ફી જેવા ખર્ચથી બચાવવાનો છે. હવે ખેડૂતો પાસે અરજી કરવા માટે પૂરતો સમય હશે.

પ્રમોલગેશન પછી વાંધા અરજી રજૂ કરવાની સમય મર્યાદામાં વધારો કરવા સિવાયની અન્ય સૂચનાઓ યથાવત રહેશે.

નોંધનીય છે કે, જાન્યુઆરી 2023માં કેબિનેટની બેઠકમાં જમીન રી-સરવે અંગે મોટો નિર્ણય કરવામાં આવ્યો હતો. સરકારે જૂની સરકારના જમીન રી-સરવે રદ કર્યા હતો અને નવેસરથી જ જમીન માપણી કરાવવાની જાહેરાત કરી હતી. જામનગર અને દેવભૂમિદ્વારકા જિલ્લામાં પાયલટ પ્રોજેક્ટ તરીકે નવી માપણી કર્યા બાદ રી-સરવેના વાંધા નિકાલ માટે સરકારને અરજીઓ મળી હતી.  ગુજરાત સરકારના આ નિર્ણયથી અગાઉ કરાયેલા સરવે માટે ચૂકવાયેલી 700 કરોડની રકમ પાણીમાં ગઈ હતી. મહત્વનું છે કે સરકારને ખેડૂતો તરફથી અનેક ફરિયાદો મળી હતી. જૂના સરવેમાં અનેક ભૂલો હોવાની ફરિયાદો મળી હતી. જેમાં જમીનોના નકશાઓ બદલાઈ ગયા હતા. જેની  બાદ સરકારે ફરીથી રી-સરવેનો નિર્ણય લેવામાં આવ્યો હતો.

આ પણ વાંચો....

આમ, રાજ્ય સરકારે ખેડૂતોના હિતમાં એક મહત્વપૂર્ણ નિર્ણય લઈને તેમને રાહત આપી છે.