મોંઘવારીને નાથવામાં ગુજરાત અવ્વલ: માત્ર ૨.૬૩% છૂટક ફુગાવાનો દર, રાષ્ટ્રીય સરેરાશ અને મોટા રાજ્યો કરતાં ઘણો ઓછો
Gujarat inflation rate: કેન્દ્ર-રાજ્ય સરકારની નીતિઓ સફળ, ગામડાઓમાં શહેરો કરતાં ઓછી મોંઘવારી, ભાવ સ્થિરતા અને વિકાસનું ઉત્તમ સંતુલન.
Retail inflation Gujarat: દુનિયાભરના દેશો હાલમાં મોંઘવારીની સમસ્યા સામે ઝઝૂમી રહ્યા છે, ત્યારે વડાપ્રધાન નરેન્દ્ર મોદીના માર્ગદર્શન અને મુખ્યમંત્રી ભૂપેન્દ્ર પટેલના નેતૃત્વ હેઠળ ગુજરાત રાજ્યે આર્થિક વિકાસની સાથે સાથે ફુગાવાના દરને નિયંત્રિત કરવામાં પણ મોટી સફળતા મેળવી છે. તાજેતરમાં કેન્દ્ર સરકારના આંકડા અને કાર્યક્રમ અમલીકરણ મંત્રાલય દ્વારા જાહેર કરવામાં આવેલા આંકડાઓ આ વાતની પુષ્ટિ કરે છે.
મંત્રાલય દ્વારા જાહેર કરાયેલા માર્ચ ૨૦૨૫ માટેના કન્ઝ્યુમર પ્રાઇસ ઇન્ડેક્સ (CPI) પર આધારિત આંકડાઓ અનુસાર, ગુજરાત રાજ્યનો વાર્ષિક છૂટક ફુગાવાનો દર (રિટેઇલ ઇન્ફ્લેશન રેટ) ફક્ત ૨.૬૩ ટકા નોંધાયો છે. આ દર સમગ્ર દેશની રાષ્ટ્રીય સરેરાશ ૩.૩૪ ટકા કરતા ૦.૭૧ ટકા જેટલો નોંધપાત્ર રીતે ઓછો છે. વધુમાં, ગુજરાતનો આ ફુગાવાનો દર ઘણા મોટા અને આર્થિક રીતે વિકસિત રાજ્યોની સરખામણીમાં પણ ઘણો ઓછો રહ્યો છે.
મુખ્યમંત્રી ભૂપેન્દ્ર પટેલના નેતૃત્વમાં રાજ્ય સરકાર 'વિઝન વિકસિત ગુજરાત કા, મિશન જનકલ્યાણ કા' ની પ્રતિબદ્ધતા સાથે રાજ્યનો સર્વાંગી અને આધુનિક વિકાસ કરવા ઉપરાંત નાગરિકો માટે 'ઇઝ ઓફ લિવિંગ' એટલે કે જીવનની સરળતા સુનિશ્ચિત કરવા માટે પણ સક્રિયપણે કામ કરી રહી છે. સરકાર એક બાજુ વિકાસ અને રોકાણ વધારવા માટે નવા ઉભરી રહેલા ક્ષેત્રોમાં નવી નીતિઓ બનાવી રહી છે, તો બીજી બાજુ નાગરિકો માટે રોજબરોજની જીવનજરૂરી ચીજવસ્તુઓની કિંમતો સ્થિર રાખવા માટે પણ વિશેષ પ્રયત્નો કરી રહી છે.
ગુજરાતના ગામડાઓમાં શહેરો કરતા ઓછો ફુગાવાનો દર:
રાજ્ય સરકારે લીધેલા નીતિગત પગલાંઓ દ્વારા ફુગાવાના દરને નિયંત્રિત કરવામાં મળેલી સફળતાના પરિણામસ્વરૂપે માર્ચ ૨૦૨૫ માટે રાજ્યનો ફુગાવાનો દર ૨.૬૩ ટકા રહ્યો છે. રસપ્રદ વાત એ છે કે, ગુજરાતના ગ્રામીણ વિસ્તારોમાં ફુગાવાનો દર ૨.૬૧ ટકા રહ્યો, જ્યારે શહેરી વિસ્તારોમાં આ દર ગ્રામીણ વિસ્તારોની સરખામણીએ થોડો વધુ એટલે કે ૨.૭૦ ટકા રહ્યો. આ બંને આંકડાઓ રાષ્ટ્રીય ગ્રામીણ સરેરાશ ૩.૨૫ ટકા અને રાષ્ટ્રીય શહેરી સરેરાશ ૩.૪૩ ટકાની સરખામણીએ ઘણા ઓછા છે. આ આંકડાઓ પરથી સ્પષ્ટ થાય છે કે કેન્દ્ર અને રાજ્ય સરકારની ગ્રામ વિકાસલક્ષી નીતિઓના કારણે રાજ્યના ગામડાઓમાં છૂટક વસ્તુઓ સસ્તી થઈ છે અને ગામડાઓમાં શહેરો કરતા મોંઘવારી ઓછી છે. રાજ્ય સરકારની અનેક યોજનાઓ ખેડૂતલક્ષી તથા ગ્રામ વિકાસલક્ષી હોવાને કારણે ગામડાઓ સમૃદ્ધિ તરફ આગળ વધી રહ્યા છે.
ફુગાવાના દરમાં ઘટાડો થવામાં રાજ્ય સરકારની મહત્વપૂર્ણ પહેલો:
'વિકસિત ગુજરાતથી વિકસિત ભારત' ના વિઝન સાથે આર્થિક વિકાસની દિશામાં ઝડપથી આગળ વધી રહેલા ગુજરાત જેવા ઔદ્યોગિક રાજ્યમાં ફુગાવાનો દર નિયંત્રિક કરવો એ એક મોટો પડકાર છે. પરંતુ, રાજ્ય સરકારની રાજકોષીય સમજદારી, પુરવઠા શૃંખલામાં સુધારા, બજારમાં સ્પર્ધાને પ્રોત્સાહન, કાર્યક્ષમ બજાર નિયમન અને લઘુત્તમ ટેકાના ભાવ (MSP) અને જાહેર વિતરણ વ્યવસ્થા (PDS) જેવી ખાદ્ય ભાવ વ્યવસ્થાપન પહેલોને કારણે ફુગાવો નોંધપાત્ર રીતે નિયંત્રણમાં રહ્યો છે. આ આંકડા દર્શાવે છે કે ગુજરાતે ભાવ સ્થિરતા તેમજ ઝડપી આર્થિક વિકાસના લક્ષ્યોને પ્રાપ્ત કરવામાં ઉત્તમ સંતુલન પ્રાપ્ત કર્યું છે.
મોટા અને વિકસિત રાજ્યોની સરખામણીમાં ગુજરાતનું શાનદાર પ્રદર્શન:
ગુજરાત દ્વારા કાર્યક્ષમ રીતે ફુગાવાના સંચાલનનું આ પરિણામ છે કે રાજ્યએ મોટા અને વિકસિત રાજ્યોની સરખામણીમાં ફુગાવાને નિયંત્રિત રાખવાની બાબતમાં શાનદાર પ્રદર્શન કર્યું છે. આંકડા અને કાર્યક્રમ અમલીકરણ મંત્રાલયના લેટેસ્ટ આંકડાઓ મુજબ, ઉત્તરપ્રદેશ (૩.૦૧%), બિહાર (૩.૧૧%), મધ્યપ્રદેશ (૩.૧૨%), રાજસ્થાન (૨.૬૬%), છત્તીસગઢ (૪.૨૫%), પશ્ચિમ બંગાળ (૩.૧૭%), કર્ણાટક (૪.૪૪%), મહારાષ્ટ્ર (૩.૮૬%) અને તમિલનાડુ (૩.૭૫%) જેવા મોટા અને વિકસિત રાજ્યોની સરખામણીએ ગુજરાત ૨.૬૩ ટકાના દર સાથે ફુગાવા પર નિયંત્રણ મેળવવામાં અસરકારક રીતે સફળ રહ્યું છે. રાજસ્થાન ૨.૬૬% સાથે ગુજરાતની સૌથી નજીક છે, પરંતુ ગુજરાતનો દર હજુ પણ ઓછો છે. બીજી બાજુ, કેરળ ૬.૫૯ ટકાના ઊંચા ફુગાવાના દર સાથે દેશમાં સૌથી વધુ મોંઘવારી દર ધરાવતું રાજ્ય બન્યું છે.
ટોપ સ્ટોરી
ટ્રેન્ડિંગ સમાચાર
