ગુજરાતમાં મેઘરાજાની ધમાકેદાર બેટિંગ: 6 કલાકમાં 29 તાલુકા ભીંજાયા, 5 જિલ્લામાં ઓરેન્જ એલર્ટ જાહેર

Gujarat heavy rain: સુરતના ઉમરપાડામાં સૌથી વધુ 1.77 ઈંચ વરસાદ ખાબક્યો, દક્ષિણ ગુજરાતના 5 જિલ્લામાં ઓરેન્જ એલર્ટ અને દરિયો ન ખેડવા માછીમારોને ચેતવણી.

Heavy rain in Gujarat 29 talukas drenched orange alert in Surat

Source : ai

Show Quick Read

Key points generated by AI, verified by newsroom

• દક્ષિણ ગુજરાતના ૨૯ તાલુકામાં ભારે વરસાદ, ઉમરપાડામાં સર્વાધિક.
• પાણી ભરાતા ટ્રાફિક જામ; ખેડૂતો વરસાદથી ખુશ.
• આઈએમડી દ્વારા પાંચ જિલ્લામાં ભારે વરસાદનું ઓરેન્જ એલર્ટ.
• માછીમારોને પાંચ દિવસ દરિયો ન ખેડવા કડક સૂચના.

Gujarat heavy rain: ગુજરાતમાં ધીમે ધીમે ચોમાસું તેની ગતિ પકડી રહ્યું છે. આજે 22 જૂનની સવારે 6 થી બપોરના 12 વાગ્યા સુધીના માત્ર 6 કલાકમાં જ દક્ષિણ ગુજરાતના 29 જેટલા તાલુકાઓમાં મેઘરાજાએ ધમાકેદાર બેટિંગ કરી છે. જેમાં સૌથી વધુ વરસાદ સુરત જિલ્લાના ઉમરપાડામાં 1.77 ઈંચ નોંધાયો છે. સવારના સમયે જ પડેલા આ જોરદાર વરસાદને કારણે અનેક નીચાણવાળા વિસ્તારોમાં અને રસ્તાઓ પર પાણી ભરાઈ ગયા છે, જેના લીધે લોકોને ટ્રાફિક જામનો સામનો કરવો પડ્યો છે. બીજી તરફ, હવામાન વિભાગે (IMD) દક્ષિણ ગુજરાતના 5 જિલ્લાઓમાં ભારે વરસાદની આગાહી સાથે ઓરેન્જ એલર્ટ જાહેર કર્યું છે અને દરિયામાં કરંટ હોવાથી માછીમારોને 5 દિવસ સુધી દરિયો ન ખેડવા કડક સૂચના આપી છે.

ક્યાં કેટલો વરસાદ નોંધાયો?

સ્ટેટ ઇમરજન્સી ઓપરેશન સેન્ટર (SEOC)ના લેટેસ્ટ આંકડા મુજબ, દક્ષિણ ગુજરાતમાં સાર્વત્રિક મેઘમહેર જોવા મળી છે.

સુરત: ઉમરપાડામાં સૌથી વધુ 45 mm (1.77 ઇંચ) અને આરેથમાં 26 mm (1.02 ઇંચ) વરસાદ નોંધાયો છે. આ ઉપરાંત સુરત સિટીમાં પણ 15 mm અને કામરેજમાં હળવો વરસાદ પડ્યો છે.

નર્મદા: સાગબારા તાલુકામાં 39 mm (1.54 ઇંચ) અને ચીકડામાં 16 mm વરસાદ પડ્યો છે.

વલસાડ: વલસાડ તાલુકામાં 4 કલાકમાં જ 30 mm (1.18 ઇંચ) વરસાદ ખાબક્યો હતો, જ્યારે પારડીમાં 14 mm અને કપરાડામાં પણ વરસાદી માહોલ જોવા મળ્યો છે.

તાપી અને નવસારી: તાપીના સોનગઢમાં 16 mm, વાલોડમાં 14 mm, જ્યારે નવસારીના ખેરગામમાં 12 mm અને જલાલપોર તથા ગણદેવીમાં પણ ધીમી ધારે વરસાદ પડ્યો છે.

પાણી ભરાતાં લોકોને હાલાકી, ખેડૂતો ખુશખુશાલ

સવારના ઓફિસ અને સ્કૂલ જવાના સમયે જ વરસાદ તૂટી પડતાં સુરત સિટી અને વલસાડના મુખ્ય રસ્તાઓ તથા નીચાણવાળી સોસાયટીઓમાં પાણી ભરાઈ ગયા હતા. પાણી ભરાઈ જવાના કારણે વાહનચાલકોને ભારે હાલાકીનો સામનો કરવો પડ્યો હતો અને અનેક સ્થળે ટ્રાફિક જામના દૃશ્યો સર્જાયા હતા. જોકે, આ વરસાદ વાવણી લાયક સાબિત થતાં ખેડૂતોમાં ભારે આનંદની લાગણી છવાઈ ગઈ છે.

રાજ્યના કયા જિલ્લાઓમાં છે એલર્ટ?

હવામાન વિભાગની આગાહી મુજબ, સોમવારે (22મી જૂન) સાંજે 4 વાગ્યા સુધી રાજ્યના અનેક જિલ્લાઓમાં ભારે વરસાદી માહોલ રહેશે.

ઓરેન્જ એલર્ટ: સુરત, તાપી, નવસારી, ડાંગ, વલસાડ તેમજ સંઘપ્રદેશ દમણ અને દાદરા નગર હવેલીમાં વહીવટી તંત્રને સાબદું રહેવા જણાવાયું છે.

યલો એલર્ટ: સૌરાષ્ટ્ર અને મધ્ય-પૂર્વ ગુજરાતના અમરેલી, ભાવનગર, બોટાદ, ભરૂચ, વડોદરા, પંચમહાલ, દાહોદ, છોટાઉદેપુર, નર્મદા અને દીવમાં હળવા વરસાદની શક્યતા સાથે યલો ઍલર્ટ આપવામાં આવ્યું છે.

આ પણ વાંચોઃ Weather Alert: કાલે દેશના 17 રાજ્યોમાં વાવાઝોડા સાથે ભારે વરસાદની ચેતવણી, IMD નું મોટું એલર્ટ

માછીમારોને દરિયો ખેડવા પર કડક પ્રતિબંધ

કેન્દ્રીય ગૃહ મંત્રાલયના અહેવાલ મુજબ, ગુજરાતને સ્પર્શતા અરબી સમુદ્ર અને સોમાલિયા તટની આસપાસ આગામી 5 દિવસ દરમિયાન પવનની ગતિ અતિ જોખમી સ્તરે પહોંચી શકે છે. દરિયામાં પવનની સામાન્ય ગતિ 40 થી 55 કિમી પ્રતિ કલાક રહેશે, જે ઝટકા સાથે વધીને 60 થી 65 કિમી પ્રતિ કલાકની ઝડપ પકડી શકે છે.

સમુદ્રમાં ઊંચા મોજા ઉછળવાની અને જોખમી સ્થિતિ સર્જાવાની શક્યતા હોવાથી તંત્ર અને કોસ્ટ ગાર્ડે ગુજરાતના તમામ માછીમારોને આગામી સૂચના સુધી દરિયો ન ખેડવા કડક આદેશ આપ્યો છે. જે માછીમારો હાલ દરિયામાં છે તેમને તાત્કાલિક સુરક્ષિત કિનારે પરત ફરી જવા અને બંદરો પર બોટ સુરક્ષિત જગ્યાએ બાંધી દેવા તાકીદ કરાઈ છે.

હવામાન નિષ્ણાતોના મતે, આગામી 48 કલાકમાં ચોમાસું મહારાષ્ટ્રના વધુ વિસ્તારોને આવરી લેશે. જોકે, ગુજરાતના બાકીના ભાગોમાં ચોમાસાની સાર્વત્રિક એન્ટ્રી માટે નાગરિકોએ હજુ થોડી રાહ જોવી પડશે.

આ પણ વાંચોઃ કાળાડિબાંગ વાદળો વચ્ચે આ વિસ્તારોમાં શરૂ થયો વરસાદ, પ્રિ-મોનસૂન કામગીરીની તંત્રની ખુલી પોલ