ગુજરાતમાં કાલે વરસાદ ભુક્કા કાઢી નાખશે: અમદાવાદ-ગાંધીનગર સહિત 17થી વધુ જિલ્લાઓમાં ભારે વરસાદની આગાહી!

Tomorrow Rain Alert: સૌરાષ્ટ્ર-કચ્છના જામનગર, મોરબી અને કચ્છમાં પણ ભારે વરસાદની શક્યતા; આગામી 24 કલાક મહત્વપૂર્ણ.

ગુજરાતમાં કાલે ભારે વરસાદની હવામાન વિભાગની આગાહી

Source : તસવીર- ABP અસ્મિતા

Gujarat Rain Alert: ગુજરાતમાં ચોમાસું હવે સક્રિય બની રહ્યું છે. હવામાન વિભાગ દ્વારા આગામી 22 જૂન માટે ભારે વરસાદની આગાહી જાહેર કરવામાં આવી છે, જે અનુસાર રાજ્યના મોટાભાગના વિસ્તારોમાં મેઘમહેર જોવા મળી શકે છે. ખાસ કરીને, મધ્ય અને ઉત્તર ગુજરાત તેમજ દક્ષિણ ગુજરાતના ઘણા જિલ્લાઓમાં ભારે વરસાદની શક્યતા છે.

મધ્ય અને ઉત્તર ગુજરાતમાં ભારે વરસાદ

આગાહી મુજબ, ગાંધીનગર અને અમદાવાદ સહિત પાટણ, મહેસાણા, અરવલ્લી, ખેડા, આણંદ, પંચમહાલ, દાહોદ અને મહીસાગર જિલ્લાઓમાં ભારે વરસાદની શક્યતા છે. આ વિસ્તારોમાં છેલ્લા કેટલાક દિવસોથી વાતાવરણમાં ભેજ વધ્યો છે અને વાવણીલાયક વરસાદની રાહ જોવાઈ રહી હતી, ત્યારે આ આગાહી ખેડૂતો માટે ખુશીના સમાચાર લઈને આવી છે.

દક્ષિણ ગુજરાત અને સૌરાષ્ટ્ર-કચ્છમાં પણ મેઘમહેર

દક્ષિણ ગુજરાતમાં પણ મેઘરાજા મન મૂકીને વરસશે તેવી આગાહી છે. ડાંગ અને તાપી, બનાસકાંઠા, સાબરકાંઠા, નવસારી, વલસાડ તેમજ સંઘપ્રદેશ દમણ અને દાદરા નગર હવેલી માં પણ ભારે વરસાદ પડી શકે છે. આ ઉપરાંત, સૌરાષ્ટ્ર-કચ્છના કેટલાક જિલ્લાઓ જેવા કે જામનગર, મોરબી અને કચ્છ માં પણ ભારે વરસાદની સંભાવના વ્યક્ત કરવામાં આવી છે.

ગુજરાતમાં આગામી 7 દિવસ સુધી વરસાદની આગાહી

હવામાન વિભાગ દ્વારા આગામી 7 દિવસ સુધી ગુજરાતમાં વરસાદની આગાહી કરવામાં આવી છે. આજે રાજ્યના કેટલાક ભાગોમાં ભારેથી અતિ ભારે વરસાદની સંભાવના વ્યક્ત કરવામાં આવી છે. ખાસ કરીને, બનાસકાંઠા અને સાબરકાંઠા જિલ્લા માટે અત્યંત ભારે વરસાદની આગાહી સાથે રેડ એલર્ટ જાહેર કરવામાં આવ્યું છે.

હવામાન વિભાગે આગામી 5 દિવસ સુધી માછીમારોને દરિયો ન ખેડવાની સૂચના આપી છે, કારણ કે પવનની ગતિ 41 થી 61 કિલોમીટર પ્રતિ કલાકની ઝડપે ફૂંકાવાની શક્યતા છે.

રાજ્યમાં બે વરસાદી સિસ્ટમ સક્રિય થતા અલગ અલગ જિલ્લાઓમાં વરસાદની આગાહી કરવામાં આવી છે. આજે અમદાવાદ અને ગાંધીનગરમાં પણ ભારે વરસાદની સંભાવના છે.

વિવિધ જિલ્લાઓ માટે એલર્ટ જાહેર કરવામાં આવ્યા છે:

• અતિ ભારે વરસાદ (ઓરેન્જ એલર્ટ): કચ્છ, પાટણ, ગાંધીનગર, મહેસાણા, અરવલ્લી, અમદાવાદ, સુરેન્દ્રનગર, મહીસાગર, દાહોદ, સુરત, નર્મદા, તાપી, ડાંગ, નવસારી, વલસાડ, દમણ અને દાદરા નગર હવેલી.
• ભારે વરસાદ (યલો એલર્ટ): મોરબી, જામનગર, રાજકોટ, બોટાદ, અમરેલી, ભાવનગર, ખેડા, પંચમહાલ, આણંદ, વડોદરા અને ભરૂચ.