પતંગ રસિકો માટે ખુશખબર: કાલે પતંગ ચકાવવા ઠુમકા નહીં મારવા પડે, જાણો પવનની ગતિ કેટલી રહેશે

ઉત્તરાયણમાં ૧૫થી ૨૦ કિમીની ઝડપે પવન ફૂંકાવાની હવામાન વિભાગની આગાહી, ઠંડીમાં પણ આંશિક રાહત

ઉત્તરાયણ પર પવનને લઈને હવામાન વિભાગની આગાહી

Kite flying winds forecast: ગુજરાતના પતંગ રસિકો માટે સારા સમાચાર છે! આવતીકાલે એટલે કે મંગળવારે ઉત્તરાયણના દિવસે પતંગ ચગાવવા માટે પતંગબાજોને વધુ ઠુમકા મારવાની જરૂર નહીં પડે. હવામાન વિભાગે પવન અને ઠંડીને લઈને આગાહી કરી છે, જે પતંગ રસિકો માટે આનંદના સમાચાર લઈને આવી છે.

હવામાન વિભાગના જણાવ્યા અનુસાર, આવતીકાલે ઉત્તર-પૂર્વથી પૂર્વ દિશામાં ૧૫ થી ૨૦ કિમી પ્રતિ કલાકની ઝડપે પવન ફૂંકાશે. આ પવનની ગતિ પતંગ ચગાવવા માટે એકદમ યોગ્ય છે, જેના કારણે પતંગ રસિકો વિના મુશ્કેલીએ પતંગ ઉડાવી શકશે અને ઉત્તરાયણની મજા માણી શકશે.

આ સાથે જ હવામાન વિભાગે આગામી બે દિવસ દરમિયાન લઘુતમ તાપમાનમાં ૨-૩ ડિગ્રી સેલ્સિયસનો વધારો થવાની પણ આગાહી કરી છે, જેનાથી ઠંડીમાં થોડી રાહત મળશે. જો કે, ત્યારબાદ તાપમાનમાં ફરીથી ઘટાડો થવાની સંભાવના છે, જેના કારણે ઠંડીનું જોર ફરી વધશે.

હાલમાં રાજ્યભરમાં વહેલી સવારથી ઠંડા પવનની લહેર જોવા મળી રહી છે, પરંતુ ઉત્તરાયણના દિવસે સારા પવનની આગાહીથી પતંગ રસિકોમાં ભારે ઉત્સાહ જોવા મળી રહ્યો છે. હવામાન વિભાગે ૧૯ જાન્યુઆરી સુધી રાજ્યભરમાં શુષ્ક હવામાન રહેવાની સંભાવના વ્યક્ત કરી છે.

છેલ્લા ૨૪ કલાકમાં રાજ્યનું સૌથી ઓછું તાપમાન ૮.૮ ડિગ્રી નલિયામાં નોંધાયું હતું. અન્ય શહેરોનું તાપમાન આ પ્રમાણે રહ્યું: વડોદરામાં ૧૩.૨ ડિગ્રી, અમદાવાદમાં ૧૨.૪ ડિગ્રી, સુરેન્દ્રનગરમાં ૧૧.૮ ડિગ્રી, રાજકોટમાં ૧૧ ડિગ્રી, અમરેલીમાં ૧૩ ડિગ્રી, ભાવનગરમાં ૧૫.૬ ડિગ્રી અને સુરતમાં ૧૮.૪ ડિગ્રી. આમ, હવામાન વિભાગની આગાહી પતંગ રસિકો માટે ઉત્સાહ અને આનંદ લઈને આવી છે.

હવામાન નિષ્ણાંત પરેશ ગોસ્વામીની આગાહી

હવામાન નિષ્ણાંત પરેશ ગોસ્વામીએ મકરસંક્રાંતિના દિવસ માટે ગુજરાતના હવામાન વિશે આગાહી કરી છે. તેમની આગાહી મુજબ, આ વર્ષે ઘણા વર્ષો પછી મકરસંક્રાંતિના દિવસે પવનની ગતિ અને દિશા ગુજરાત માટે અનુકૂળ રહેશે. મોટા ભાગના વિસ્તારોમાં આકાશ ચોખ્ખું રહેશે અને મહત્તમ તાપમાન 25 થી 30 ડિગ્રી સેલ્સિયસની વચ્ચે રહેવાની શક્યતા છે.

વિસ્તાર પ્રમાણે પવનની ગતિ અને દિશા

બનાસકાંઠા અને અરવલ્લી: આ વિસ્તારોમાં તાપમાન 20 ડિગ્રી સેલ્સિયસ જેટલું રહી શકે છે.

પોરબંદર, દ્વારકા, સુરેન્દ્રનગર, રાજકોટ, જામનગર અને કચ્છના ભાગો: આ વિસ્તારોમાં પવનની ગતિ સામાન્ય કરતાં વધારે, એટલે કે 14 થી 18 કિમી પ્રતિ કલાક જેટલી રહેશે.

ઉત્તર ગુજરાત (સાબરકાંઠા, બનાસકાંઠા, પાટણ, મહેસાણા): પવનની દિશા ઉત્તર અને ઉત્તર-પૂર્વની રહેશે અને પવનની ઝડપ પણ સારી રહેશે.

છોટાઉદેપુર, દાહોદ, ગોધરા: આ વિસ્તારોમાં પવનની દિશા ઉત્તર-પશ્ચિમ અને ઉત્તરની રહેશે અને પવનની ઝડપ 12 થી 15 કિમી પ્રતિ કલાક રહેશે.

આણંદ, ખેડા, નડિયાદ, વિરમગામ: આ વિસ્તારોમાં પવનની ઝડપ 10 થી 12 કિમી પ્રતિ કલાક રહેશે.

મધ્ય ગુજરાત: આ વિસ્તારમાં પવનની ગતિ અનુકૂળ રહેશે.

દક્ષિણ ગુજરાતના જિલ્લાઓ: આ વિસ્તારોમાં પવનની દિશા 8 થી 10 કિમી પ્રતિ કલાક રહેશે, પરંતુ બપોર બાદ પવનની ગતિ વધી જશે.

આ આગાહી મકરસંક્રાંતિની ઉજવણી કરતા લોકો માટે ખૂબ જ ઉપયોગી છે, ખાસ કરીને પતંગ ચગાવવાના શોખીનો માટે. અનુકૂળ પવનની સ્થિતિને લીધે પતંગ ચગાવવાનો આનંદ બમણો થઈ જશે.

આ પણ વાંચો...