Rain: રાજ્યમાં સાર્વત્રિક મેઘમહેર, જૂનાગઢ-ગીર સોમનાથ પાણી-પાણી, બે કલાકમાં 71 તાલુકાઓ ભીંજાયા
Gujarat Rain: મેઘરાજાની આ તોફાની ગતિનો અંદાજ એ વાત પરથી લગાવી શકાય છે કે છેલ્લા માત્ર 2 કલાકમાં જ રાજ્યના 71 તાલુકાઓમાં સપાટાબંધ વરસાદ નોંધાયો છે
Gujarat Rain: ગુજરાતમાં ચોમાસાએ ધમાકાદેર શરૂઆત કરી દીધી છે. જેના પગલે આજે મેઘરાજાએ રાજ્યના 109 તાલુકાઓમાં ધમાકેદાર બેટિંગ કરીને જળબંબોળની સ્થિતિ સર્જી દીધી છે. ગુજરાતમાં અત્યારે સક્રિય થયેલી મજબૂત લો-પ્રેશર સિસ્ટમના કારણે સમગ્ર રાજ્યમાં અને ખાસ કરીને સૌરાષ્ટ્રમાં સાર્વત્રિક અને ભારેથી અતિભારે વરસાદ નોંધાયો છે.
આ આકાશી આફતમાં સૌથી વધુ પ્રભાવિત જૂનાગઢનું માંગરોળ બન્યું છે, જ્યાં આજે દિવસ દરમિયાન જ આભ ફાટ્યું હોય તેમ સાંબેલાધારે 9 ઈંચ જેટલો વરસાદ ખાબકી ગયો છે.
સૌરાષ્ટ્રના જૂનાગઢ અને ગીર સોમનાથ જિલ્લામાં મેઘરાજાએ તોફાની ઇનિંગ રમી છે. માંગરોળમાં 9 ઈંચ વરસાદ બાદ જૂનાગઢના જ માળિયા હાટીના અને કેશોદ તાલુકામાં પણ ધોધમાર 6 ઈંચ વરસાદ પડતાં રસ્તાઓ નદીઓમાં ફેરવાઈ ગયા હતા. ગીર સોમનાથના સુત્રાપાડા અને પાટણ-વેરાવળ સહિત જૂનાગઢના માણાવદરમાં પણ ભારે 5 ઈંચ વરસાદ ઝીંકાયો છે. જ્યારે દક્ષિણ ગુજરાતના સુરતના ઓલપાડ તાલુકામાં પોણા 4 ઈંચ વરસાદે સ્થાનિકોને ભારે મુશ્કેલીમાં મૂક્યા હતા. આ સિવાય વંથલી, શિનોર, કોડીનાર અને ઉપલેટામાં પણ 3 ઈંચ સુધી પાણી વહી ગયું હતું.
મેઘરાજાની આ તોફાની ગતિનો અંદાજ એ વાત પરથી લગાવી શકાય છે કે છેલ્લા માત્ર 2 કલાકમાં જ રાજ્યના 71 તાલુકાઓમાં સપાટાબંધ વરસાદ નોંધાયો છે. ટૂંકા ગાળાના આ વરસાદમાં માણાવદર તાલુકામાં અઢી ઈંચ, જ્યારે ગરબાડા અને જામજોધપુર તાલુકામાં ધબધબાવતા 2 ઈંચ વરસાદથી નીચાણવાળા વિસ્તારો પાણીમાં ગરકાવ થઈ ગયા હતા. તાલાલા, હાંસોટ અને ગરબાડા જેવા અન્ય વિસ્તારોમાં પણ 2 ઈંચ વરસાદ નોંધાતા નદી-નાળા છલકાયા છે. વહીવટી તંત્ર દ્વારા નીચાણવાળા વિસ્તારોમાં એલર્ટ જાહેર કરી દેવામાં આવ્યું છે.
ગુજરાતમાં આ ભૌગોલિક સાયક્લોનિક સરક્યુલેશનના લીધે ખાસ કરીને સૌરાષ્ટ્ર, દક્ષિણ ગુજરાત અને મધ્ય ગુજરાતના વિસ્તારોમાં આગામી છ દિવસ સુધી આકાશી આફત વરસી શકે છે. હવામાન વિભાગના નકશા મુજબ, આજે જ રાજ્યના ચાર સંવેદનશીલ જિલ્લાઓમાં અત્યંત ભારે વરસાદના પગલે 'રેડ એલર્ટ' અને અન્ય પાંચ જિલ્લાઓમાં ભારે વરસાદની સંભાવનાને જોતાં 'ઓરેન્જ એલર્ટ' જાહેર કરીને સ્થાનિક વહીવટી તંત્રને સજ્જ રહેવા સુચના અપાઈ છે. આ આકાશી પરિવર્તનની સૌથી ગંભીર અસર દક્ષિણ ગુજરાતના ભાગોમાં જોવા મળશે, જ્યાં આગામી ચાર દિવસ સુધી અતિભારે વરસાદ ખાબકવાની પૂર્વાનુમાન હોવાથી નીચાણવાળા વિસ્તારો અને નદી કિનારાના ગામોને એલર્ટ કરી દેવાયા છે. સિસ્ટમની તીવ્રતાના કારણે સૌરાષ્ટ્રના દરિયાકાંઠાના જિલ્લાઓ અને મધ્ય ગુજરાતના પંથકોમાં પણ વ્યાપક નુકસાની અને જળબંબાકાર થવાનો ભય સેવાઈ રહ્યો છે. આ તરફ ઉત્તર અને પ્રદેશના અન્ય વિસ્તારોની વાત કરીએ તો, અમદાવાદ અને પાટનગર ગાંધીનગરમાં પણ આજથી જ વાદળછાયા વાતાવરણ વચ્ચે હળવાથી મધ્યમ વરસાદી ઝાપટાં પડવાની શરૂઆત થવાની મજબૂત સંભાવના છે.
ટોપ સ્ટોરી
ટ્રેન્ડિંગ સમાચાર
