Gujarat Rain: બપોર સુધી મેઘરાજાની તોફાની બેટિંગ, 242 તાલુકાઓમાં ધોધમાર વરસ્યો, રાધનપુર જળબંબાકાર
Gujarat Rain: ઉત્તર ગુજરાત સહિત રાજ્યના વિવિધ વિસ્તારોમાં સવારથી જ કાળાડીબાંગ વાદળોની ઘેરાબંધી સાથે ગાજવીજ સાથે વરસાદ શરૂ થયો હતો
- ગુજરાતમાં હવામાન પલટાયું, ૨૪૨ તાલુકાઓમાં વ્યાપક વરસાદ.
- પાટણના રાધનપુરમાં ૮.૯ ઇંચ વરસાદ, જળબંબાકાર જેવી સ્થિતિ.
- ઉત્તર ગુજરાત સહિત અનેક વિસ્તારોમાં પણ ભારે વરસાદ નોંધાયો.
- ખેડૂતોને પાક માટે રાહત, તંત્ર એલર્ટ પર છે.
Gujarat Rain: રાજ્યમાં આજે સવારથી હવામાનમાં અચાનક પલટો આવતાં મેઘરાજાએ તોફાની બેટિંગ શરૂ કરી છે, જેના કારણે 242 તાલુકાઓમાં વ્યાપક વરસાદ નોંધાયો છે. પાટણના રાધનપુરમાં આકાશી આફત સ્વરૂપે સૌથી વધુ 8.9 ઈંચ જેટલો ભારે વરસાદ ખાબકતાં સમગ્ર વિસ્તાર જળબંબાકાર બન્યો છે અને સ્થાનિક જનજીવન પર તેની વ્યાપક અસર જોવા મળી રહી છે.
ઉત્તર ગુજરાત સહિત રાજ્યના વિવિધ વિસ્તારોમાં સવારથી જ કાળાડીબાંગ વાદળોની ઘેરાબંધી સાથે ગાજવીજ સાથે વરસાદ શરૂ થયો હતો. ઉત્તર ગુજરાતના બનાસકાંઠા અને પાટણ જિલ્લામાં મેઘરાજાએ સૌથી રોદ્ર સ્વરૂપ બતાવ્યું હતું. ભાભરમાં 6.77 ઈંચ, દિયોદરમાં 6.73 ઈંચ અને સાંતલપુરમાં 6.5 ઈંચ જેટલો ભારે વરસાદ નોંધાયો હતો. આ ઉપરાંત ખેડા જિલ્લાના મહેમદાવાદમાં 5.2 ઈંચ, હડાદમાં 4.41 ઈંચ, ધનસુરામાં 4.13 ઈંચ, ઓગડમાં 4.06 ઈંચ અને ગાંધીનગરના દહેગામમાં 3.98 ઈંચ વરસાદ વરસ્યો હતો. મહીસાગરના વીરપુરમાં 3.9 ઈંચ, અમરેલીના લીલીયામાં 3.66 ઈંચ, લુણાવાડામાં 3.43 ઈંચ તેમજ સુઈગામ અને ખેરાલુમાં 3 ઈંચથી વધુ વરસાદ નોંધાયો હતો. મોરબી, શહેરા, ભિલોડા, અમરેલી, હારીજ, કડાણા, બાલાસિનોર અને મોડાસામાં પણ 2.5 થી 3 ઈંચ સુધીનો નોંધપાત્ર વરસાદ પડતાં નીચાણવાળા વિસ્તારોમાં પાણી ભરાઈ ગયા હતા અને માર્ગ વાહનવ્યવહાર પર તેની માઠ અસર પડી હતી.
રાજ્યભરમાં સાર્વત્રિક વરસાદથી નીચાણવાળા વિસ્તારો અને રસ્તાઓ પર પાણી ભરાતાં તંત્ર દ્વારા સાવચેતીના પગલાં લેવામાં આવી રહ્યા છે. આ વરસાદથી ખેડૂતોના પાકને નવું જીવન મળતાં રાહત અનુભવાઈ છે, પરંતુ કેટલાક વિસ્તારોમાં ભારે પાણી ભરાવાના કારણે વહીવટી તંત્રે બચાવ કામગીરી હાથ ધરી છે. આવનારા કલાકોમાં પણ વરસાદી માહોલ જળવાઈ રહેવાની સંભાવના હોવાથી તંત્ર એલર્ટ મોડ પર છે.
અમદાવાદ, ગાંધીનગર, પાટણ અને હિંમતનગરમાં જળબંબાકાર
- અમદાવાદ: શહેરમાં અનેક માર્ગો પાણીમાં ગરકાવ થઈ ગયા છે. એરપોટ સર્કલ પાસે પાણી ભરાતાં એક તરફનો રસ્તો બંધ કરવો પડ્યો હતો અને નિકાલ માટે AMC એ ગટરના ઢાંકણા ખોલવા પડ્યા હતા.
- ગાંધીનગર: નવા સમાવિષ્ટ રાયસણ વિસ્તારમાં નિર્માણાધીન આઇકોનિક રસ્તા પર પાણી ભરાઈ જતાં વાહનવ્યવહાર અટકી ગયો છે અને સ્થાનિકોની હાલત કફોડી બની છે.
- પાટણ (રાધનપુર): રાધનપુરમાં સવારથી જ 9 ઇંચ વરસાદ ખાબકતાં મુખ્ય બજારોમાં 2 ફૂટ સુધી પાણી ભરાઈ ગયા છે. દુકાનોમાં પાણી ઘૂસતાં વેપાર-રોજગાર ઠપ્પ થઈ ગયો છે. GRD અને પોલીસ તંત્ર રસ્તા પર આવી લોકોને મદદ કરી રહ્યું છે.
- હિંમતનગર: હિંમતનગરમાં માત્ર 1.75 ઇંચ વરસાદમાં જ નગરપાલિકાના પ્રી-મોન્સૂન દાવાઓની પોલ ખુલી ગઈ છે. સહકારીજિનથી ધનસુરાને જોડતા સ્ટેટ હાઇવે પર પાણી ભરાઈ જતાં બંને લેન પર ભારે ટ્રાફિક જામ સર્જાયો હતો અને અનેક વાહનો રસ્તા વચ્ચે બંધ પડી ગયા હતા.
ટોપ સ્ટોરી
ટ્રેન્ડિંગ સમાચાર
