Gujarat Rain: ભાવનગર, અમરેલી, સુરત,ભરૂચમાં અતિ ભારે વરસાદનું રેડ એલર્ટ, જાણો લેટેસ્ટ આગાહી

રાજ્યમાં વરસાદને લઈ હવામાન વિભાગ દ્વારા નવી લેટેસ્ટ આગાહી જાહેર કરવામાં આવી છે. આ આગાહી પ્રમાણે રાજ્યમાં  આજથી 10 મે સુધી ગાજવીજ સાથે વરસાદની આગાહી કરવામાં આવી છે.

વરસાદને લઈ રેડ એલર્ટ

Source : તસવીર-ABP અસ્મિતા

અમદાવાદ: રાજ્યમાં વરસાદને લઈ હવામાન વિભાગ દ્વારા નવી લેટેસ્ટ આગાહી જાહેર કરવામાં આવી છે. આ આગાહી પ્રમાણે રાજ્યમાં  આજથી 10 મે સુધી ગાજવીજ સાથે વરસાદની આગાહી કરવામાં આવી છે.  આગામી ચાર દિવસ સુધી ગુજરાતના અનેક જિલ્લાઓમાં મેઘરાજા ધમાકેદાર બેટિંગ કરશે. રાજ્યમાં અપર એર સાયક્લોનિક સર્ક્યુલેશન સક્રિય થયું છે. રાજસ્થાન અને તેની આસપાસ આ સિસ્ટમ સક્રિય થઈ છે. આ સિસ્ટમના કારણે વાતાવરણમાં પલટો આવ્યો છે અને ધોધમાર વરસાદ વરસી રહ્યો છે.  

ભારે વરસાદનું રેડ એલર્ટ

હવામાન વિભાગની આગાહી અનુસાર,  આજે ભાવનગર, અમરેલી, સુરત,ભરૂચમાં ભારે વરસાદનું રેડ એલર્ટ આપવામાં આવ્યું છે. આ જિલ્લામાં વરસાદ આજે ભૂક્કા બોલાવશે.  જ્યારે કચ્છ, બનાસકાંઠા, પાટણ, મોરબી, સુરેન્દ્રનગર, રાજકોટ,બોટાદ, જૂનાગઢ, ગીર સોમનાથ, દીવ, આણંદ, પંચમહાલ, છોટા ઉદેપુર, નર્મદા, તાપી, ડાંગ, નવસારી, વલસાડ, દમણ, દાદરા નગર હવેલીમાં અતિભારે વરસાદને લઈ ઓરેન્જ એલર્ટ હવામાન વિભાગે આપ્યું છે. 

બરફના કરાની સાથે અત્યંત ભારે વરસાદ પડવાની આગાહી

જ્યારે અમદાવાદ,ગાંધીનગર,ખેડા,મહેસાણા,સાબરકાંઠા,અરવલ્લી,મહીસાગર,દાહોદ,જામનગર,દ્વારકા,પોરબંદરમાં ભારે વરસાદનું યલો એલર્ટ હવામાન વિભાગે આપ્યું છે.  રેડ એલર્ટ જિલ્લામાં વિજળીના કડાકા-ભડાકા સાથે ભારે પવન અને બરફના કરાની સાથે અત્યંત ભારે વરસાદ પડવાની આગાહી હવામાન વિભાગ દ્વારા કરવામાં આવી છે. સમગ્ર દક્ષિણ ગુજરાતમાં અતિ ભારે વરસાદનું ઓરેન્જ એલર્ટ આપવામાં આવ્યું છે. 

અમદાવાદ અને ગાંધીનગરમાં પણ ગાજવીજ સાથે વરસાદની આગાહી હવામાન વિભાગ દ્વારા કરવામાં આવી છે. અમદાવાદમાં ભારે વરસાદનું યલો એલર્ટ આપવામાં આવ્યું છે.  

રાજ્યમાં ભારે વરસાદને લઈ અંબાલાલ પટેલની આગાહી

હવામાન નિષ્ણાંત અંબાલાલ પટેલે રાજ્યમાં આગામી 2 દિવસ ભારે પવન સાથે વરસાદની આગાહી કરી છે. હજુ પણ કમોસમી વરસાદ યથાવત રહેશે. અંબાલાલ પટેલની આગાહી મુજબ આજે ઉત્તર ગુજરાતમાં કમોસમી વરસાદ પડશે. અંબાલાલના અનુમાન મુજબ આજે ઉત્તર ગુજરાતના મોટાભાગના વિસ્તારમાં ભારે પવન સાથે વરસાદ વરસવાનું અનુમાન છે. બપોર બાદ પાટણ મહેસાણા સહિતના આસપાસના વિસ્તારમાં ભારે પવનની સાથે વરસાદનું અનુમાન છે. 

અંબાલાલ પટેલના આંકલન મુજબ આગામી 2 દિવસ  સૌરાષ્ટ્ર કચ્છમાં પણ વરસાદનું અનુમાન છે.  અંબાલાલ પટેલના અનુમાન મુજબ આગામી 2 દિવસ બાદ રાજ્યમાં  તબક્કાવાર વરસાદના જોરમાં ઘટાડાનું અનુમાન છે. ઉત્તર અને મધ્ય ગુજરાતમાં 10મે સુધી છૂટ્ટોછવાયો વરસાદ વરસી શકે છે. 10થી 12 મે વચ્ચે રાજ્યમાં ભારે પવન સાથે છૂટછવાયા વરસાદનું અનુમાન છે.