Weather Update:રાજયમાં ફરી માવઠાનું સંકટ, આ તારીખથી પડશે કમોસમી વરસાદ
Weather Update: એક બાજુ દિત્વાહ વાવાઝોડના કારણે તમિલનાડુ સહિત કેટલાક રાજ્યોમાં એલર્ટ જાહેર કર્યું છે તો બીજી તરફ રાજસ્થાન પર એક્ટિવ એક સિસ્ટમ ગુજરાતમાં પણ કમોસમી વરસાદ વરસાવી શકે છે.
Weather Update: ગુજરાતમાં શિયાળો શરૂ થયો હોવા છતાં પણ તાપમાન વધુ હોવાથી ઠંડીની શરૂઆત નથી થઇ ત્યારે હવામાન વિભાગે આગામી 24 કલાક બાદ તાપમાનનો પારો ગગડે તેવો અનુમાન વ્યક્ત કર્યો છે. રાજયમાં 2થી3 ડિગ્રી તાપમાન ઘટે તેવી શક્યતા છે. જેના કારણે ઠંડી વધશે. કમોસમી વરસાદની વાત કરીએ તો રાજ્યમાં ડિસેમ્બરની શરૂઆતમાં વાતાવરણમાં પલટો આવી શકે છે. ઉલ્લેખનિય છે કે, રાજસ્થાન પર હાલ સાયક્લોનિક સર્ક્યુલેશન સર્જાયું છે. જેની અસરથી ગુજરાતમાં 5 ડિસેમ્બર અને 6 ડિસેમ્બરે વાદળછાયા વાતાવરણ વચ્ચે છૂટછવાયો વરસાદ વરસી શકે છે. હવામાન વિભાગની આગાહી મુજબ 5 અને 6 ડિસેમ્બરે ઉત્તર ગુજરાત, દક્ષિણ ગુજરાત કચ્છ, સૌરાષ્ટ્રમાં વાદળછાયું વાતાવરણ રહેશે અને આ ઝોનના કેટલાક વિસ્તારમાં છુટછવાયો વરસાદ વરસી શકે છે.
દિત્વાહ વાવાઝોડાની કયાં રાજ્યો પર થશે અસર
શ્રીલંકાના દરિયાકાંઠાના વિસ્તારો અને દક્ષિણપશ્ચિમ બંગાળની ખાડી પર રચાયેલ ચક્રવાત "દિત્વાહ", ઉત્તર તરફ સતત આગળ વધી રહ્યું છે. તેની ગતિ 7 કિમી પ્રતિ કલાક નોંધાઈ છે. ચક્રવાતની અસર 30 નવેમ્બરના રોજ ઉત્તરી તમિલનાડુ, પુડુચેરી અને દક્ષિણ આંધ્રપ્રદેશના દરિયાકાંઠા પર અનુભવાઈ શકે છે. આને ધ્યાનમાં રાખીને, હવામાન વિભાગે દરિયાકાંઠાના વિસ્તારો માટે "ઓરેન્જ એલર્ટ" જાહેર કર્યું છે.
'દિત્વાહ' વિશે શું અપડેટ છે?
ભારતીય હવામાન વિભાગના જણાવ્યા અનુસાર, શનિવારે સવારે 2:30 વાગ્યે, વાવાઝોડાનું કેન્દ્ર 9.2 ડિગ્રી ઉત્તર અને 80.8 ડિગ્રી પૂર્વમાં, ત્રિંકોમાલીથી 80 કિમી ઉત્તરપશ્ચિમમાં અને ચેન્નાઈથી લગભગ 430 કિમી દક્ષિણમાં સ્થિત હતું. ચક્રવાતી વાવાઝોડું ઉત્તર-ઉત્તરપશ્ચિમ તરફ આગળ વધીને 30 નવેમ્બરના રોજ ઉત્તરી તમિલનાડુ, પુડુચેરી અને દક્ષિણ આંધ્રપ્રદેશના દરિયાકાંઠે પહોંચવાની ધારણા છે.
આ વિસ્તારોમાં ભારે વરસાદની આગાહી છે
ચક્રવાતની અસરને કારણે તમિલનાડુના અનેક જિલ્લાઓમાં ભારેથી અતિ ભારે વરસાદની આગાહી છે. હવામાન વિભાગે ચેતવણી આપી છે કે રામનાથપુરમ, પુડુક્કોટાઈ, તંજાવુર, તિરુવરુર, નાગપટ્ટીનમ અને કરાઈકલના અલગ અલગ વિસ્તારોમાં ભારે વરસાદ પડી શકે છે. થુથુકુડી, શિવગંગાઈ, અરિયાલુર અને મયિલાદુથુરાઈમાં પણ ભારેથી અતિ ભારે વરસાદની આગાહી છે. કન્યાકુમારી, તિરુનેલવેલી, વિરુધુનગર, મદુરાઈ, તિરુચિરાપલ્લી, પેરામ્બલુર અને કુડ્ડલોર જિલ્લામાં પણ અલગ અલગ સ્થળોએ ભારે વરસાદ થવાની સંભાવના છે.
શાળાઓ અને કોલેજો બંધ રહેશે.
ગંભીર હવામાનને ધ્યાનમાં રાખીને, તમિલનાડુના અનેક જિલ્લાઓમાં શાળાઓ અને કોલેજો બંધ રાખવાનો નિર્ણય લેવામાં આવ્યો છે. અરિયાલુર, તિરુચી, તંજાવુર અને વિલુપ્પુરમ જિલ્લામાં શાળાઓ બંધ રાખવામાં આવી છે. કુડ્ડલોર, તિરુવરુર, નાગપટ્ટીનમ, મયિલાદુથુરાઈ, કલ્લાકુરિચી, પુડુક્કોટાઈ, પેરામ્બલુર, પુડુચેરી અને કરાઈકલમાં શાળાઓ અને કોલેજો બંનેમાં રજા જાહેર કરવામાં આવી છે.
વહીવટીતંત્રે દરિયાકાંઠાના વિસ્તારોમાં રહેતા લોકોને સતર્ક રહેવાની સલાહ આપી છે, અને માછીમારોને દરિયામાં ન જવાની સૂચના આપવામાં આવી છે. ઊંચા મોજા અને ભારે પવનની શક્યતાને ધ્યાનમાં રાખીને રાહત અને રાહત બચાવની ટીમને પણ એલર્ટ પર રાખવામાં આવી છે.
ટોપ સ્ટોરી
ટ્રેન્ડિંગ સમાચાર
