Surendranagar: વડગામમાં જમીન વિવાદમાં ખેલાયો ખૂની ખેલ, યુવકની કરાઈ હત્યા
દસાડાના વડગામમાં અલગ-અલગ જ્ઞાતિના બે જૂથો વચ્ચે મારામારીનો બનાવ બન્યો હતો. જેમાં સારવાર દરમિયાન યુવકનું હોસ્પિટલ ખાતે મોત નીપજતા મારામારીનો આ બનાવ હત્યામાં પરિણમ્યો હતો.
સુરેન્દ્રનગર: સુરેન્દ્રનગર જિલ્લામાં કાયદો અને વ્યવસ્થાની સ્થિતિ કથળી ગઈ હોય તેમ લાગી રહ્યું છે. સુરેન્દ્રનગર જિલ્લાના સમઢીયાળા ગામમાં જમીન મુદ્દે બે સગા ભાઈઓની હત્યા કરવામાં આવી હતી. આ બનાવને એક સપ્તાહ જેટલો સમય થયો છે ત્યાં વધુ એક યુવકની જમીનના વિવાદમાં હત્યા કરી દેવામાં આવતા પંથકમાં ચકચાર મચી ગઈ છે. વડગામમાં જમીન વિવાદમાં એક યુવકની હત્યા કરવામાં આવી છે. દસાડાના વડગામમાં અલગ-અલગ જ્ઞાતિના બે જૂથો વચ્ચે મારામારીનો બનાવ બન્યો હતો. જેમાં સારવાર દરમિયાન યુવકનું હોસ્પિટલ ખાતે મોત નીપજતા મારામારીનો આ બનાવ હત્યામાં પરિણમ્યો હતો.
પાટડી તાલુકાના વડગામમાં જમીન મુદ્દે 19 વર્ષીય યુવકની જાહેરમાં હત્યા થતા સમગ્ર પંથકમાં ચકચાર મચી ગઈ છે. આ યુવક પર જાહેરમાં તીક્ષ્ણ હથિયાર વડે હુમલો કરવામાં આવ્યો હતો. અંદાજે 19 વર્ષના યુવક પર તીક્ષ્ણ હથિયારના ઘા ઝીંકી ગંભીર ઈજાઓ પહોંચાડતા તેને સારવાર અર્થે મોડી સાંજે વિરમગામ હોસ્પિટલ ખસેડવામાં આવ્યો હતો. પ્રાથમિક તપાસમાં જમીન બાબતના મનદુઃખ રાખી મારામારી થઈ હોવાની ચર્ચાઓ છે.
યુવકની હત્યાના બનાવથી પરિવારજનો સહિત ગામમાં શોકની લાગણી ફેલાઈ ગઈ છે. પોલીસે ઘટના સ્થળે તેમજ હોસ્પિટલ ખાતે પહોંચી વધુ તપાસ હાથ ધરી છે. હત્યાનો ભોગ બનનાર યુવકનું નામ રાહુલ ઠાકોર હોવાનું સામે આવ્યું છે. ઘટનાની જાણ થતા DYSP સહિતનો કાફલો ઘટના સ્થળે દોડી ગયો હતો.
સમઢીયાળાના ડબલ મર્ડર કેસમાં SIT એ 5 આરોપીની ધરપકડ કરી છે
ચુડા તાલુકાના સમઢીયાળા ગામે ડબલ મર્ડર મામલે પોલીસને મહત્વની સફળતા મળી હતી. સ્પેશિયલ ઇન્વેસ્ટીગેશન ટીમ (SIT) દ્વારા ચુડા તાલુકાના સમઢીયાળા ગામે થયેલ ડબલ મર્ડરના આરોપીઓને ઝડપી પાડવામાં આવ્યા હતા. હત્યા નીપજાવનાર આરોપીઓ પૈકી 5 આરોપીઓને ઝડપી પાડી કાયદેસરની કાર્યવાહી હાથ ધરવામાં આવી હતી. જણાવી દઈએ કે, જામનગર એસ.પી. પ્રેમસુખ ડેલુની અધ્યક્ષતામાં SIT ની રચના કરવામાં આવી હતી. અલગ અલગ ટીમો બનાવી ગણતરીના દિવસોમાં ડબલ મર્ડર કરનારા 5 આરોપીઓને ઝડપી પાડયા હતા. સમઢીયાળામાં જમીન વિવાદમાં બે સગા ભાઈઓ આલજીભાઈ પરમાર અને મનોજભાઈ પરમારની હત્યા કરવામાં આવી હતી.
ઝડપાયેલ આરોપીઓ
(૧) અમરાભાઇ ખાચર,ઉ.વ.૬૫
(૨) જીલુભાઇ ઉર્ફે ઘુઘાભાઇ અમરાભાઇ ખાચર, ઉ.વ.૩૨
(૩) મંગળુભાઇ ખાચર, ઉ.વ.૨૩
(૪) ભીખુભાઇ ખાચર,ઉ.વ.૬૪
(૫) રણજીતભાઇ ઉર્ફે ભાણભાઇ ભાંભળા,ઉ.વ.૩૯
ટ્રેન્ડિંગ સમાચાર
ટોપ સ્ટોરી
