અમદાવાદમાં વિમાન દુર્ઘટના: ૩ મિનિટમાં કાળનો કોળિયો બન્યું લંડન જતું વિમાન, ટેકઓફ બાદ અકસ્માત કેવી રીતે થયો? તમામ સવાલોના જવાબ
૨૪૨ મુસાફરોમાંથી ૧૬૯ ભારતીય, વિજય રૂપાણી પણ સવાર; બ્લેક બોક્સથી ખુલશે રહસ્ય, બચાવ કામગીરી યુદ્ધના ધોરણે.
Air India plane crash reason: આજે બપોરે અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પરથી ઉડાન ભર્યાના માત્ર ત્રણ જ મિનિટમાં એક ભયાનક વિમાન દુર્ઘટના સર્જાઈ હતી. એર ઈન્ડિયાની લંડન જતી ફ્લાઇટ AI171, જેમાં ૨૪૨ લોકો સવાર હતા, તે મેઘાણીનગર વિસ્તારમાં ડોક્ટર્સ હોસ્ટેલ પર ક્રેશ થઈ હતી. આ ઘટનામાં મોટી જાનહાનિની આશંકા છે, જોકે હજુ સુધી સત્તાવાર મૃત્યુઆંક જાહેર થયો નથી.
ગુરુવારે (૧૨ જૂન) ગુજરાતના અમદાવાદમાં એક ગમખ્વાર વિમાન દુર્ઘટના બની. અમદાવાદના સરદાર પટેલ આંતરરાષ્ટ્રીય એરપોર્ટ પરથી લંડન જવા માટે બપોરે ૧:૩૯ વાગ્યે રનવે ૨૩ પરથી ઉડાન ભરેલું એર ઈન્ડિયાનું વિમાન AI171 માત્ર ત્રણ જ મિનિટમાં મેઘાણીનગર વિસ્તારમાં ડોક્ટર્સ હોસ્ટેલ પર ક્રેશ થયું. આ ભયાવહ અકસ્માતમાં વિમાનમાં સવાર ૨૪૨ લોકો (૨૩૦ મુસાફરો અને ૧૨ ક્રૂ મેમ્બર) ના મોતની આશંકા છે.
અકસ્માત ક્યારે અને ક્યાં થયો?
- ક્યારે? એર ટ્રાફિક કંટ્રોલ (ATC) અનુસાર, વિમાન બપોરે ૧:૩૯ વાગ્યે ટેકઓફ થયું અને ઉડાન ભર્યાના થોડા સમય પછી જ ક્રેશ થયું.
- ક્યાં? સરદાર પટેલ આંતરરાષ્ટ્રીય એરપોર્ટ પરથી ઉડાન ભર્યાના ત્રણ મિનિટમાં જ મેઘાણીનગર વિસ્તારમાં આવેલી ડોક્ટર્સ હોસ્ટેલમાં આ અકસ્માત થયો.
- ક્યાં જઈ રહ્યું હતું? આ વિમાન અમદાવાદથી લંડન જઈ રહ્યું હતું.
વિમાનમાં સવાર લોકો અને મોટી હસ્તીઓ
વિમાનમાં કુલ ૨૪૨ લોકો સવાર હતા. મુસાફરોમાં ૧૬૯ ભારતીય નાગરિકો, ૫૩ બ્રિટિશ નાગરિકો, ૭ પોર્ટુગીઝ નાગરિકો અને ૧ કેનેડિયન નાગરિકનો સમાવેશ થાય છે. ગુજરાતના ભૂતપૂર્વ મુખ્યમંત્રી વિજય રૂપાણી પણ આ વિમાનમાં સવાર હતા. તેઓ તેમની પુત્રીને મળવા લંડન જઈ રહ્યા હતા.
જાનહાનિ અને ઇજાઓ
- વિમાન ક્રેશ ડોક્ટર્સ હોસ્ટેલ પર થવાને કારણે ૧૫ ડોક્ટરો ઘાયલ થયા છે, તેમને હોસ્પિટલમાં ખસેડવામાં આવ્યા છે.
- સ્થાનિક કાઉન્સિલરના જણાવ્યા અનુસાર, દુર્ઘટના સ્થળે ઓછામાં ઓછા ૨૦ થી ૨૫ લોકો ભોગ બન્યા હશે. કેટલાક લોકોએ પોતાનો જીવ બચાવવા માટે સાતમા માળેથી કૂદી પડ્યા હતા, જેના કારણે તેઓ પણ ઘાયલ થયા છે.
- મોટી સંખ્યામાં જાનહાનિની આશંકા છે, જોકે હજુ સુધી સત્તાવાર મૃત્યુઆંકની પુષ્ટિ થઈ નથી.
કેપ્ટન અને અકસ્માતનું કારણ
આ વિમાનનું કમાન્ડ કેપ્ટન સુમિત સભરવાલ પાસે હતું અને તેમની સાથે ફર્સ્ટ ઓફિસર ક્લાઈવ કુંદર પણ હતા. વિમાન દુર્ઘટનાનો એક વીડિયો સામે આવ્યો છે, જેમાં જોઈ શકાય છે કે વિમાન નીચે આવી રહ્યું છે અને અચાનક આગનો ગોળો બની જાય છે, જેના પછી ચારેતરફ અંધાધૂંધી મચી ગઈ હતી.
ડિરેક્ટોરેટ જનરલ ઓફ સિવિલ એવિએશન (DGCA) એ આ અકસ્માતના કારણો જાણવા માટે તપાસના આદેશ આપ્યા છે. જોકે, વિમાન ક્રેશ કેવી રીતે થયું તેનું રહસ્ય બ્લેક બોક્સ મળ્યા પછી જ બહાર આવશે, કારણ કે બ્લેક બોક્સમાં વિમાનની તમામ પ્રવૃત્તિઓ નોંધાયેલી હોય છે અને તે સામાન્ય રીતે નાશ પામતું નથી.
બચાવ કાર્ય અને સરકારી પ્રતિભાવ
દુર્ઘટના બાદ યુદ્ધના ધોરણે બચાવ કાર્ય શરૂ કરવામાં આવ્યું છે. NDRF ની ત્રણ ટીમો (૯૦ લોકો) બચાવ કાર્યમાં લાગી છે, અને વડોદરાથી વધુ ત્રણ ટીમો આવી રહી છે. કેન્દ્રીય ગૃહમંત્રી અમિત શાહ અને કેન્દ્રીય નાગરિક ઉડ્ડયન મંત્રી રામ મોહન નાયડુ પણ અમદાવાદ જવા રવાના થઈ ગયા છે. પ્રધાનમંત્રી નરેન્દ્ર મોદી પોતે આ સમગ્ર ઘટના પર નજર રાખી રહ્યા છે.
વિમાનની વિગતો
આ દુર્ઘટનાગ્રસ્ત બોઇંગ ડ્રીમલાઇનર ૭૮૭/૮ વિમાન ૧૪ ડિસેમ્બર, ૨૦૧૩ ના રોજ પહેલી વાર ઉડાન ભરી હતી, એટલે કે તે ૧૨ વર્ષ જૂનું વિમાન હતું. આવા વિમાનો ૩૦ વર્ષ સુધી ઉડી શકે છે. તેનો નંબર AI171 હતો અને તેમાં ૩૦૦ મુસાફરો બેસી શકે છે.
ઉલ્લેખનીય છે કે, વર્ષ ૧૯૮૮ માં પણ અમદાવાદ એરપોર્ટ પર એક મોટો વિમાન અકસ્માત થયો હતો, જેમાં ૧૩૩ લોકોના મોત થયા હતા.
ટોપ સ્ટોરી
ટ્રેન્ડિંગ સમાચાર
